Emmanuela
Emmanuela awmzia hi kan hre theuh awm e. ‘Kan hnena Pathian awm’. Isua Krista mihringa a lo chan khan Pathian chu a hring a hranin kan hnenah min chhandam turin a lokal ta rup a nih kha. Engvangin nge, Pathian kan hnena awm chu a pawimawh em em tih thuthlung hlui lam atang hian i han chhui chho dawn teh ang.
Exodus 33:1-17 thu hi i han en ila. Mosia leh Pathian in biakna kan hmu a ni. Mosia kha Pathian mit tlung tak mi a ni. Amaherawhchu, Pathian chhanchhuah tum Israel-te erawh hnam luhlul tak an nih thu kan hmu. A hmalam thu kan chhiar chuan Mosian Pathian hnena thupek a lak laiin milem siam chawp an lo biak vel thu kha a ni. Pathian in tihboral a tum a, Mosian, Pathian hnena Israel mipuite sualna ngaihdam nana a dil sak thu te kan hmu a ni. Ngaihdamna chu Mosia chuan a dil hmuh sak ta ngei mai. Mahse, Pathian chuan a aiah vantirhkohte rawn tir a Kanaan-ho te, Amor-ho te, Hit-ho te, Periz-ho te, Hiv-ho te, Jebus-ho te kha hnawhchhuah sak a in tiam a. Israel te bulah erawh a awm loh tur thu in a chhang thung. (An sualna te avangin a tihboral mai a hlau a ni). Amaherawhchu, Israel-ho kha an lawm hauh lo an tap nasa ta mai a nih kha.
Engvanginnge Pathian thianghlim tak, an khawlohnate a lo awm a, tihboral vek mai tur khawp Pathian chu, an bula awm tir an duh? An duhna chhan chu hei hi a ni.
1. Pathian mittlunga an awm leh awm loh hriat theihna a ni tlat a ni: Exodus 33:16 ah chiang takin kan hmu a ni. Pathian thlarau kan hnena a chen tak atang chiah hian a ni. Pathian duhzawng leh duh loh zawng kan hriat theihna chu. Pathian duh loh zawng kan tih a, tuman min hmuh loh vanga kan la hlim viau hi chuan Pathian hian a ta ah min la pawm lo hi, a lo ni duh viau a ni. Pathian hian a awm puiin a chenchilh ve che em? tih hi in zawt fo ang che.
2. Mite mithmuh a kan danglamna a ni: He khawvelah hian mihring tam tak kan awm. Mahse, Pathian mite zawng zawng chu an ni hauh lo mai. Pathian mite kan ni tih hriat hran theihna chu Pathian kan hnena a cheng tlat hi a ni. Mosia khan a hre chiang em em a ni. An hnena Pathian a awm loh chuan, he khawvel a pathian lem be tu te nen khan an danglamna a awm lo a ni. Pathian nung be tu kan nih chuan Pathian kan hnena awm hi kan thlahlel ngei ngei tur a ni. Pathian thu chakin i tuihal thin em? Pathian nena fianrial hun neih chakin i awm thin em? Nge Pathian hi i hnenah a la awm ve ngai lo?.
Pathian chu, i hringnun zinkawngah hian kalkawng danga i peng tur, venga zilh hau tur che leh, Pathian nena inrem turin a fapa Lal Isua Krista a pek che hi i nei tawh em?