CHRISTMAS KAN KOHHRANAH NGEI AW
Pu K.Zodinsanga
“Tin, arsi chu an hmuhin an hlim nasa ta em em a. Tin, inchhung an va lut a, a nu Mari hnena naute chu an hmu a, an bawkkhupa chibai an buk a:”(Matthaia 10:11-12)
Lal Isua a lo pian khan amah chibai buktu mi chi thum(3) Bible ah kan hmu a. Chungte chu Berampute, Mi fingte leh Lal Heroda-te an ni. Brampute leh Mifingte chu Vantirhkoh leh Arsi hmanga hriattir an ni a. An tum ang ngeiin Lal Isua an hmu a chibai an buk thu kan hmu a ni. Hlim takin an kir leh thu kan hmu bawk a ni. Amaherawhchu, Heroda erawh chuan Lal Isua a hmu ve lova, a hmaah chibai bukin a kun ve lova, ral atanga Lal Isua a zawn avangin a hmu lova a chibai bukna pawh a rapthlakin, chhiatna nasa tak a lo thlen phah thu Bible ah kan hmu a ni.
Pathian khawngaihna kan dawng a, December thla kan lo chuang kai leh ta reng mai. Christmas lo thleng tur atan kan inbuatsaih leh tan ta mup mup mai a. Mimal, chhungkua leh Kohhrante pawh theihtawpin he hun lo thleng tur atan kan inbuatsaiha, thapui kan thawh a. Sum leh pai te sengin kan in hmang leh mek a ni. Mifingte leh Berampu ten an thil neih hlu tak tak leh an hun hlu tak mai te pe in, engkim kalsana Lal thar chibai buk tura an kal ang khan. keini pawh he nausen Isua lo piang chibai buk tuma kan inbuatsaihna ah hian, kan theih tawk a tha ber hi Lal Isua hnenah kan hlan ve tur a ni reng a ni.
Kohran hote pawhin theih tawpin he hunpui hi kan ur a. Kawng hrang hrangin hma kan la thin a, Kohhran mipui ten hlim taka he hun hi kan hman theihna turin kan hruaituten nasa takin tha leh rilru an seng a, Programme tha tak tak an ruahman a. Kohhran mipuiten hlim taka hun an hman theih nan theihtawp an chhuah thin a ni. Chutih laiin keini Thalai (TKP) te pawhin Biak In leh a vel te chei mawiin theih tawp kan chhuah thin a. Kohhran mipuite hlim tak leh phur taka Pathian an fakna tur In mawi taka kan lo chei a, kan lo buatsaih thin hi, a hlu hle mai. Hengte hi a tha in kan tih tur reng a ni. Heng te hi kan inbuatsaih dan tur leh kan tihtur pawh a ni reng a ni.
He hun pui, Christmas lo thleng tur hi theih tawpin kan hmuak a kan lo inbuatsaih thin a. Mahse, he Christmas hian a tum tak mai hi kan thelh fo thin a ni. Sum leh Pai hun tam tak seng tho si hian Thlarau lamah hlawkna dawng lovin vawi tam tak kan lo hmang tawh thin em le? Thalaite pawhin kan nghakhlel a, nasa takin kan urlawk thin a ni. Mahse, mihringin kan duhdan in programme kan lo ruahman a, Lal Isua tel ve lohna programme hi kan lo duang in kan hmang fo thin ang. Chu chuan tisa leh thlarau lamah nasa takin a tha lo zawngin nghawng a nei a, kan nun kawng diklo kan zawh tanna hun ah te a lo chang fo tawh thin a ni. He hun hlu tak mai hi a diklo zawnga nun kan hman nasat ber na hmunah te a lo chang fo thin a ni.
Lal Isua chibai kan bukna tur atan hian kan tih tur dik tak leh kan awm dan tur dik tak, tisa leh thlarau lama hlawkna kan dawnna tur hi eng tin nge kan hriat ang le? Mifingte, Lal Isua hnen thleng tur khan Arsi Pathianin a pe a ni. Chutiang chiah chuan keini pawh hi Lal Isua chibai kan bukna tur diktak min kawh hmuh turin KOHHRAN (Arsi) hi kan nei a ni. Kohhran huang chhungah tel ila, chumi hmun attang chuan Lal Isua chibai kan buk anga. He Christmas-in a ken tel malsawmna tam tak kan hmu dawn a ni. Tunlai khawvel changkang zelah Kohhran pawn lamah hun kan hmang tam tial tial a, thil tha ve tak tak midangte tanpuina kawngahte kan pen thin a. Hengte hi a tha hle mai, Christmas-in a ken tel pawh a ni. Amaherawhchu, thil tha ve tho tam tak hi chuan Lal Isua ke bul min hruai thleng zo tak tak lo fo a ni. Pathian mite awmna hmun leh zingah hian Lal Isua lo piang hi, kan lawm a him ber a ni.
Zaikhawm ang aw… Mizo Kohhran hote he hunpui kan hman hian hmun lai lum leh pawimawh ber changtu pakhat chu Kohhran zaikhawm hi a ni. Christmas kan hmang zova, zawhna kan in zawh fo thin chu in ruai a tui em tih ni lovin, in zaikhawm in hlim em tih hi kan in zawh deuh ngei ngei thin a ni. Pathian faka hlim taka kan zai chuan a bak ruai leh thildang hi chu a rawn hring chho mai zel a ni. Zaikhawmna hmunah hian thalaite kan tel tha tawklo thin a. Hun engemaw atang khan Kohhrante lengkhawm zai lamah hma kan sawn nasa em em mai a. Zaikhawmte pawh a nuam thin hle mai, a chhan pakhat chu thalaiten kan hlut telh telh vang te pawh a ni pakhat a ni. Kuminah Kohhranin zaikhawm a buatsaih leh anga thalaite tam thei ang ber zaikhawm teh ang. Thalaite tamna hmun apiang hi a nuam thin a. Khawhar taka nu leh pa te an awm lohna turin khawnge kumin chu thalaite zaikhawmna leh a velah a tam thei ang ber i kal thin teh ang u.
Kohhran mipuite nuam ti taka Biak In leh a vela an awm theih nan, Biak In leh a velte mawi takin kan chei a, a cheimawitu ber thalaite ber hi hmuh tur kan awm leh si loh chuan a nuam lovang. Chuvangin, a tam thei ang ber Kohhranah thalaiten hun hmang ila Kohhran boruak a nuam anga keimahni ngei pawh kan hlim dawn a ni.
Tunlai khawvelah hlimna dang thil a tam em em tawh a. Thil tha tak anga lang Kohhran hote zing atanga min kuai peng thei a tam em em a, heng hi kan thlarau leh taksa tana hmun him lo a min hruaitu a nih fo avangin tel tam loh hi a pawi lo. Kan taksa leh thlarau tana malsawmna kan dawnna hmun pawimawh ber mai chu Kohhran hote zinga tal tam hi a ni. He hmunah hian Lal Isua a awm a, Berampute; Pathian chawimawi leh fak chung zela an kir leh thu kan hmuh ang khan kan taksa leh thlarau tana chaw tha leh himna hmun Kohhranah kumin Christmas chu i hmang ang u.