ISUA HNENAH
Lalthanliana
Bible : Marka 5 : 6 – 8
Hla tak atangin Isua chu a hmu a, a lam panin a tlan a, kunin chibai a buk a. Aw ring takin a au va, “Isu chungnung bera Pathian Fapa , kan chhungthuah rawn inrawlh i tum em elo? Mi nghaisa lul lo turin Pathian hmingin ka ngen a che” a ti a. Ani lah chuan “Thlarau bawlhhlawhpa a chhunga ata kha lo chhuak rawh” a lo ti si a. He thu tho hi Mathaia 8 ; 28 – 34 leh Luka 8 : 26- 39-ah kan hmu a. Lal Isua leh ramhuai man inbiakna a ni.
Kan chang chhiar bak kan chhiar thlak chuan Lal Isuan ramhuai man hi hming a zawh thu kan hmu a, he ramhuai man hian ti hian a chhang a, SANGRUKA ( Mk 5:9) tiin ( Hei hi lehlin thar a ni). Lehlin hlui zawkah chuan NUAIA tih a ni a. Tawng dang leh ziak dangah chuan LEGION tih a ni a. Kan bible-a sawifiahnaah pawh Rom Sipai pawl khat zat tiin a dah. Sawifiahna dang kan en pawhin Rom hunlaia an sipai rual 3000-6000 vel sawina angin an dah.
He ramhuai man hian Legion-a tiin a inchhal a, a kawchhunga ramhuai lut zat a sawina nge ni ang a, kha tih hunlaia sipai chak leh rawva tak, Rom sipai anga intehkhinin a chakna tarlan nan a hmang mai zawk em ni ang? Isua bula a inhrosakna pawh a ni thei hial ang. Thlarau sualin an tam hnehna aiin a mantu chakna leh theihna san zia sawina pawh a ni theiin a rinawm. Sualin mihring min hneh theih zia pawh a chiang awm e. Mihring hi sual bawiha kan tluk tawh chuan kan chak lohna aiin kan chakna lai kan chhuang a. Mawi taka lantir kan tum leh mai thin. Kohhran leh Lal Isua hmaah meuh pawh nihna ropui paipawn tunin kan lut thin a nih hi maw…
Lal Isua, engkim hriaa hmu tlangtu kha chuan mi pakhat a nihna angin a bia a. He ramhuai man hian a kaw chhunga awm thlarau sualte lam telin kan chhungthuah rawn inrawlh i tum em elo? tiin kan tih a hmang thung a ni. Sualin kan nun a tihbuai hian keimahni nihna baka lan kan tum a, kan chapovin kan theihna bak kan chhuang a, kan intiropui ta thin a ni.
Bung 5: 5-na Kan en chuan, “a chhun a zanin thlanahte leh tlangahte chuan a au a au thin a” tiin a dah a. Heta au hi greek tawngah chuan Krazon tiin a dah a. Krazon chu tap, nasa taka tap sawina a ni. English Bible hrang hrang kan en pawhin Cry (NIV & KJV) tiin an dah mai a.
He pa, thlarausualin a tihbuai hi taksa lamah harsatna a tawk nasa tih kan hmu a, mangang vawrtawpin a tap fo thin a ni. Au satliah chu a ni lo. Amah insawisain lung hriam hmangin a taksa te a tipem a, khung beha che thei lova kawl buntir an tum pawhin a tichhe leh vek mai thin. Nun hrehawm tak, lainatawm takin hun a hmang fo thin a ni. Pukah te chengin hmangaihtute hmangaihna pawh a hlawh thei lo va. Mi dangin theihtawp chhuahin tanpui dawn mahse an tanpuina pawh a dawng thei lo.
He thu ka ngaihtuah laia ka rilrua lo awm chu kan thalaite dinhmun hi a ni. Kan ramah hian thlarau sual/ ramhuaiin a tihbuai ang mai hi kan tam em em a. Sualin a hren beh, ruihhlo bawiha tang, harsatna khur thuk taka tang tamtak kan awm a ni. Ram pum thlirin kan him lo va, khua leh veng kan him e ti thei khua kan tlem hle ang. TKP member ngeiah pawh he pa, ramhuai za rualin a man ang maia ruihlo sualin an man, hrenbeh tlat hi kan tam a ni. Hmangaihtute hmangaihna pawh hlawh zo lova vak rawlai mai mai, Nu leh pain mittui tlaa Jail puk thima kan nawr liam leh Camping Centre-a kan nawr liam hi kan va tam em.
Khawtlang leh thenawmte hmangaihna pawh hlawh zo tawh lo, tih khai ang maia hlauhawm. Biak that ngam loh khawpa nun tleu tawh pawh tamtak kan awm a. Kan ina chuangkai tura kan duh miah loh thalai hi kan ram hian engzat tak awm ang maw.
Heng mite hian khawhar takin hun an hmang a, hmangaihtu pawh an duh ve ngei alawm. Hmangaihtu an hnar tlat zel a ni. Khawlai hi an tan zahawm a nih chang a tam a, kan thlanmual te chu an tan hmun him ni a. An tualchaina ber pakhat a ni ta. An taksa ngei chu nasa taka tichhiain an nunna an titawp mek a. A thisen a dawp a, pem nasa tak an insiam a ni. Legion-a anga harsatna tawk hi kan ram thalaiah tamtak kan awm a ni.
Legion-a chuan Lal Isua lo kal a hmuh khan a pan a, a nihna ang angina Isua hmaah a inlan a. A theihna leh chakna te chhuang ve bawk mah se chung zawng ai chuan DAM a duh a. Puk leh thlanmuala chen reng aiin chhungte bula chen a thlang zawk a ni. Damna kim chang tura ngaihtuahna fim tak nen Isua panna chang a hria kha a mak a. Ramhuai sang tamtak pawhin kan duhthlanna tak tak, chhia leh tha hriatna hi a tihbuai theih loh zia a lang chiang hle.
Ruihhlo bawihah kan pil thuk hle a ni thei a, ngawl veina nasa takin hla takah min awmtir pawh a ni thei e. Dam duhin beiseina in sang tamtak i lo din thei a, zahna leh natna tur tamtak i hmu pha ngei ang. Mahni in pawh pan ngam lo khawpin kan hla thei a. Chhungte hmuh aia bihruk thlangtu, hmangaihtu hmuh aia thlanmual reh taka hun hman duh zawk pawh kan ni tawh maithei e.
Isua Hnenah lo kal la, Ani’n a lo tidam ang che. A hnenah chauh damna a awm a ni. I dam loh, kan dam loh hi a hlau em a. Khawngaihna thuk a nih vangin a hnenah i tlu lut ang u. He sual bawih atang hian damna kim changin kan chhuak thei dawn a ni.
ISUA HNENAH KALIN TIDAMTU CHU I BEL ANG U.
Lalpan a thu malsawm rawh se. Amen