PATHIANA INNGHAH
Lalthanliana
I Samuela 16, 7 Nimahsela, Lalpan a hnenah “ A hmelthat lam emaw , a san lam emaw en suh, ani hi chu ka duh lo. Lalpa chuan mihring thlir dan angin a thlir ve si lo; mihring chuan pawn lam lan dan a en thin a. Lalpa chuan thinlung lam a en thin” a ti a.
Davida chanchin atang hian Pathiana innghah a pawimawh zia kan sawi dawn a ni.
Mihringte chuan khawvela thila mawi, ropui leh duhawm zawk kan thlang thin a. Mahse chu chu Pathian thlir dan a ni ve lo. Ani chuan thinlung lam a en zawk a. A rawngbawl tura min kohna hi pawn lam kan lan dan emaw, kan hausak vang leh lehkha kan zir san viau avang a ni lo tih kan hriat a tha hle mai. Pathian hmaa theihna leh thiamna chhuang ngam kan awm lo vang.
Davida, Jesaia fate zinga duhawm ber leh tha ber pawh ni lo, tlawntlai han ena chak ber tur pawh ni chuang lo kha Pathianin a thlang a. A zawlnei kaltlangin hriak a thih a ni tih a thuah kan hmu a. A ram humhima a tana thawk turina thlang a nih kha.
Vawiinah hian nang leh kei pawh Pathianin kan dinhmun zawng zawng hre chungin khawngaihnain a rawngbawl min phalsak a. Min thlang a ni. Mite ngaih chuan muhsitawm kan ni thei a, iaiawm tak kan ni thei bawk. A rawngbawl tura min thlangtu hian kan tlin em avang lam ni lovin khawngaihna avang a min thlang a ni tih erawh kan hriat nawn fo a ngai a ni. Kraws lerah nang leh kei hi min thlang a. Hriak duhawm ber a thisen chu kan tan leihbuain min nemnghet a ni. Mi nuihzat leh hmuhsitawmin kan awm a ni thei a. Chu lam chu ngahtuah lovin min kotu chiah thlir ang u.Tling lo leh insit tak chunga kan pen chhuah a ngai a. Huaisen takin harsatna pawh sut huama kan inbuatsaih zel a ngai a ni.
Tin, Davida chuan “Sakeibaknei lak ata leh savawm lak ata min chhanchhuaktu Lalpa chuan Filistia mi lak ata chu min chhan chhuak ang” (17, 37 ISamuel) a ti a.
Chang hmasa lam kan en chuan Davida’n Goliatha bei tura thutlukna a siam khan mi rin a hlawh lo. Lal Saula hnenah Beram a ven laiin Sakeibaknei leh Savawm hmaah pawh a zam ngai loh thu erawh a sawi ve a. Sakeibaknei leh Savawm tudai thei hi mi naran chung lam chu a ni ngei ang. A huaisenna leh theihna erawh a chhuang hauh lo. Mi’n an hmuh loh, a ruka chhuan tur huaisenna leh chakna ropui tak chu a nei ve a. Mahse chu’ng mihring theihna zawng zawng chu chhuang lovin Pathian a chhuang zawk a. A innghana ber a ni.
…Min chhanchhuaktu Lalpa chuan Filistia mi lak ata chu min chhan chhuak ang” a ti ve tlat a ni.
Vawiina khawngaih rawngbawl hna thawktute hian kan thiamna leh zir sanna te kan lo chhuang viau thei a. Kan hausakna leh hna thawh ropui thlengin kan chhuanpui viau thei. Kan rawngbawlnaah hian thiamna leh theihna, chakna leh huaisenna te hi englai pawhin a tangkai e. Mahse Pathian tel lo chuan engmah a ni lo tih erawh hriat a tha hle mai. Kan chhuan ber leh kan hmatheh tur ber chu Pathian a ni. A tel lo chuan kan theihna nia kan hriat ve zawng zawng hi engmah a ni lo va. Kan hriatna leh ropuina kan chhuan thin te hian tangkaina a nei lo.
Goliatha ropuina ngei pawh tudai a, Pharo thinlung sak tinemtu kha Davida leh Mosia an ni lo, Pathian a ni. Davida virvawmah khan ani chu a tel a, Goliatha sahuat fuh tur khan a hruai zawk a ni. Israel fate’n tuipui sen an kan pawh khan Mosia theihna ni lovin Pathian hnathawh a ni a. Vawiina min thlangtu hi amah chu a ni a. Kan hnenah a awm a ni. Amahah chuan innghat a, rinchhan zelin kan rawngbawlna i hlen zel ang u.
Lalpan a thu malsawm rawh se. Amen