KRISTA LEH KOHHRAN
(chhunzawmna)
K. Lalrindika
Thil 3 pawimawh tak tak ngaihtuah ila:-
(i) A thihna avanga chhandam mai kan ni.
(ii) Vanramah kan tan hmun min siam sak.
(iii) Hman tlakloh leh mahni pawha in humhim zo lo hi nitin a humhimna kan chang mai niloin min phatsan ngai lo a ni.
Heng zawng zawng ngun taka kan ngaihtuah hian Lal Isua chu nangma tan, midangte tan, Kohhran tan a lo inpe pumhlum a, chatuan nunna min lo siamsak a lo ni tih hi i hre thar leh ang u.
(5) Lal Isua amite tan hmun siamsaktu(Johana 14:1-4, Thessolonika 4:16-17):- Lal Isuan khenbeh a nih hma khan khenbeh a nih tur a hre lawk a, mihring a ni a, a mangang hle ang tih hi alang a. Chuti chung chuan Gethsemani huanah khan rilru hrehawm tak pu chung khan a zirtirte chu thlamuanna thu a pe a, mangang lo tur leh thlamuang taka awm turin a hrilh a, an tan hmun siama kal tur anih zawk thu ala sawi zawk a ni. Tunlai khawvelah pawh hian hruaitu tan hei tluk a hruaitu ropui leh rintlakna tawngkam hi a awm chuang lo. A zirtirte tan chuan hrehawm viau mahsela an zui Lal Isua kha a va chhuanawm dawn em! Khami vang ni maw, a hnua a zirtirte thih dan ropui tak tak hriat tur kan nei zui ta a ni. Thu hian awmzia a nei a, chumi awmze nei tur chuan a zirtir a ataka changtu Lalpa kan nei hi ringtute kan va vannei em. Chi hnih pawn kan sawi thei ang, he leiah leh vanah hian hmun tha min buatsaihsak a ni. Leia kan la awm chhungin Kohhran min pe a, kan duh kan chak leh kan kal zelna tur min siam saka, min pe a, mal min sawm a. Kan chauh leh harsatna kan tawhin a mite hmangin kan inthlamuana kan in tanpuite hi a hlutna kan man thiam em le? Kan man thiam anih chuan kan tih ve tur chu Kohhran tan bawka luan chhuah theih kha a ni mai a ni. Pakhat leh chu kan tan vanah hmun min buatsaihsak a ni. Hei pawh sawi tur tam tak a awm thei mahse kan sawi seng lo, nangpawn keipawn sawi tur kan ngah thei ang. A pawimawh berah chuan he lei kan chen hlenna tur ni lo kan thih hnuah kan thlarau tan hmun nuam leh chatuana kan awmna tur min buatsaih sak hi ava ropui em. Kan thian, kan unau, kan chhungte he khawvel chhuahsan te hi kan ngai thin tiraw? Mahse, ngaihtuah chian chuan an tan chuan hmun nuam zawk a awm tih hi kan ngaihtuah leh thin hian min ti thlamuangin chuta awm chu min chaktir thin a ni. Tichuan, he khawvel a kan la chen chhung hi chuan famkimna hmun kan la thleng lova khawvel a tawp hunah chauh a hmun siamah chuan kan chawl dawn a ni.
Khaikhawmna:-
Awle, tikhan Lal Isua leh Kohhran inlaichin dan kan han sawi ve ta nual a, keima thlirna zawn atanga ka sawite pawh a awm ve bawk a. Ngaihdan in ang lo deuh pawh thil awm thei a ni a. Mahse, a tum chu kan hrethiam theuhin ka ring. He thu ngaithla leh chhiartu zawng zawngte hian Kohhran hi eng tiang chiahin nge kan lo hmelhriat a, kan lo thlir a, kan lo kalpui ve tih chu mahni theuh inzawt ta ila, kan ngaihdan emaw thlirdan emaw pawh a inang lo nual maithei. Mizoramah bik hian Kohhran hrang hrang kan awm a, kan rindan pawh a in ang lo nual ang. Nimahsela, ka sawi duh chu he kohhran hi Pathian in duh taka a din leh siam a ni a, dik bik emaw pawh kan inti bik thei lo. A pawimawh zawk chu Kohhran hi inzah sak theuh ila, fiamthu nan phei chuan hmanglo ila, tupawh hi kan kohhranah pawh lo lawmin lo ti tlangnel thei zel ila. Kohhran avanga inenhranna hi bo tawh se la tih hi ka sawi duh a nih rualin, kan rin Pathianin min duhdan anih ka ring bawk.
Tin, mahni Kohhran bikah pawh han lut ta ila. Baptist Kohhran chhungah, tualchhung Kohhranah, FOD hrang hrangah nen ngaihtuah chuan he kohhran Pathian in a dah pawimawh dan kan hria ang a. Chutih rual chuan kan hriat loh leh ven hman loh hian sual hian nitinin min bei ve reng a, Kohhran chaklohna lai a lo chang ve reng tih hria ila. A bik takin thalai zawnah kan kalphung a dik lo siam tha ngam ila, a dik chu chapopui mai lovin midang tan hlan ila, midang tan luang chhuak ila. Tichuan Thlarau Thianghlim keimahniah theuh a lo cheng ang a. Chu chu Thlarau Thianghlim harhna kan duh ti a kan au kan au hi a takin kan Kohhranah a lo thleng mai dawn a lo ni. Keini aia hnam ropui leh fing zawka kan ngaih pawh Kohhranah sualin nasa takin hneh tumin tan a la a. Thenkhat chuan an chhiatpuia Kohhran a chauva, a lo nguia, a nung ta thin lo a ni tih hria ila. A bik takin tuna thalaite hian tun atanga kum 10 hi thlir ila, Kohhran kal zelna tur leh a tluk chhiat loh nan Lalpa’n kan kovah chanvo min pe theuh a ni tih hria ila. Kan thurin bulpui ber, “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni.’ (Marka 12:30) tih anih angin theihtawp keimahni a tha ber hi Lalpa tan Kohhran tan i hlan zel ang u.
‘Ropui ber Lalpa chu chawimawiin awm zel rawh se.’