I THINLUNG VENG THA RAWH
( Stanley Mehta ziak atanga lak chhawn )
Hyderabad-ah khuan kulh ropui tak Golconda Fort an tih chu a awm a, kum 1500 bawr vela Qutb Shahi lal ho sak a ni. Tunah chuan kulh chhe tawh a ni na in chanchin ropui tak a nei a. An engineer-te’n uluk theih tawpin,khatih hun laia beih ngaihna reng reng awm lo tura an duan kha a ni a. Km 11 zeta thui lung banga hung, gate tam tak nei a ni a. Khatih hun laia indona hmanraw chi hrang hrang eng anga beih pawha luh ngaihna awm miah lo a ni. Thil mak deuh mai chu, chu kulh chu tum hnih beih a ni a, chumi tum chuan hmelmate’n kulh chhunga lutin an hneh tlat a ni. A chhan chu gate vengtute chu pawisa in an tham a, hmelmate’n an hneh tlat mai. Kulh satute’n uluk theihtawpin duang mahsela, a pawimawh zawk, a vengtute thinlung kha an lo ngaihthah tlat a, an mualpho a ni. “Thil dang ber aiin i thinlung veng tha rawh, Nunna lo chhuahna a ni si a” (Thufingte 4:23).
Bible-ah hian ‘thinlung’ tih hi hmun 963-ah a awm e, an ti a. Mihring rilru, phurna, tumna leh duhna, mihring chhungril sawi nan an hmang ber. A chhe lamah chuan – sak, bum hmang, kha, sual, chapo, luhlul, tihmawh, phunchiar, beidawng, hlauthawng, lungngai, chau, rilru na, uai thla, kau rau, haider, itna sual, rilru herh, a, thinur, itsik, hmanhmawh, chaldelh, verther, chi ai, bum hmang, hel hmang, phhuba lak hmang, induh, mi tihnat duh, milem biak hmang, uire hmang, ngaidam thei lo ti te in mihring thinlung awmdan a sawi a. A tha lamah ve thung chuan – hlim, lawm, rinawm, mitvar, fing, dik, midang tana inhawng, inphal, Pathian lam hawi, mi ngil, Pathian faka zai, chak, dik leh fel, sawiselbo, thianghlim, inchhir, kehsawm, nghet, him, thuawih, zalen, khur, zahawm, fuih tih te in a dah bawk.
Mihring chuan pawn lam lan dan enin mi kan teh thin. A thawmhnaw, a dinhmun, lehkha zir san lam, a degree neih zat, a pian, a hmel, a nungchang, a hmel, a sam khuih dan, a car neih te atangin ngaihdan kan siam thin. Chutiang mi chu mi awhawm leh hlawhtling niin kan ngai a, celebrity phei chu kan ngaihsang tawp hlawm anih hi. Samuela khan Jesaia fate zinga pakhat hriak thih tura Pathianin a tirh khan ani chuan mihringte en dan angin pawnlam lan dan a en ve lova, thinlung lam a en zawk thin tih a hrilh kha (I Sam 16:7). Kan Biak In leh Kohhranah te hian Pathianin a ngaih pawimawh zawk thinlung lam en lova, pawn lam lan dan en hian hma kan lo la thui lutuk palh ang em le? Kan thinlung dik loh avang hian Pathian pawi kan sawi hi a va hlauhawm em!
Hmun pakhatah chuan zaipawl an awm a, an zaithiam hlawm viau mai a. A thente erawh chu zai ve thei satliah mai an ni. Pakhat phei chu a aw a lai lehnghal. Mi thenkhatte phei chuan zaipawlah tel lo law law se a mawi zawk ang, an ti hial a. Nimahsela, Pathian chuan, “ E, a aw lai avang khan ka buai reng reng lo, a thinlung tak takin min fak a, ka lawm asin. Min tibuaitu zawk chu zaipawl member thenkhat, aw tha leh mawi, an thiam zia midangte hriat atana tih lan duh tlat ho khu an ni zawk. Keimah chibai min bukna ni lovin an thiam zia an ‘show off’ duh tlat khu ka ei lo, a ti e, an ti. “..Thinlunga thurukte hi a hrereng si a” (Sam 44:21b).
Kan Kohhran hi Lal Isua’n thinlung lan theihna camera ina thla la ta sela, kan en ngam ang le? Pawn lam lan dan ni lovin thinlung lam en chungin midangte hi i thlir thin ang u.