“Lalpa hnenah thinlung zawng zawngin lawmthu ka sawi ang” Sam 9:1
Rev PC. Muanthanga
Tukin chu Pathian hnena lawmthu sawi a lang tlat mai! Bible hian lawm thu sawi mawlh mawlh a lo ngai a nih chu. Lawmthu kan sawi chhan turte:
a) Thil tha tinreng hi kan van Pathian hnen atanga lo kal anih thu Jakoban min hrilh. A va tha em!!
b) Sam 103-ah khan, a malsawmna hrang hrang kan dawn min hrilh. Chungte chu
i. Kan sualna zawng zawng min ngaidam thin a.
ii. Kan natna zawng zawngte min tidam thin a.
iii. Ei leh bar, silhfen leh kan tisa mamawhte min pe thin a ti. Malsawmna kan va dawng nasa em kan sawi seng lo.
c) Sam 126-na kan chhiar chuan, “Lalpan thil ropui tak min tihsak e” a tihte kha; sal tangte chhuah annih thu bakah khan, “Tap chunga buh chi feh chhuahpui tute chuan, lawm takin buhphalte an rawn hawn ang” tih min hrilh. Rawngbawlna kawngah pawh
harsatna tawk thin mahse, Pathian malsawmna kan hmu zel ang tihna a ni ngei ang.
d) Jesosaphatan lawmthu leh fakna a hlan khan, hnehna ropui a lo thleng ta! Chutiangin lal Asa lawmthu sawina te poh khan hnehna mak a pe tlat
mai. Lalpa fakna hian thil a va han ti thei tak em!
e) Ka thil tawn: Tum khat chu petscan ka ti ve a, ka taksaah cancer awm leh awm loh tehna a ni. Result nghah kha rilru a tang ve det. Zan khat chu he hla hi ka dawng hlauh mai, “Lalpa ka sual a tam a, tuipuia țiau zatin. Chhandamtu I thisen hi A TAWK E silfai nan,” tih thu ka dawn chuan ka thla a ti muang ta hle mai. Ka hriat tawk te te khan “Lalpa a tawk” ka ti mawlh mawlh mai a nih chu. Zingah doctor-te an lo kal chuan an hmel ka hmuh khan result a tha ang tih kha ka ring nghal mai.
Tih tak ang ngeiin result chu a lo tha a nih chu !! Lal Isua thisen hi a lo chak tih ka hre thar ta !! Lalpa chu fakin awm rawh se!
Tlangkawmna: Bible chuan eng kima lawmthu sawi te, nitin ama hnena
lawm thu hlan tur te in min duh tlat mai. A chang chuan har kan ti thin maw !!
Kan chakna chuan a har thin. Mahse, min tichaktu Krista zarah chuan “ropui taka ngam tu kan ni” thei zel mai. Amen! ‘Fakna hi hnehna a ni’ tih hi i vawng tlat ang aw !!