PATHIAN MIT ATANGIN INTHLIR THIN RAWH
Vanlalnghaka Hnamte
Thuhriltu 12:14 “Pathian chuan kan thiltih apiang, a chhia emaw, a tha emaw, a rûka kan tih chen hian a rêl dâwn a ni.”
Sual zinga Pathian duh loh zawng ni si kan lo ngaihthah em em thin, Pathian nena kan inzawmna ti chat thin tlem han thai lang ila.
Midang mawhphurhtirna/ mahni dik ber intihna: He thil hi Eden huana kan hmuh kha a ni. Mihringten a Pathian hnena thiam kan chan lohna bul thut kha a ni. Evi leh Adama khan Davida ang khan (II Samuel 12:13) an sual kha pawmin khawngaih dil ta se. Pathian khawngaihna ngah tak, min an thiltih sual an inlamleta ngaidam ching tak (Jona 4:2) Pathian kha a ni si a. An tawpna a dang mai lawng maw tih hi ngaihtuah tham tak a ni. Anih leh Evi leh Adama khan engtin nge an tih tak kha. Adama chuan Evi a puh, Pathian hi a kawk tel a ni; a puhna ah hian, ‘i hmeichhe min pek khan’ an ti deuh sak a nih kha, chuan Evi’n rul an puh ve leh chhawng a nih kha. He mihring zia (character) mahni sual khuh bo a, midangte lo tihsual va sawi lan vat thin nungchang kha. Keini ringtute chuan Kraws-a Isua nun dan tur min zirtir ang mahni sual ni lo, a hmangaihte sual avanga tuarna nungchang hmang khan kan thlak ve a ngai a ni. Midangte sual kan sawi lan avang hian kan sual hi ngaihdam a ni si lo a ni. He nungchang mahni inhumhim tum reng hi Isua nungchanga kan thlak a tul tawh hle a ni. Zoram ringtute nuna kan thanmawhbawk a ni.
Dawt/thudik lo/ thudik tluantling lo/dawt var: Dawt hi ilo ngaihtuah ve thin ngai em? Isuan keimah hi thutak ka ni a tihna chhan te hi kan ngaihtuah ngai em. Johana 8:44 kan en chuan “ …. dawthei a ni si a, dawt pa pawh a ni.(Father of lies)” a lo in ti kulh mai a ni. Diabola hi dawt hmuchhuaktu a lo ni reng mai a ni. Keini chu kan tawng duh lutuk te hian dawt kan telh zeuh a, thudik pawh hi engemaw kan belh zeuh a, kan nun nawm nan leh thil lo awlsam zawk nante dawt kan han belh zeuh mai thin. A nihna tak zawkah chuan dawt hi kan haw tur a ni. Fiamthu a ni emaw, in chhaih fiamna a ni emaw, dawt hi chu a sawi loh theih hram chuan sawi loh tur a ni. Miin Lal Isua zui a lo tum hian thutak hi kan zui a ni tih hriat tel a ngai a ni. Zoram ringtute nuna kan thanmawhbawk lian tak ni bawk.
Ngaihtuahlohna/thatchhiatna: Mizoramah hian tihduhdahnate, Kristianna avanga engemaw tawn tur awm loh vang nge, Isua hi kan ngaihtuah vak lo a ni. Isua zui kan nih pawh hi kan in hre mang hlawm lo a ni. Tu hi nge ka biak tih pawh hi kan ngaihtuah chiang peih lo thin ni ber hian ka hre thin. Keimahni rin dan, kan lo hriat thawi ve dante, hla thu a thiam min chantir thei deuhte emaw, Bible changa thiam min chantir thei deuhte hian Isua zui kan tum thin ni hian ka hre thin.
Khing kan sawi bakte pawh tam tak a awm, entirnan chapona etc. Sam ziaktu chuan “Mahni dik lohna tu nge hre thei? Sual inthup lakah te min tifihlîm ang che.” a lo ti a ni. Mahni diklohna hi kan hmu thei lo a ni. Chuvang chuan a ni Pathian hnenah hian tunge ka nih? Engvanga chhandam ngai nge ka nih? tih hi kan zawh fo a ngaihna chhan. Khing a chunga kan sawi takte pawh khi Pathian mit atang lo chuan kan tih (practice) lai kan hre thei thin lo a ni.
Pathian mit atanga midangte sual thlir hi bansan ila, mahni ngei hi i inthlir zawk ang u. Chu chuan Isua chanchin leh Pathian hmangaihna nasat zia min hmuh thar tir leh thin dawn a ni. Midangte sual kan lo hmu anih pawn Pathian rawn chung zelin, Pathian min ruahman puina nen hruai chhuah i tum zawk ang u.