MAICHAMA MEI A NUNG RENG ANG A, A MIT TUR A NI LO
Nikum lam khan MTKP huaihawtin TKP member ten Bible chhiar chhuah kan tum a. A hlawhchham pawlte zinga mi kha ka ni pek a. Leviticus ah hian ka tawp san ta a. Tun kum tan tirh tang khan hlawhchham tawhna hlawhtlin tumin kan bei tlai khaw hnuhnawh ve leh ta a. Leveticus pawh ngaihnawm ti tak chuan ka chhiar ve leh thei ta a. A bu pum ka chhiar chhuah hian rilru a cham reng thil pahnih a awm ve a. Phar hri lo rapthlak zia leh Pathian in phar hri lo lan chhuah dan a sawite, mak deuh mai chu phar hri te kha in ah pawh khan a cham bang thei tlat mai a lo ni a. (Ka vawikhat hriatna a ni). Chu lo thil dang chu Maicham ah mei a mit tur a ni lo tih hi a ni.
Maicham kha thuthlunghlui lamah khan Temple ah maicham an siam a, Thuthlung thar ah chuan “Pathian in in nih leh Pathian Thlarau nangmahniah a awm reng tih in hre lo vem ni?” (I Kor. 3:16) a lo ti a. Anih chuan mei chu enge ni ta ang. Mei hi thlarau thianghlim nena sawi a ni thin. “Thlarau chu timit suh ula;” I Thessalonika 5:19. A nih chuan halral thil hlan kang ral tur chu kan hlan ve a ngai ta a ni.
Thuthlung thar ah hian Pathian hian sual thawina leh remna inthawina hi min rawn hlan sak ta tlat mai a. Pathian ngei chuan a fapa Isua Krista chu Kraws lerah kan sualte ngaihdamna turte, Pathian nena kan inremna turte in min lo hlan sak ta a ni. Lalpa chu fakin awm rawh se. Isua Krista (Chatuan mi) chu chatuan daih turin a lo hlan fel ta diam a ni. Chumi chauh lo chuan mihringte hian Pathian laka kan sualna ngaihdamna tur leh kan inremna tur hian thil tling zo a awm ta lo a ni. Helai tak hi ringtute hian kan hmu sual fo thin kan that vangte, ruih theih thil kan sim tak avanga Pathian hi lungawi ta a ni lo. A fapa thisen avang hian a lungawi mai a ni. Mizo chaw eiphung nen lo tehkhin ta ila. Krista chu chaw (rice) a ni. Chaw tel lo in chaw i ei thei lo a ni. A dang chu a chawhmeh (supplementary) an ni. Chawhmeh pawh a pawimawh a. Mahse, Chaw tello in chawhmeh a awm thei ngawt lo. Mizo in chaw/buh (rice) kan ei loh chuan chaw ei ah kan in ngai lo ang hi a ni mai e. A puar theih loh a ni. “Tirhkohte leh zâwlneite lungphûm chunga rem in ni, chu lungphûma a kil lung pawimawh ber chu Krista Isua hi a ni.” Ephesi 2:20.
A nih chuan eng halral thil hlan nge an la hlan thin. Lawmthusawina halral thil hlan a la awm. Thuthlung hlui ah khan he thil hi an lawm avangin an hlan thin a ni. Thuthlung thar ah hian eng nge kan han hlan ve ang kan lawmthusawi nan. Ka hriat ang ang te kan tarlang ve ang e.
1. Fakna : Pathian chu kan lawm avangin kan fak ve dawn lawm ni. Chhandamna a thlawn in harsa takin, ama tuar pawh huamin min siam sak a, fak tlak a ni.
2. Sual kalsan: Chuti khawpa suala kan awm duh lo a, a thisena min tlantu hlena lawmthu sawi nan chuan ka sualte chu thlarau thianghlim puihna in ka halral ve tur a ni dawn lawm ni.
3. Kan thil ngaih hlut ber: Abrahama’n Isaka Pathian tana halral tura a hlan ang khan. Nangpawn he khawvel thila i ngaih hlut ber aiin nangmah hmangaih avanga i tana thi a, nun hlantu tan chu i dah hmasa ngei ngei tur a ni.