STK THUHLA
⇒ Pathianni leh (15.8.2021) hian Kohhran ten Pathian ram tana kan thilpek Envelope chhiar tura ruahman a ni a. Tun chawlhkar chhungin Bialtu ten hripui kan inkai darh loh nana an remhriat ang angin Envelope-te an rawn semin an rawn la khawm leh dawn a.1:30 PM-ah Biak In Hall-ah chhiar fel tum a ni ang.
⇒ Kan Kohhran member Pu J.Lalthanchama (49), h/o Saidingliani Sailo chuan Dt.1.8.2021 zanah khan ropuina ramah min lo hawsan ta a, a tuk Dt.2.8.2021-ah Serkawn thlanmualah vui liam a ni. A kalsan tak a chhungte leh Kohhrante Lalpan min thlamuanin min awmpui zel rawh se. Kan remchan ang zelin khawhar chhungte tan i tawngtai sak thin ang u.
⇒ Serkawn Tualchhung Kohhran chuan kan chhehvela Covid-19 avanga tuar nasa deuh khaw 3 – Pukpui, Mausen leh Dawn te hnenah tanpuina Rs. 30,000 theuh a pe a. A dawngtu vengte hi an rilru tak takin an lawmin a hriat a, an lawm thute Kohhran hriata lo puang tura min ngen angin kan han sawi a ni e. Pathian khawngaihna avangin keini khawtlang hian tun hnaiah Covid hripui kan tuar nep deuh a, mi dangte tanpui thei dinhmuna kan dingte hi Pathian malsawmna a nih hre rengin Pathian hnena lawm thu sawi chungin mamawhtute tana luang chhuak zel thei tur pawhin i inhlan zel ang u.
BCM THUHLA
⇒ Baptist Covid Care Centre, Ramzotlang, Serkawn tanpuina petu an awm ve zel a. Dt.6.8.2021 thlenga BCCC atana tanpuina sum dawn tawh chu a vaiin Rs. 10,53,500 a ni a, sum fai bakah bungrua leh khawl engemawzat an dawng tawh bawk a ni.
⇒ BCM Calendar-a tarlan ang chuan tunkar Dt.6.8.2021 (Zirtawpni) kha Kohhran Upa Exam hun tura ruat a ni a. Amaherawhchu, hrileng avangin kum dang angin ruahmanna kalpui theih a nih tak loh avangin Kohhran Upa Exam hun hi Dt.3.9.2021 (Zirtawpni) a neih turin sawn hlat a ni.
⇒ Director, Medical & Health Department hnen atanga report kan dawn danin July, 2021 chhungin Christian Hospital Serkawn-ah damlo 920 in entirin, an zinga 214 admit an ni a, nau piang 45 awmin mitthi 10 an nei bawk. July thla chhung hian Hospital Poor Patient Fund-ah cheng Rs. 48,020 hmuh a nih bakah Pu Lallianpuia Sailo Ramthar, Lunglei hnen atangin Hmawlhte suih thahnem tak dawngin, Pu Lalchhandama, Chaltlang, Aizawl hnen atangin ‘Flow transducer Cartridge & Oxygen washer’ an dawng bawk. July thla chhung hian Blood Bank lamah, TKP Kanan leh TKP Shalom Unit, Lunglei atangin thisen Unit 24 leh TKP Lunglawn East Unit atangin Unit 47, a vaiin Unit 71 an dawng bawk.