ENGVANGIN NGE SETANA HI PATHIANIN A LA ZUAH RENG?
Lucifera a hel a, van ata paihthlak anih veleh khan engvangin nge Pathian khan tiboral nghal lova a zuah rih tlat le? tih hi thil zawh awm tak a ni. Duh nise leilawtah a paihthla nghal hmiah ang a, A thil siamte chu sual tel lovin an awm mai tur a ni a. Pathianin Setana kha a tiboral nghal lo anih chuan chhan tha tak, keini hriatthiam phak loh engemaw tak a awm ngei tur a ni. Pathian nihna te, finna leh rilru te hi keini hriatthiam vek phak rual a ni lova, a them tlemte kan hriat ve chhun atanga han chhut hian chhan tha tak neiin Setana kha a tiboral nghal mai lo tih chu a chiang phawt mai.
A chhan pakhat chu Pathianin mihring nun hi nuam tak leh harsatna tel lovin siam ta sela, kan rilru chu damchhung tawite chauh ngaihtuahin, chatuan ngaihtuah thleng pha lovin kan awm ang a, Pathianin mihringte a siam chhan ber chu kan hmaih dawn a lo ni ang. Tuilet hma khan mihring chu kum 900 chuang te an dam a, tuilet hnu atang khan kum 120 thleng dam turin Pathianin ti tawi anih kha (Gen 6:3b). Pathianin mihring a siam khan Amah anga a siam a ni a, a thlarau pawh chatuan daih tura A siam a ni. He leiah hian reilote chauh, kum 120 dam pel lo tura Pathianin a tihte kan ni avangin min siam chhan ang taka Ama lam kan thinlungin a hawi theihna turin he leia kan damchhung hian sualna avanga buaina leh harsatna te, manganna leh tuarna te, lungngaihna leh tahna te kan tuar hi Pathianin tha a tiin a phal thin zawk a lo ni. Pathian engkimtithei chuan A duh chuan sual leh a hnathawh hmang hian a inchawimawi thei a, A chatuan remruat tih hlawhtlinna tura Ama Fapa ngei pawh zuah lo khan, min siam chhan ang hlawhtlinna anih dawn phawt chuan sual hnathawh avanga kan nat pawi a ti hauh lo vang. Hei hi Bible thu ken pawimawh tak a ni. Khawvel sualna pung mek – kawng hrang hranga min tina mektute hi – kan thinlungin chatuan ram min thlir tirtu, A lam kan hawina hmanrua anih theih nan Pathianin Setana leh a hnathawhte hi a la tiboral rih lo chauh zawk a ni.
Entirna pakhat sawi ta ila – mi pakhat sumdawng a awm a, kohhrana in hmang leh mi tangkai tak thin a ni. A sumdawnna a lo thang zel a, a lo hlawk ta hle a, Pathian a thlahthlam tial tial ta a. A rawngbawlpuite chuan Pathian lam hawi leh turin sawm thin mahse a hna avang chuan hun nei theiin a inhre tawh lo a ni. Ni khat chu vanduaithlak takin a fapa naupang ber chu rul lian tak main a chuk ta hlauh mai a, damdawiin an pan nghal a, doctor thiam te’n theihtawp chhuaha an enkawl chung pawhin a dinhmun chu a hniam hret hret ta tlat mai a. Sumdawngpa chu a mangang em em mai a, damdawiinah chuan an kohhran upa pakhat tawngtai turin a koh tir ta a. An upa chu heti hian a tawngtai ta a ni. “Lalpa, kum ruk chhung zet he chhungkua hi i lam hawi tura kan sawm hlawhchham tawh hnu-ah he rul hian a rawn tihlawhtling a, he naupang chuk tura rul lian tak i rawn tirh avangin lawmthu ka hrilh a che. Tunah chuan an zir tur an zir chhuak tawh a, he naupang hi khawngaihtakin ti dam la, nangmah hriat chhuah tirtu tur rul dang mamawh lo turin tanpuiin veng ang che” tiin.
Pathian hian A duh chuan thil tha lo nia an hriat te hi mi ben harh nan A hmang duh thin a. Pathianin mihringte hi Amah tel lova famkim thei lo vin min siam a, chu mi hre chhuak lo thei lo tur chuan kan nunah hian sual hnathawh hmangin hling min pe thin a ni. Setana chuan inti fing takin sual hmangin mihring chu Pathian lakah a tihrang emaw a inti a. Pathian chuan fing takin Setana hmanrua – sual leh a hnathawh ngei hmangin mihring te suala tlu tawh te chu A lam hawi tirna hmanruaah A hmang hlauh thin zawk a ni. HALLELUIA, AMEN!