MITE HMAA TAN
Chutichuan mite hmaa mi tan apiang, ka Pa vana mi hmaah ka tan ve ang. Nimahsela, tu pawh mite hmaa mi phat apiang, ka Pa vana mi hmaah ka phat ve ang. Mathaia 10:32-33
Puithiam lalte leh Juda hotuten Isua an man a, tihhlum an tum lai khan, zirtirte zinga huaisen ber Petera pawhin vawi thum ngawt a phat kha a ni a. Mahse, Penticost hnuah chuan a phat ta lo hle. “Keini zawngin kan hmuh leh kan hriatte hi sawi lovin kan awm thei lo” a ti ta a ni.
Mahse, mite hmaa Isua tantu nih hi a la hlauhawm reng a, kan ram than dan han en hian a hlauhawm tulh tulh mai thei bawk. Silai hmaah te, tihduhdahna hmaah te i tan ngam ang em? Hei ai daiha Isua tantu nih harsatna hmun a awm.
Isua tantu nih hi sumdawnna hmunah te, politics-ah te, office hna thawhna hmunah te hian a hlawk lo fo. Lar lohna te, ngainat hlawh lohna te, huat hlawhte thengin Isua tantu chuan a khûm a ngaih chang a awm. Chânna a nih chang a awm ngei ang.
Mahse, Lalpa chuan amah tantu a tan ve hun, a tan nih hlawk em em hun, amah phattu nih a hlauhawm em em hun a lo thleng ngei dawn. “Mite hmaa mi phat apiang chu ka Pa vana mi hmaah ka phat ve ang” a tih hi ngaihthah chi a ni lo. A thu a sût dawn lo.
Kristian hlepruk hmang, dikna tlachham chu a piangthar lo va, Isua zuitu a ni lo.