A RAM LEH A FELNA
Matthaia 6:33. “A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che nia.” Helai thu hi Bible chang chhiar tam pawl leh kan sawi tam pawl tak pawh a ni awm e. Hla siamtu in a sawi ang deuh khan “Mihring chauh lo chu ziritir ngai an awm lo” a lo tih kha. Mihring hi kan luhlul em vang hian hrilh nawn fo leh sawi nawn leh fo a ngai thin a ni.
Mihring kan ni a, duhzawngte kan nei ve khiau hlawm bawk nen hian helai thu hi chuan mit a la ve viau a ni. Tin, Mihring mizia hian, a tha duhna hi a awm ve hranpa hrim hrim a. Helai chang hian thil tha, a sawi a hi engtin nge kan chan ang? Eng chu nge a ram leh a felna chu(Pathian thu hausak zia kan hrethiam thei mai awm e. Bible in kan neih theih tam tak a sawi atang hian) eng nge ni ang tih i han chhui dawn teh ang. Thalai zawn lo thlir deuh bik ila.
1. TKP zawnah: TKP kan nih angin engtin nge a ram leh a felna hi kan zawn ang. TKP inkhawmna a kal em ni? TKP hnatlan that em ni? Zaipawl a tel em ni? A chhanna chu a ni thei, a ni lo thei bawk. TKP a i inkhawm hian Pathian a hnaih tir che em? TKP hnatlan hian Pathian a hnaih tir che em? Zaipawl a tel hian Pathian a hnaih tir che em? Krista min hnaih tir tu tur atana thil kan tihin, min hnaih tir si loh chuan keimahni inbih chian a ngai viau a ni. Kan thil tih turah Pathian nena kan tih dun kawp theih tur thil kan thlan hian, a ram leh a felna chu kan zawng hmasa a lo ni fo thin. I Inkhawm pawn Krista nen, i hnatlan pawn Krista nen, zaipawla i tel pawn Krista nena i relationship ti tha turin tel rawh. Chu chu a ram leh a felna zawn dan dik a ni e.
3. Eizawnna/hlawhtlinna kawngah: Thalai nih chuan a tu a te pawh hian mahni kut leh ke a din kan chak em em a ni. Tin, sawrkar zem zen mi hlawhtling nih te pawh kan chak em em. Tin, mite ngaihsan mi hlawhtling nihte pawh kan chak thin. Gym-a han kal a, six pack neihte pawh hi thil hrehawm a ni hauh lo ang (thalai tan chuan). Heng kawng hrang hrang hlawhtling tura kan beihna ah hian, Pathian tan hlawkna (amah nena in in zawmna a that phah em) a awm em? Chu chu a main focus a ni tur a ni. Krista nena in tih dun theih loh thil chu paih thlak a tha fo a ni. Bible chuan, “Miin khawvel hi apumin nei sela, a nun chan si sela, a tan engnge sawt ang?” a ti. (Marka 8:36) Hlawhtlingin duh duh nei thei ila, Krista nei si lo ila engmah a ni chuang si lo a ni.
4. Thil hlimawm leh nuam kan zawnna kawngah: Thalai Kristian Pawl kan ni a. Tunge inhmuam up in, TKP i nih chuan va tum reng rawh min ti! Kan hlim tur a ni. Amaherawhchu, Pathian nen kan thil hlimpui chu, kan hlimpui dun thei em? Isua tel ve a rem em? Ngaihzawng i neihna kawngah pawh Krista a tel ve a rem em? A tel ve theih loh chuan paih thlak a tul tihna a ni mai a ni. Krista tel theih lohna thil reng reng (Kristianna main focus nen a inrem lo) thil hi chu consider chhunzawm zel tlak alo ni lo thin a ni.
Pathian fate kan lo nih hnu hian, thil kawng hrang hrang kan thlir ang. Amaherawhchu, Krista nen kan inlaichinna a siam tha em? tih hi a bul bera kan ngaihtuah hmasak ber tur chu a ni. Tichuan, kan tana tha tur (welfare) chu Lalpan min ngaihtuah sak ve mai dawn a lo ni. Pathian in min tiama chu eng nge ni ta? Thil engkim kan tana pawimawh leh kan tana tha, Pathian nena kan inzawmna ti nghet thei leh Pathian tana thil ropui tak kan tih theihna tur thil chu min pe mai dawn alo ni.