MIDANGTE TANA MALSAWMNA
“Lalpa in Pathianin malsawmna a dawntir che u ang zelin mi tinin an theih ang tawk an pe tur a ni.” Deuteronomy 16:17
Pathianin mihringte min siam chhan leh min din chhan pawimawh tak pakhat chu midangte tana malsawmna nih hi a ni a. Chu nun chu Amah ngei khan a taka rawn nunpuiin a lantir a. Mihringte angin tlawm takin a rawn piang a, he khawvela rawng a bawl chhung zawngin midangte tan a hun a hmang a. A tawpah Kraws-ah kan sualte tlan nan a thi leh bawk a. Chutiang chiah chuan Amah zuitute hian kan ti ve tur a ni.
Pathian hi kan tan a tha em em a, Amah ringtute hi malsawmna tam takin min vur thin a. Chu malsawmna kan dawn chu a mamawhte hnena kan pek chhuah ve leh thin hi kan tih tur a ni. Mihringin kan thlakhlelh em em chu malsawmna pe chhuaktu nih ai chuan a dawngtu nih hi a ni awm e. Kan tawngtaina Pathian hnena kan thlen tam ber pawh hi han chhut chiang ila mamawh dilna hi kan thlen tam ber theuhin a rinawm. Amaherawhchu, Pathianin min din chhan erawh chu malsawmna dawngtu nih ai chuan midangte tana malsawmna thlentu nih hi a ni. Engvangin nge Pathian hian malsawmna tam taka min vur thin? Kan lo neih belha, kan lo hausak thur thur nan em ni? Chutiang atan chuan Pathian hian malsawmna min vur lo va, midang tana luang chhuak thei turin malsawmna min vur thin zawk a lo ni.
Chutih rual erawh chuan ka neih em vang emaw, kan hausak avang emaw, kan neih chuangliam atang chauha midangte tana luang chhuak tur kan ni lo tih hriat a tha awm e. Pathianin a fapa Isua Krista min chhandam tura a rawn tirh khan a fapa tam tak zinga pakhat a rawn tir lo. A fapa mal neih chhun min chhandam turin a rawn tir a ni. Chumi awmzia chu a thil neih hlu ber chu mihring suala tlu tawhte min chhandam nan a rawn pe tihna a nih chu. Kan society-ah hian ngaihdan nghet deuh mahse tha lo deuh kan neih chu, midangte tanpuina hna hi mi hausa deuhte tih turah kan dah mai zel hi a ni. Tlema kan lo retheih deuh vang emaw kan khawsakna tur khawp chauh kan neih tawk tawk avang chauha midang tanpui thei lo tura kan inngaihna hi paih bo a hun tawh hle a ni. Bible-ah kan neih vang chauha midangte tana luang chhuak tur kan ni tih inzirtirna hi a awm reng reng lo va. Nei lo chung chung pawha luang chhuak tura zirtirna pek kan ni zawk.
Hemi kawngah hian kan pi leh pute nun atang khan zir tur kan lo ngah hle mai. Hmanlai khan tumah mi neinung leh mi hausa fal em em an awm lova an nun dan a mawlmawng em em bawk a. Chuti chung chuan an theih ang tawkin midangte tan malsawmna an ni thin. Chawhmehte an insuah a, miin sa kap se pumbilh mai lovin an inhleh diat diat thin bawk a. Hmeithai thawkmawh deuhte an lo awm pawhin hlo thlawh buhseng engkimah an in pui mai zel thin a ni. Anni nun atang khan zir tur kan lo ngah hle mai. Kristian kan nih hnu hian kan duham ta sawt emaw tih theih tur a ni zawk ta mah. Mahni ram mai duhtawk lova, thenawmte ram nek rana in sak ching te kan tam ta. Midangte chanai eiruk leh laksak maite pawh kan hreh ta lo. Heng zawng zawng hi Isua zirtirna nen a inkalh tlat a, ringtu tan chuan kan tih ve tur a ni lo tih kan hriat a tha.
Pathianin Abrahama kha midangte tana malsawmna ni tura a koh ang bawkin keini pawh chutiang ti ve tur chuan min ko va. A neih hlu ber a fapa Isua Krista kan tana a hlan ang khan Abrahama hnenah a neih hlu ber Isaka hlan turin a phut a. Chutiang bawkin keini pawh a chang chuan nei lo chung chung pawhin kan neih chhun angte kan pek angaih a changte pawh a awm thin ang. Mahse chutih hunah chuan engmah nei loa kan awm hi kan Pathian hian a phal dawn lo a ni. Ama tana kan thil phalzia ang zelin malsawmna tam taka min vur let hi a tiam tlat a ni. Kan hmuh theih malsawmna mai bakah kan hmuh theih loh malsawmna hlimna te, inremna te, hriselna tha te leh thil dang tam takin malsawmna hi min vur dawn a ni.
Pathian hian midangte tana malswmna ni tur hian mi hausa bik te emaw a ko lo va. Amah ringtu tawh phawt chu min ko vek a ni. Kan neih tam emaw kan neih tlem lam a ni lo va, kan neih ang ang a la pawm zui cheu bawk. Bituk a nei a nei lova, chuta karah kan pek apiangin malsawmna a let tam taka vur let thin kan la ni zui bawk. Midangte tana malsawmna i nih khan nangmahah Pathian lawmzawng i ti a ni tih inhriatna i nei bawk ang a, nun hlimna tam tak i neih phah bawk ang. Kan phak tawk leh kan tlin tawk theuhin midangte tan malsawmna nih i tum ang u.