PATHIAN MIN DIN CHHAN
Tin, ani chuan a hnenah, “Lalpa i Pathian chu i thinlung zawng zawngin, i thlarau zawng zawngin i hmangaih tur a ni”, tih hi. Chu chu thupek ropui leh pawimawh ber a ni. Tin, a dawttu, a anpui chu hei hi a ni, “Nangmah i in hmangaih angin i vengte pawh i hmangaih tur a ni”, tih hi. Matthaia 22:37-39
He thu hi Pharisai te leh Sadukai ten Lal Isua an hnial tuma, “Dan thuah thupek ropui ber eng nge?” tia an zawh a chhanna a ni. He khawvela kan lo pian chhuah hian Pathian hian min din chhan leh keimahnia tihhlawhtlin duh a nei zel a. Chu a thiltum chu mi hrang hrangah a inang lo thei hle awm e. Chutih rual chuan mihringte Pathianin min din chhan leh keimahnia a thiltum inang tlang vek a awm a, chu chu a chunga Bible chang kan dah atang hian a hriat theih mai awm a.
Eden huana Pathianin mihringa a din khan hmangaihna nen a din a. Ama nunna thaw ngei chu thaw lutin thlarau hmanga tih nun kan lo ni ta a. (Gen 2:7) Pathian chuan duhsak takin a thilsiam zawng zawng chunga thunei turin a ruat a. Chumai bakah anmahni pawl turin Eden huan a tlawh fo thin tih kan hmu bawk a. Amaherawhchu sual avangin Pathian leh mihring then hran kan lo ni ta. Chumi hnuah pawh Pathian chuan a hmangaihna kan chungah a la lantir zel a. A fapa Isua Krista hmangin chhandamna kawng min la hawn sak ta cheu a. Min dintu hian hmangaihna nena min din avangin keimahnia a thiltum leh min din chhan pui ber chu hmangaihna hi a ni lo thei lo tih a chiang awm e.
Pathianin min din chhan hi hlawm lian zual pathumin lo then ta ila.
1. Pathian hmangaih let ve : Thupek ropui ber kan hmuh chu ‘Lalpa i Pathian chu i thinlung zawng zawngin, i thlarau zawng zawngin i hmangaih tur a ni,” tih kha a ni a. Hmangaih taka min dintu hian Amah kan hmangaih let hi a phut tlat a. Chu chu min din chhan pawimawh tak pawh a ni reng a ni. Pathianin min din chhan chiang taka hmutute chuan a dintu Pathian chu nasa takin an hmangaih let ve thin. “Amahnin min hmangaih hmasak avangin kan hmangaih a ni,” tih ang khan. (I Johana 4:19) Pathian hian Amah kan hmangaih let ve dan tha ber leh awlsam ber min kawhhmuh bawk a. Chu chu a thupekte kan zawm hian a ni. “Nangnin min hmangaih chuan ka thupekte in zawm ang,” tih ang khan. (Johana 14:15)
2. Kan mihringpuite hmangaih : Thupek ropui ber tluk zeta thupek ropui dang a awm a. chu chu ‘nangmah i inhmangaih angin i vengte i hmangaih tur a ni,” tih hi a ni. Pathianin min hmangaihna leh Ani kan hmangaih let ve mai hi a tawk lova. Amah kan hmangaihna kan tih lanna atana a thupekte kan zawm a, kan mihring puite kan hmangaih ve hi min din chhan pawimawh tak a ni. “Miin, “Pathian ka hmangaih e,” tiin a unaupa haw si se la, amah chu dawthei a ni; a unau a hmuh tawh renga mah a hmangaih loh chuan Pathiana hmuh lohva chu engtin nge a hmangaih theih ang?” (I Johana 4:20) Pathianin min hmangaih ang chiaha kan mihring puite hmangaiha, tisa leh thlarauva chhawmdawl a, Pathian ke bula hruai hi min din chhan a ni.
3. Thilsiam dangte hmangaih : Eden huanah Adama kha thilsiam zawng zawng chunga thuneia enkawl tura mawhphurhna pek a ni a. He mawhphurhna min pek hi vawiin thleng hian a la danglam lova. Isua vana a lawn dawn pawh khan a zirtirte hnenah a la chah lawm lawm a ni. (Marka 16:15) Ringlo mi kan tih zawk mah ten nungcha leh thilsiam dangte chunga ngilneihna an lantir theih chuan, he thupek ropui min petu lei leh vana Lalber thu hi zawm ngei tur chu kan ni a. Chu chu min din chhan leh he khawvela min dah chhan pawh a ni e. Thuneihna min pek hi thilsiam dangte chunga hlei lenna atan ni lovin inngeih leh muang taka kan chen ho dial dial theihna atana hma la tura min tihna a ni zawk e.
Pathian hian min hmangaih em em a. Min hmangaih avangin suala kan tlu tawh hnu pawh chhandamna hautak tak mai hmangin min la chhandam zel a. Min hmangaihtu hian kan hmangaih let ve a phut a. Kan mihring puite hmangaih turin min ti bawk a. Chutiang chiah tho chuan thilsiam dangte pawh duat taka enkawl turin kan kovah mawhphurha a dah bawk a. Chu min din chhan chu a tihlawhtlingtu ni tura theihtawp kan chhuah hi kan tihmakmawh a ni. Keimahni theuh in enfiah ila Pathianin min din chhan hi keimahniah tihhlawhtlinin a awm nge awm lo tihte ngun takin in chhut ila. Kan lo la tihlawhtling kim lo anih pawhin chumi kan hlenchhuah theihna tur chuan Pathianin hun hlu tak min pek hi bawhpelh lovin hmangaihna nena min dintu min din chhan hi tihlawhtling turin theihtawp chhuahin tan ila tlang ila. Hmangaihna nena rawngbawl turin intuaithar sauh sauh teh ang u.