RILRU HRISEL
Tv. R.K. Rohmingliana
A hmasain kan Lalpa Isua Krista hmingin chibai ka buk vek a che u. Sawi turah lut nghal mai ila, rilru hrisel hi at leh at loh sawina a ni lo a, depression emaw hlim loh leh zam loh sawina pawh a ni lo. Rilru hrisel chu nungchang leh rilru put hmang dik nei tihna a ni. Mi a nih duh si lo, rilru hrisel lo hi kan tam angem? Mahni a duhthlanna siam dik thei si lo, duhsaktute duhsakna awka pawh ngaithla duh lo hi ka thalaipuite zingah pawh kan tam viau lo maw. Mi rilru hrisel chuan a nihna dinhmun a hre thin a, amah a in hrechiang ,tunge anih engti tur nge, engtianga nung tur nge a nih a in hre thin. A thiam zawngte pawh tha taka tih ve mai a tum a, a thiam loh zawng chu a thiamlo a ni tih a pawm mai a, sawi sawi pawh a tum chuang lo a ni. Mi hrisel chuan ama nihna hi a zahpui lo a, hmasawn erawh chu a tum thin a ni. Midang nun entawn hian buai lo ila kan nihna hi lan chhuah pui mai ila. Kan thiam tawk, kan phak tawk hian nung ila. Pathian hruaina leh a malsawmna kan dawng thei a ni. Thil neih that(material) phenah hian bihruk kan tum thin kan nihna tak miten an hmuh loh nan. Chu chuan kan ringtu nun hi a khawihchhia a, kan ngaihtuahna, kan rilru put hmangte a ti hrisel lo thin. Mahni pawh in hre chianglo, mahni nihna ang a lang chhuak duh si lo Kristian thalai ni si. Kristian nun a nung lo kan tam lutuk hian “hruaitute pawh hi a” tiin kan sawisel phah thin a ni. Kan nunah eitur an zawng, eitur an hmusi lo a, kan ringtu nun leh keimahni, keimah ngei pawh ka ni e. In enchian kan ngai a ni.
Kan rawngbawlna zel tur atan hian kan rilru hi a hrisel angai a, mi rilru hrisel chu a fan thei a, a in siamrem thei a ni. Harsatnate, lungngaihnate, tawk miah lo hi rilru hrisel tihna a ni lo a. Tumah hi a hlim reng theih loh a ni. Chak loh chang, hlim loh changte kan nei thin a, mi rilru hrisel chuan harsatna, manganna, lungngaihnaten han pawt fan thin mahse a chat mai lo. Hreawmnain tlakbuak mahse a fan tang tanga, a ngaiah a let leh thin a ni. Joba pawh harsatnaten han pawt fan mahse a ngaiah a let leh a nih kha. Harsatna kan tawk a tlansan kan tum a, kan tuar peih lo leh thin a.Midang tana malsawmna kan nih theihna turin Lalpa tan kan fan ve tur a ni, kan tuar ve tur a ni lawm ni. Mi rilru hrisel chu a thalaipuiten nen hlim takin a awm tur a ni a, a cheng ho thiam tur a ni. Midang nen a chen ho hi kan zir a pawimawh khawp mai. Mi rilru hrisel chu khawtlang tan a hnawksak lo a, thenawm khawvengte tan a hnawksak tur a ni lo a. Mi tan a tangkaitur a ni. A tangkailo a nih pawhin a hnawksak lo tal tur a ni. Dam sentul mah ila, mi tana ka hnawk sak tlat chuan, khawvel hian mi hriselah min puang ngai dawn lo a ni. Mi hrisel chu a mawl tur a ni lo a, ngaihtuahna fim a hmang tur a ni a, ngaihtuahna fim tak nen thutlukna fing tak a siam thei tur a ni. Mi sawi ang a piang a, awm mai hi mi hrisel lo zia a ni. Duhthlanna siam kawnga hian mi fing leh finglo chu a hriat khawp mai. Mi hrisel lo mi mawl chuan duhthlanna a siam dawnin a nawm hmel em lawm, a chakawmna lam ringawtte ngaihtuahin duhthlanna an siam mai thin. Mahse, mi rilru hrisel chuan Philipi 4:8- a kan hmuh ang khan a thiltih tur a chik em em mai a. A zahawm em, a fel em, a thianghlim em, a duhawm em, a thangmawi angem, a tha em, a fak tlak angem tiin a ngaihtuahna a siam thin.
Mahni a kan theih tawkah hian fin ve tur, mawl loh tur,at loh tur a ni. Mi a enkawlna damdawite chu an siam thin a. Mahse, mimawl damdawi a awm ve lo damdawia enkawl chi a ni lo. Damdawi ei a tih dam chi a ni lo. Damdawi tha tak awm a, Lalpa tih hi finna bul a nih miau avangin (Thufingte 1:7) mi hian lehkhazir sanglo mahse, a hriatte tlem hle mahse Pathian a tih tlat chuan a mawl theilo hrim hrim, a fing lo theilo a, a rilru-a hrisel lo theilo a ni. Lalpa tih hi finna bul a nih miau avangin midang aiin keimahni phak tawkah kan fing zawk ngei ngei tur a ni. Mi rilru hrisel chu a huaisena, lungkhamna in a tibuaive lo a ni. Hlauhnate, harsatna tawh ngailohte hi hriselna kantehna tur a ni lo. Mi hrisel chuan hlau chung chung pawhin a bei hram hram thin zawk a ni. Chaklohnite, tluknite, chauhnite pawh ringtute chuan kan nei ve ang chu mahse indawm kun a ngui reng tur kan ni lo. Kan tho chhuak leh anga, result thar kan nei leh thei. Ka tive thei lo ang, ka hlawhchham ang, examna-ah ka fail mai ang tia, lungngaia zam tam tak ka lo hmu ve tawh a. Naktukah hian ni a chhuah tur leh tur loh pawh hre lo hian nakumah engtinnge ka awm tih kan lungkham lawk thin. Chumi kan neihloh nan chuan a lawm Lal Isuan atuk atan lungkham suh u, a tuk chuan ama tan lungkham rawh se. Nikhat atan nikhat hreawm a tawk a tihna chhan. Matthaia 6:34-ah khan a sawi a ni.
Vawiinah hian hlim takin awm ila. Vawiinah harsatna kan tawh hi hma chhawn mai ila, naktukah chuan nithar duhawm tak a lo chhuak leh thei a ni. Nupate, kan bialnu kan bialpate nen kan inti thiam lo in kan in hau thin a. Mahse, kan in ngaidam tawnin, atukah nithar duhawm tak a lo thleng leh thin a ni. Kan rawngbawlnaah hian kan theih tawp hi chhuah ila kan theih tawp bak hi tuman min beisei lo a ni. Kan theih tawp kan chhuah theih chuan enge zam tur, hlauhtur awm. Pathian hi kan hnenah a awm a lawm. Ka theih tawp bak hi ka nu, ka pa pawn min beisei lo a ni. Chuvang chuan ka thalaipuite khawtlang leh kohhranah, kan hnathawhnaah lungawitak leh hlim takin, kan phak tawka a tha thei ang berin thawk ila kan nunah Isua Krista an hmu ang a. Pathian pawn mal min sawm dawn a ni.
A tawp berah chuan Khawvekah hian kan rilru hahna zawng zawng min tidam thei ropui tak a awm a, chu chu Lal Isua Krista a ni. Lal Isua chuan nangni thawkrim leh phurrit phur zawng zawngte u ka hnenah lokal ula keiman ka chawlhtir ang che u a ti. A ropui khawp mai! Kan rilru a hah changte, kan nun a chauh changte, mangan lungngaihna kan tawh changte hian kan innghahna tur dik, pan tur dik Lal Isua hi pan ila. Pathianin kan nun min siam tharin A malsawmna kan dawng thei dawn a ni tih I hrethar leh ang u. Lalpan kan za atan malsawm rawh se.