MAHNI IN PHAT LEH ZIRTIR NIHNA
(Domenic Marbaniang-a ziak lak chhawn)
Lal Isua chuan amah zuitute chu mahni in phat a, mahni kraws pu tur an nih thu a sawi a. Hei hian a entir chiang tak chu kraws put tur hi chu kan neihtheuh va. Amaherawhchu, mahni kan in phat theih loh avang hian kan kraws chu kan pu thei lo thin a ni.
Mahni hamthatna leh lawmna ringawt kan zawn hi chuan mahni kraws hi a put theih loh va, chuvang chuan Isua Krista min beisei ang hian Amah kan zui thei lo thin a ni. Mihring kan nih chhunga thil pawimawh, tul ve tho te – kan eizawnna te, kan sum leh pai te, midang nen kan in laichinna te, kan rilru duthusam leh kan rawngbawlnate pawh hi Isua Krista aia kan dah pawimawh hmasak hian mahni inphat hi kan harsat phah fo thin. Heng thil pawimawh dangte aia Isua Krista kan dah pawimawh hmasak apiang hian kan nunah Krista a lo lal ta zawk a, Thlarau Thianghlim tanpuina in Isua zirtir ni thei turin rah kan chhuah thei thin a ni.
Ruthi chuan a chipui leh unaute Pathian hre lo te hnena kir leh aia a pi, a pasala nu Naomi zui zawk a thlan chiah khan a rinawmna chu Pathianin mal a sawm tih Bible-ah kan hmuh kha. A pi Naomi khan a monu chu duhsakin a chipuite hnena kir leh tur khan a ti a. Ruthi chuan amah in phatin a kraws chu put a thlang ta zawk a. A laichinte hnena kir leh ai chuan Naomi Pathian chibai buk chu a tha zawk tih a hria a, a zawm nghal bawk a. Chumi avang chuan Pathian chhungte zingah telin Isua thlahtu zingah a lo tel ta a ni.
Moab mi nih mahse a pi Pathian biak a thlan zawk avang khan chhungkaw tharah a lo tel ta a ni. Isua Krista thuhretu chu ‘chi’ leh ‘eng’ anga tehkhin kan ni a. Thuhretu, zirtir nihna hi mahni inchhit ralna a ni a. Chi pawh a bura a awm reng chuan a nihna leh a tangkaina a chhawr theih lova, chawhmeh leh thildang al nana kan hman chauh hian a hlutna a lo lang chhuak thin. Eng pawh hmun thimah chhit anih chauhvin a hlutna kan hmu thin. Kan hlutna tak tak chu mahni lam kan insensona atangin a lang chhuak thin.
Ruthi chuan a rilru-a a lo suangtuah leh hisap zawng zawng kalsanin a pi Naomi kha a zui a. A mopui Orpii kha chuan a pi kalsanin a chipuite hnenah a kir leh a nih kha. Tunlaiah pawh hian khawvela engemaw tak nih ve kan tumna hian Isua zirtir tak tak kan nihna tur hi min dal fo awm e. Kan dam khawchhuahna tura kan mamawh hi a pawimawh lo a ni lova. Pathianin min duhna zawk hi kan dah pawimawh hmasa zawk tur a ni a, a dawtah khawvel thila kan mamawhte hi kan dah zawk tur a ni, tih hi kan ring ngam lo fo thin a ni. Abrahama hnena Pathian ‘Ram Tiam’ pek a tum kha ramri nei Palestina ram bawr vel mai ni lovin “Khua, lungphumte nei mi, Pathian relbawl leh siam” (Heb 11:10) zawk chu ani Lalpa ramtiam chu. Hei hi ringtute hian kan thlir pha lo fo thin a ni.
Ruthi chuan nilengin, rim takin hna a thawk a, a hun neih chu a hmang tangkai em em bawk. Chhun anih lai hian Isua zirtir chuan hna a thawh hi a inhmeh a, pension a awm ve lo. Ruthi tan chuan rim taka a thawhnaah khan thil mak te, malsawmna te, ei leh in hniang hnar tak leh em khat buh phurh hawn tur a hlawh a ni. Mahni kan in bunruah hian Pathian malsawmna chu kan dawng dawn a lo ni.