TKP LEH ENVIRONMENT HUMHALH
K. Lalrinsanga
A hmasain kan thupui ‘TKP leh Environment Humhalh’ chungchang thu veiawm tak ziak thei a ka awm hi ka lawm hle mai. Pathianin kan kova a dah pawimawh tak a nih avangin i han luhchilh rawih teh ang. ‘TKP leh Environment Humhalh’ chu engnge a nih!? TKP chu din chhan leh tum fel tak nei a ni a, kan hriat tlanglawn ni mahse kan thupui tifiah turin Thalai Kristian Pawl dinchhan chauh tarlang ta ila, (1) Kristian tha tak ni tura buatsaih, (2) Krista leh Kohhran tana thawk tur a buatsaih; (3) Khawtlang tana mi tangkai ni tura fuih leh kaihhruai; (4) Pathian ramzau nan a inhman tir; tih te hi a ni. Anih leh Environment chu eng nge ni ve ta le? “Leilung leh a chhunga thil awm zawng zawng (thil nung zawng zawng leh nunna neilo) chhan leh vang awma kan inhual tawnna hi Environment chu a ni tiin mithiamte chuan an hrilhfiah.
TKP TEN ENVIRONMENT KAN HUMHALH TURTE :-
• NUNNA NEI :- (a) Mihring : Pathian thilsiam ropui ber mihringte hi inzahtawna leilung luahkhat tur kan ni. (b) Rannung: Siamtu’n a duan anga mihringte ei leh thuam atan leh inthlahpung tura Pathian siam an ni. (c) Ramngaw leh thlai: Thing leh mau hengte hi kan bul velah hmuh theih leh khawih theihin awm lo ta se rilru hrisel takin kan awm thei lo.
• NUNNA NEILO:- (a) Leilung- Leilung hi amah ngawt a awm a ni lova luah khata nunna neite tana Pathian in a buatsaih a ni. (b) Tui- Mihringte leh nunna neite tana pawimawh em em a ni a, tui awmlo ta se nunna a awm theilo ti hialin mi thiam te chuan an sawi. (c) Boruak- Thil tinreng te tana awm theihna te, lan theihnate nana nunna neite tana Pathian siam a ni.
• THIL NUNG TEN A ENVIRONMENT KAN SIAM BELH:- Industry, Pollution, IT, Drugs, Chemical thil leh bungrua kan thehthangna leh thlakthlengna hmun etc. a tam thei awm e.
Kan thupui TKP leh Environment humhalh chu Pathian thuin engtin nge a sawi. TKP dinchhan point pali (4) te kha hre reng chungin Pathian thu in luhchilh teh ang. Kan thu-rin Bible-a thu awm hmasa ber Genesis bu-ah chuan atir atanga Pathian thilsiam chi hrang hrang van, boruak, tui leh lei a awm turte thuin a siam a, chumi enkawl tur chuan mihring hmasa ber Adama a siam a ni. A thil siam te chu inhual tawnin a dah a, chung enkawl a vawng him turin mihringte a dah bawk. Bible hmun tam takah Pathian ram chungchang leh neitu, enkawltu, venghimtu, mawhphurtu chi hrang hrang ziak a awm a (heng Bible changte hi chhiar thei ila) Gen 2:15, Sam 50:10-12, Sam 24 :1, Mat 6:33, Mat 12:50. Heng thuah te hian Pathian ram chanchin leh enkawlna hnathawk tur atana mihringte min duhna chiang takin tarlan a ni. Pathian ram enkawlpui turin Pathian duh zawng tihna te amah chawimawina, a rorelna ang a leilung hi luah ho tur kan ni.
India danpui Fundamental Right Article 51A(g) in a sawi angin “ India khua leh tui zawng zawngte chuan a chhunga ramngaw te, lui te, dil te, ramsa te a humhalh tur a ni” a ti a. TKP leh Environment humhalh hi huam zau tak a nih avang erawh chuan sawikim sen pawh a harsa a ni.
TKP ten Environment kan humhalh lova kan tawrh theih tam tak a awmin kan tuar mek bawk a, hmasawnna in a kentel mek ni si, leimin thei awm leh awm lo ngaihtuah lova in sak leh industry kan din te, duhna lai leh hmun kan neih remchang apianga ban kan phun ngawt mai te, lui tui mihringte leh rannungin kan mamawh em em kan bul leh a chhehvel kan vawn thianghlim loh avanga luisa thleng maiin an tawrhna te, thing leh mau kan tih chereu avanga lui tui hnar a kang chahna te, bawlhhlawh kan thehthang dan te, nungchate hun bi nei lek lova kan pelh duhdan atangte hian kan bul leh a chhehvel a thil awm kan ti chereu nasain Pathian thuin a rawngbawlna atan min pek hi kan thelh thei hle awm e.
Awle, thusawi ropui nia an chhal thin Red Indian Chief-in a sawi pakhat chu “ He kan ram hi in lo lei anih pawhin nausenin a nu lungphu ri a a ngaina ang hian ka mite hian he kan ram leilung, lui leh tlang, phul awmdan te hi an ngai hlu a, a tira a awmdan kha hre reng ula min zahsak rawh u” a ti e, an ti. TKP te pawhin ‘I duhzawng vana an tih ang in leia mi’n ti rawh se’ tih tawngtaina neitu kan nih angin kan chheh vela awmte tan Chanchin Tha thlentu, ‘Environmentalist’ nih i tum zel ang u. Ka lawm e.