DAWHTHEIHNA
Galatia 5:22&23 “Thlarau rah erawh chu hmangaihnate, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te a ni zawk e.”
Tirhkoh Paula’n Galatia khuaa mite hnena lehkha a thawnah hian thlarau rah chi hrang hrang a sawi a. Chumi zinga pawimawh tak pakhat chu dawhtheihna hi a ni awm e. Mihring mihrinna hian a tlakchham ber berte hi ziak chhuak dawn ta ila dawhtheihna hi a tel ve ngei a rinawm. Ringtu nun dana kan nun kawngah pawh kan ringtu nun khawih buaitu leh harsatna min thlentu tam berte pawh hi chhût chiang ila dawhtheihna kan tlakchham vang hi a lo ni duh khawp mai. Pathian chuan kan chunga thil tha a tih tur leh malsawmna lo thleng tur chu dawhthei taka nghak chhuak thin turin min duh a. (Juda 1:21, Luka 12:37) Mahse, mi tam tak chuan chu chu nghak chhuak zo lovin keimahni duhdan leh tha nia kan hriat angin thawh chhuah kan tum ta thin a. Pathianin kan tana lawmman emaw malsawmna tam tak a dahte chu chang lovin kan awm leh mai thin. Chutih rual erawh chuan beidawng lova dawhthei taka Lalpa nghak hram hramtute chu malsawmin an awm leh thin.
Mihring nunphungah pawh hian a chiang mai awm e. Mi tute pawhin hausa taka awma duh duh neih theih kan chak vek awm e. Thenkhatte chuan rinawm tak leh dawhthei takin taihmakna nen an nghak a, an thawk bawk a. A tawpah hlawhtlinna duhawm tak, midangte pawhin an awh hial khawpa tha an chang leh nge nge thin. Mi thenkhatte erawh chuan hausak thuai an duh a, hah mang lova nawmsak thuai te an duh thin. Hengte hi a chhan bulpui ber chu dawhtheihna an tlakchham vang a ni. An nghak peih lova awlsam taka neih zung zung an duhna chuan sual lam kawngah a hnuk lut tial tial a, a tawpah anmahni chawpin an boral mai thin a ni. A pawi teh e.
Tin, pawimawh leh em em mai pakhat chu kan mihring puite laka dawhtheihna neih hi a ni. Thessalonika 5:14-ah chuan, “Tin, unau te u, ka ngen a che u, dan ang lova awmte chu zilh ula, rilru tete chu fuih ula, chak lote chu tanpui ula, mi zawng zawng lakah dawhthei takin awm rawh u,” tiin min hrilh a. Ringtu kan nihna lan chhuah tirna pawimawh tak pakhat chu kan mihring puite laka dawhtheihna leh hmangaihna kan lan chhuahtir danah hian a ni. Pathian lam an ngaihsak hleihtheih loh avanga an laka beidawn mai te, an tana kan tawngtaina thin thlahthlam maite a awl thin khawp mai. Mahse, heng zawng zawngah hian ringtu kan nihna angin Pathianin kan mihring puite lakah dawhthei taka awm tur leh hmangaih tlat turin min duh a ni.
Miin a nunah dawhtheihna a neih tlat chuan thlarau rah dang tam tak ngilneihna te, rinawmna te, thatna te, thuhnuairawlhna te leh insumtheihna te hi a hranpaa sual chhuah leh ngai tawh lovin a lo nei tel vek tawh zawk thin a lo ni.