INSIAMREM TAWNNA (COMPROMISE)
Upa R.Lalrosanga
Mihring hi a huhova cheng, in mamawh tawn kan ni a. Mizote phei hi tlem te, inpeizawn a, a huhova thil tih ching leh thiam tak pawh kan ni awm e. Thu inchuh a lo awm a, inremna siam tur chuan insiamrem tawn a, inhnuhhniam ve ve a ngaih chang a awm fo mai. Mihring khawsa ho kan nihnaah hetianga kan insiamrem tawn (compromise) hi a ngai thin reng a ni.
Amaherawhchu, Isua Krista hnung kan zuina kawngah erawh hi chuan engtikawng maha khawvel nen kan insiamrem ve theih loh hun, huai taka kan din ngheh ngei ngei a tul hun a awm fo thin. Tunlai tih dan, mi pawhin an ti ve tho, tih chhuanlam siama kan hlutna kan hralh hian Thlarau Thianghlim kan ti lungngai thin tih hi i ngaihtuah ngai em? Hmanlai atangin Setana hian he hmanraw hlauhawm tak hi a hmang fo thin asin. Pharaoa khan Mosia leh Arona hnenah khan Aigupta ram chhuahsan lova Pathian hnena an inthawi kha a phal sak a (Ex 8:25). Hei hian a entir chu ‘Rilru zau tak pu a, khawvel chhuahsan lova Pathian zui’ a ni thei ang. A hnu lawkah Pharaoa chuan kal hla vak lova inthawi a phal sak leh (Ex 8:28). Hemi entir chu ‘khawvel hlat lo thei ang bera pianthar’ a ni leh leh thei ang. A dawt lehah chuan mipa ho chauh, nunau tel lova inthawi a phal sak leh a (Ex 10:11). Setana hian rilru zau tak pu a, midangte chu an duh duhin nung mai se, mahni dinhmun kan chinfel chuan a tawk, chhung chhunga pianthar kher a tul lo tih ngaihdan hmanga inremsiam a, inthiar fihlim duhna min put tir fo thin. Exodus 10:24-ah chuan Pharaoa chuan chhungkuaa inthawi tura kal chu a rem ti ta tih kan hmu a; nimahsela, beram rualte leh bawng rualte keng tela inthawi chu a la phal chuang lo cheu tih kan hmu leh a. Setana chuan kan piantharna hian kan inchhungkhur khawsak leh eizawnna hi a thlen phak kher a tul lo ve, tiin mi insiamrem tir a tum fo tihna a ni ngei ang. Mosia chuan Israel mipui zawng zawng leh an ranrual zawng zawng nena inthawi a phut tlat tih kan hmu a. Lal Isua hnung hi kan zui vek vek anih chuan, a then chauh ni lovin kan nihna leh kan theihna zawng zawnga zui tur kan ni. Khawvel thian nihna, khawvel nen insiamremnna nei chunga pianthar hi Pathianin a pawm hauh lo tih kan hriat a va tul em!
Kohhran programme-ah kan tel thin anih chuan kan tel loh lai taka kan nun hi kan uluk a ngai a. Pathianni-a kan awmna aiin Thawhtanni atanga Inrinni-a kan awmna hi miin an chik zawk daih tih hi i hria ang u. Rual pawl loh hlauh luat avanga “mi pawhin an ti ve tho” tia thil kan nam nulna chiah hi Lal Isua kan palzutna a ni fo. I thlatin hlawh zat dik tak i ziak lan avanga pawisa tlemte i hmuh loh phahna a awm anih chuan lawm rawh. I pianthar tak tak leh tak tak loh fiahna a ni thei. Thudik i sawi kim loh avanga hlawkna chang emaw i intihna a lo awm anih chuan mite hmaah Lal Isua i phatsan a ni thei asin.
Mi thenkhat chuan Pathian avanga khawvel thil chan nasa em em tura in ngaihna an nei fo. Isua Krista hnungzui hi nun hahthlak leh ninawm, phurrit nasa tak emaw ti an awm thin. A awlsam lova, nasa taka tan lak chu a ngai teh meuh mai. Nimahsela, Isua Krista hian Amah thlang ngamtute chu thlarau lama mal a sawm rual hian tisa lamah pawh an mamawh tawk malsawmna a vur ngei ngei thin tih hi i fiah ngam em le? Pathian malsawmna hi a lut lam chauh ni lovin tangka suma lei theih loh, a chhuak leh lam thleng a tel asin. Khawvel nena insiamrem duh lo ngam, Pathian hming avanga miin “rilru tê” an tih ni ngam khawpin i piantharna i tarlang ngam dawn em?