NAUPANG PUAL
Meyer-a tan milem lu
Pathian hnena thlarau bo tam tak hruai thlengtu, F.B. Meyer-a’n Isua Krista a rin tan dan hi an sikula thil thleng vang zu ni tlat a!
Kum 12 mi, Meyer-a chu an sikulah chuan a zakzumin a ngawichawi hle a, rual pawh a pawl vak lo nghe nghe a. Ni khat chu a aia upate chuan Meyer-a chu a tuka ram dang milem lu (foreign stamp) rawn keng turin an ti a, an thu awiha a rawn ken chuan an tina lovang tih an intiam bawk a. Ram dang milem lu a neih miau loh avangin, sawisak pumpelh nan a tukah chuan sikul kal loh mai a duh hial a. In a thlen chuan a lungngai em em a, hlauhthawnna in a khat a, a tuk khua chu var lo mai se a duh hial a. A tihtheih awm chhun chu Pathian hnena tawngtai leh tah a ni ringawt mai. A tawngtai chhan nan a muthilh hlanin Pathianin a khumah ram dang milem lu a rawn dah mial mahna, tih chu a beisei awm chhun a ni a; mahse, a tuk zing khua a lo var pawh chuan a beisei angin engmah a lo thleng ta hauh si lo. Sikul kal a hun dawn takngial ta mai. A bula thu a pa lam chu hawiin ram dang milem lu a neih leh neih loh a zawt ta chawt mai a. A pa chuan, “Ka hnathawhna ah hian ka tangkaipui lo viau nain nimin khan chutiang ramdang milem lu chu ka thianpa-in min pe tak asin, ka ipteah sawn a awm,” a ti ta mai a! Hlim em emin Meyer-a chuan a pa kawrchung iptea milem lu chu a va la ta a. A tawngtai hma khan Pathian chuan a mamawh chu a lo pe daih tawh a lo ni.
Pathian hian kan mamawh engkim hi min hriatpui vek thin a. Mahse mihring lamin kan tih ve tur a awm a, chu chu a hnena kan mamawh dila tawngtai hi a ni. Kan mamawh leh duhnate a hnena kan thlen phawt chuan Pathian hian min chhan a chak em em reng a ni. Pathian hnena kan mamawh thlen tur hian thil te lua a awm lova, engkimah kan mamawh a hnena kan thlen hi ringtute chuan kan tih tur a ni. Dilna chauh ni lovin lawmthu sawina then nachangte pawh kan hre ve tur a ni. Kan nitina nuna kan thil tawn engkim hi Pathian hnenah hrilh thin ila, chu chuan kan puitlin hnu thleng pawhin Amah nena inzawmna tha tak min siam zel dawn a ni.