MAHNIA KRISTIAN
Matthaia 6 : 6 “Nang erawh chu i tawngtaiin, i pindan chhungrilah lut la, i kawng khar la, i Pa a ruka awm hnenah chuan tawngtai rawh; tichuan, i Pa a ruka hmu thintu chuan a rul ang che.”
Nikum lama kan hun tawnte kan hre vekin a rinawm a. Tin, chu kan thil tawn chuan kumin thlengin min la nghawng chho zel a. Kan hre veka khawvelah hripui (Covid-19) a len avangin nunphung zawng zawng a buai zova, chu thil chuan nitina kan khawsak hona leh kan thil tih thin a nghawng mai bakah Kohhran leh F.O. hranga hranga kan inpawlhona leh kan activities a nghawng buai ta vek a. Pathianni-a kan programme hman thin ang, Kohhran inkhawm, Sunday School, F.O. fellowship leh a dang dang kan tih thinte pawh a lo chawl ta thuap mai a ni.
Kohhran hote thlarau nun tih chak nana kan inpawlhona thinte a lo chawlh thuap takah chuan mimal nuna Pathian kan pawl thinna te leh thlarauva kan chakna te pawh engemaw chenah a hniam ngeiin a rinawm a. Tumah indem theih a ni lo a. Mizo society-ah ngat phei chuan inpawlkhawm thin, a huhova thil ti thin kan nih avangin hetiang alo nih takah chuan a nghawng lo thei lo ve bawk a ni.
Amaherawhchu, hetiang anih avang hian chhuanlam tha taka hmanga Pathian nena kan inzawmna hlat nana hman emaw thlarau nuna kan lo hniam avanga ngaih that ringawt emaw chu ringtuten kan tih tur a ni lo tih hi kan hriat a pawimawh hle a ni. Bible thu-a kan hmuh ang hian ringtute chu inpawlho thina intihchak tawn thin kan nih rual hian mimal nuna Pathian nena inzawmna kan neih that hi a pawimawh ber chu a ni si a. Mimal nuna Pathian nena inzawmna nei tha tur hian midang kan mamawh lem lova, keimahni duhna leh kan taihmaknaah a innghat lian em em a ni. Kohhran pumpui ang emaw a huho angin Pathian pawlna nei thei lo mah ila, keimahni leh kan chhungkuain Pathian hmaa kun ho thinin Pathian nena inzawmna tha tak kan siam thei reng a ni tih hi kan hriat a pawimawh hle a ni.
Kohhran leh F.O. programme a lo awm loh takah chuan inthlahdah a awlin a hmaa kan tih thin angte pawh tih loh mai a awl hlein a rinawm a. Mahse mimal tin ten taihmak chhuah hram hram ila. Pawl anga kan hun hman ho a pawimawh rual hian kan tum ram (Vanram) min hruai thlengtu tur ber chu keimahni mimal leh Pathian inkar a fel leh fel loh hi a ni ber a. Chuvangin fianriala Pathian pawlna hun neih te, Bible chhiarte leh chhungkuaa Pathian hmaa kun te hi he kan hun harsa tawn hi remchangah lain tih hram hram i tum ang u. Chu chuan kan mimal nunah hmasawnna nasa tak min thlen dawn bakah Kohhrana kan hun hman ho leh tur thlengin malsawmna tam tak a thlen dawn a ni.