SUAL LEH RINGTUTEN KAN HMACHHAWN DAN TUR
Sualna hrim hrim hi a lo mak khawp mai a. Davida khan Uria a thah a, a nupui a neihsak khan Uria chungah thil a tisual em em in alang lo a. A chhan chu Lal a ni a. A khua leh tui te chungah chuan Lal chuan a duh chu a ti thei a ni. Amaherawhchu, Uire suh tih thu pe tu Pathian chungah thil a tisual a ni. Sam 51:4 “I chungah, i chung chauhvah thil ka tisual a, I mit hmuha thil sual chu ka lo ti ta a:” tiin Pathian hma ah ngaihdam a lo dil nasa a ni. Hei tak hi kan hmuh thelh fo thin a ni. Ka mihring pui chunga bumna hmanga firfiak taka ka tih hian Pathian dan petu, i mihring pui hmangaih tura thu petu hnenah hian dan kan lo bawhchhe tawh thin a ni. Sual reng reng hi Pathian hmaa kan bawhchhiat a lo ni thin.
Mahni sual neih sawi nep nana midangte sual kawk zut zut chi hi tunlai ringtu zingah mi tam tak an lo awm ta. Eden huanah pawh Adaman thiam a chan phah chuang lo a ni. Thenkhat chuan kan sualna emaw hi midangte sualna aia a tet emaw a lansarh loh vang ringawt hian Pathian hma ah kan insawi fel theiin kan ring thin. Sual man chu thihna a ni. Pathian hian midangte nun danah min buk dawn lo a, Pathian dan angin min teh dawn a. Chumi tling zo tur chuan Krista i nei tawh em?
Anih leh ringtu kan nih angin kan ringtu unau sualna kan lo hmuhsak hlauh chu kan tih tak ang. Galatia bung 6-ah chiang takin min kawhhmuh a ni. I ringtu unau sualna tlu chu inveng tha chungin thuhnuairawlh takin i tung ding leh tur a ni. Hmangaihna nena in tawngtai sakna, sual in hriattirte leh Kraws-a Isua tuarna in hrilh nawn leh te hian sualna a umbo in, mi hriat loh a inrel leh in sawisel te ai chuan a lo Pathian thu zawk em em a ni. Engvangin nge kan in hrilh ang a, kan intundin leh thin ang. A chhan chu pakhatna ah chuan sualna nei, tlu leh thei kan nih vangin. A pahnihna ah chuan sual hian min ti na thin a ni. Pathian i nat duh lotu hian dan(instruction) chu a lo pe fel diam a ni. (hmangaihna avangin) Sual reng reng hi Pathian in a ngaidam hmiahin a thai bo vek thei.He khawvel tawp hunah sual leh a hnathawh zawng zawng chu a la ti bo ang. Amaherawhchu, sual hlauhawm zia leh thil zawng chhang tlak a nih loh zia kan hriat reng theih nan a sual hnu hma (effect) hi a paih bo lo fo thin a ni.
Thlemna sualna a min hruai lut thin tu hian nitinin ringtute hi min bei reng dawn a ni. Thlemna hneh thei tur chuan Kraws-a i Lalpa tuarna va en leh thin la. Ngun takin i tana a lo tuarna chu ngaihtuah leh thin a. Chu i tana tuarna ah chuan thlemna hneh theihna a awm avangin a ni. Krista Kraws kan ngaihtuah hian Sual tih kan chaknate zawng zawng hi a lo bo a. Pathian hmangaihna atanga chakna lo chhuak chuan siamtharin kan lo awm leh thin a ni.