ISUA LEH SAMARI HMEICHHIA
– Rev Dr Clay Hallmark
Bible Chang: Johana 4:1-26
Kan Bible chang tarlan hi ‘Isua leh Samari hmeichhia’ tih thu kha a ni a, tuichhunchhuaha Isua leh Samari hmeichhe inbiakna chungchang kha a ni. Isua zirtirna hrang hrangah hian zir leh chhawn tur thil ropui tak tak a tam hle a, tun tumah chuan Samari hmeichhia a zirtirna atanga zir tur kan hmuh thenkhatte lo zirchiang ila.
I. Isua mizia kan hmu : Samari hmeichhia nen an inhmuhna hmun a lo thlen hian Lal Isua hi zinkawng thui tak zawh mek a ni. Mihring ve tho a ni a, a hah a, a tui a hal a. Tui intur zawngin chhun pachangah tuichhunchhuah hi a rawn pan a ni. Hetah hian Isua mizia pakhat a lang chhuak a. Tuichhunchhuahah chuan Samari hmeichhia amah chauhin tuichawi turin a lo kal a. Heng hunlai hian hmeichhia hian zing takah tui an chawi thin a. He Samari hmeichhia hi chu kan changthlana kan hmuh angin mite hmuhsit leh endawng, nun rahbi tleu tawh a ni a. Mite tuichawi tam laiin a chawi ve ngam lova, chhun pachangah a rawn chawi niin a lang. Kan changthlanin a sawi danin pasal panga lai then tawh a ni a. Heng hunlai hian hmeichhiain an pasalte then theihna dan an nei lova, mipa chuan a duh chuan a nupui a ma/then thei thung. Mipa panga laiin an then tawh hmeichhia hi eng ang mihring tak ni ang maw? He hmeichhe hnena Chanchin Tha thlen tur leh tuinung lui awmna hriattir turin a hun takah, Isuan tuichhunchhuah a lo thleng a, tuihal leh tawh lohna tur tuinung a pe a ni. Isua hian amah mamawhtute hnen a thleng thin. Daikil kawmkara nun tuihal khawharte leh ramhuai zawlte thlenga ngaihthah ngai lotu a ni. Keini pawh hian kan rawngbawlnaah hian a mamawhtute hnena Lal Isua Chanchin Tha thlen tura kan kal chhuah thin a ngai a. A mamawhtute thleng phaka rawng kan bawl a pawimawh em em a ni.
II. Isua ngaih pawimawh : Pakhatnaah chuan Isua hian mimal nun thleng phaka Chanchin Tha hril hi a ngai pawimawh hle tih a lang a. Johana 4:1-26 ah hian Isua Krista ngaih pawimawh kawng hnihin kan hmu a. Johana 4:9-ah chuan Isua chu Juda mi a ni a, Samari hmeichhia kha be ve tur pawh niin a lang lo. Samari hmeichhe tawngkam ngei atangin kan hmu a ni. Heti chung hian Isua khan Samari hmeichhe nuna tuihalna leh mamawhna kha a hmu chiang a, a hunlai mite tihdana mawi leh mawi lo pawh ngaihtuah lovin a hrilh ta mai a ni. Kohhran hian khawtlanga mualpho tawk te, zu leh ruihhlo bawia tang tawh te hnen thleng phak Chanchin Tha kan pechhuak tur a ni.
A pahnihnaah chuan Isua hian sual inhriatna nei turin min duh a. Johana 4:16-19-ah hian Isuan hmeichhia chu a pasal ko turin a tir a. Chutah chuan hmeichhia chuan Isua hmaah a nihna dik tak sawiin pasal panga nei tawh, hmeichhe tawmkailo tak a ni tih tarlanin a awm a. Isua chuan kan sualna leh fel lohnate hre turin min duh a. Fel leh thaa inhriatna atang hi chuan Isua felna hriatfiah theih a ni lo.
III. Krista thiltihtheihna : Johana 4: 13-15, 24-26-te en ila. A hmasa berah chuan Isua chuan i nuna hahna leh harsatna te a la bo thei. Samari hmeichhia hi mite endawng, mite hmuhsit a ni a, a nunah mamawh tam tak a nei a ni. Isua chuan hmeichhe hnenah duh thlan tur pahnih a pe a, ‘Tuichhunchhuaha tui’ leh ‘Chatuan nunna tui’, a duh zawk thlang tura a tih chuan Samari hmeichhia chuan duh thlan tur dik, Tuinung Lui chu a thlang a ni. Kan nitin nuna kan harsatna leh buainate chingfel a, kan mamawh te phuhru tur hian ‘He Tui’ tia Isuan a sawi, khawvel tuichhunchhuah tui, khawvel thilte ai hian Tuinung Isua i thlang zawk thin ang u. Isua hian kan nun a thlak danglam thei a. Samari hmeichhia hi mite hmuhsit a nih avangin a mite zingah pawh a tawng tam lovang a, pulpit-ah te phei chuan a ding hauh lovang. Biak Inah pawh inkhawm ngam tawh lo a nih a rinawm a, tui takngial pawh mite chawi laiin a chawi ve ngam lova ni. Mahse Tuinung Isua a tawh hnuah chuan a mite hnenah huaisen takin Isua chungchang a sawi ta a nih kha (Johana 4: 39-43). Sual bawia awm tawh, khawtlang leh Kohhran, mahni chhungkua meuh pawhin an thinhrik tawh te hi Isua nen kan intawh chuan Krista hian a thuhretu huaisen ni turin min duh a, hman tlak tawh loh chu min tuaihriam a, min hman leh a duh a ni.
IV. A tawp nan Sprite : Cold Drink siamtu lar tak Sprite Company hian an fakna pakhatah chuan “Hlimthla mai chu engahmah ngai lo la, tuihalna erawh chu ngaihthah hauh suh. I tuihal rehna zawng nghal rawh” tiin an cold drink siam chhuah chu an fak a. Sprite company hian mite hnenah an Sprite cold drink in chaka tuihalna neih tir an tum a ni.Pathian hian mi zawng zawng thinlungah tuihalna AMAH (Pathian) chauh vin a tihreh theih a dah a. He tuihal rehna thuruk hi tam takin kan hre lova, a thenin kan haider a, khawvel thilah tuihal rehna kan zawng thin. Samari hmeichhia khan Sukar khuaa tuichhunchhuah chauh lo, Jerusalem amite, Jeriko amite pawh chawiin in mahse, Lal Isua atanga chhuak Tui Nung chauh lo chuan a tuihal a tirehin a nun a thlakthleng sak lovang. Khawvel tuichhunchhuah hrang hrang, zu leh ruihhlo nawmchennaah te, sum leh pai duhamnaah te tuihal rehna kan zawng a, kan hmu si lo. Lalpaah chauh nun tuihal rehna hi i zawng ang u.
Samari hmeichhia anga mite hmuhsit leh endawng kan ni maithei, Nikodema anga mite zah kai leh zirtirtu mithiam pawh kan ni thei, Matthaia anga khawvel thila hausa leh hlawkna hmutu pawh kan ni thei. Eng mi pawh ni ila, Pathian mamawhna kan nei vek a, kan tuihalna hi Isua Krista chauhin a tih reh theih avangin Tuiah leh Thlarauvah kan pianthar a, Lalpa hnen kan pan nawn fo a pawimawh a ni.