THLEN CHIN ATANGA HMASAWN (Phillipi 3:12-16)
R.K. Rohmingliana
Kan Lalpa Isua Krista hmingin chibai ka buk a che u. Kan sawi tumah lut nghal mai ila. Pathian ringtu piangthar, chhandamna chang tawhte hi kan nun atanga thlir hian thlen chin atanga hmasawn a va pawimawh tak em ti rawh u. Khawvel thilah hi chuan zirtir vak kan ngai lova. Khawtlang leh chhungkua leh ramte kan incheinaa kan san sawt zia leh hma kan sawn dan a lang zel a. Mahse kan thlarau nun lam zawkah hian zirtir ngai zawk kan ni si a. Ringtu nun chu mahni thlen chin atanga hmasawn zel tur kan ni si a.
Kan thlarau nun lamah hi chuan thlen chin atanga hmasawn aiin hnungtawlh kan awm ta zawk fo mai. Ringtu nun chu mahni thlen chin atanga hmasawn tura phut tlat kan ni a. Nausen hi kan hria a, engmah a tithei lova, a thlen chin atangin hma a sawn zel thin a. A nui thei a, a bawkkhupin a thu thei a, a hringtu nu a lawm em em bawk a. Mahse thut rengte a duh lova, a din theih hun te, kea a kal theih hunte a thlir a, chutiang zel chuan hma a sawn hret hret zel thin. Hma a sawnna a hringtu nu in a hmuh khan a lawm em em bawk thin. Keini ringtute pawh hi Pathian nau awm te kan ni a, amah anga thanglian turin min hring a ni. Keimahni mimal tin hi han inbuk ta ila, nikum aiin kuminah hian eng angin nge hma ka sawn tihte ngaihtuah ta ila; sawi tur kan nei angem aw? Kan sawi ang khan nausen hi thanglian thei ta miah lo sela, kum li kum nga vel anih pawhin a nuin a malchungah chawiin ‘tumbailek’ tih velte thiam ngawr ngawr ta sela. A kum rualpuite chu kalin infiam thei ta sela, ani a nu malchungah thiam nei lovin awm reng ta sela. A hringtu nu chuan a rukin a mittui a hru a hru thinin a rinawm a ni. Keini pawh Pathian nau awmte kan nih chuan kan thlen china awm reng mai, hmasawn miah lo. A thente phei chu hnungtawlh leh chak lo tawlh tawlh zawkte kan awm phei chuan min awmtu Pathian hian eng ang takin nge min en ang aw. Pathian mittui kan titlain Pathian tuarna kan thlen ngeiin a rinawm a ni.
Ringtu nun hi Awle nen an tehkhin thin a. Awle chu thankin nei lo thih thlenga thang thin niin an sawi a. Nitin kumtin ringtute hi van thlen thlenga thanglian tur kan ni. Isua anga thangliana van thlen thlenga thanglian zel tur kan ni. Kristaa famkimna a zavaia kan chan hma loh chuan thanglian zel tur kan ni. Vawiinah pawh hian keimahni nun theuh in enlet ila, kan thlen chin atanga hma kan sawn a pawimawhzia kan hre theiin a rinawm. Thanglian apiang chu thlarau lam nunah pawh an hlim ang a, thanglian lo apiang chu thlarau lam nunah pawh an ngui anga an hnungtawlh zel dawn a ni. Ngatinge mi hmuhah kan hlim viau laiin kan chhungril lam nun a tah leh si, rawngbawl ve reng chung si hian tinge nun takte hi kan pawh loh em em le? A chhan chu kan chhungril lam nunah hian chansan tum, mite hmuh loh leh hriat loh hre bik nih tum kan tam ta em em a ni. Chubakah mite hriat loha kan thil tih ruk kan hre run a, kan thlarau nun a thang thei si lova, kan chhungril nun hi a tap a tap mai a ni.
I thil tih tam tak leh i thawh tam tak kha chhuang viau mah la, i chhungril lam nunin hma a sawn si loh chuan i tan lungngaihna mai bak chan tur a awm lovang. Ringtu nun chu a tul ang zela rawngbawlna nun leh Lalpa hmangaih tlat hi a ni a. Chu chuan hmasawnna a thlen thin a ni. I thil tih that leh ilo thawh tawhte chhuang lovin Krista’n i tana a lo thawhsak che chu thlir thin zawk la. Tin, kan lo thatchhe deuh anih pawhin Lalpa tana taima lehzual turin tan han la bawk ila. Chutianga kan tih phawt chuan Lalpa hian hmasawn turin min pui em em dawn a ni. Kumin kum 2020-ah ngei hian Lalpa tana thahnem lehzual tur leh hmasawn lehzual turin tan han la ila. Kan theih tawk a tlem emaw a tam emaw mahni nun vui liamin Lalpa tan tiin bul i tan tha ang u. Lalpan malsawm rawh se.