PHAR PUAL PATHIAN NI
Phâr pual Pathian ni (Leprosy Sunday) hi kum 1943 atangin kan Kohhran chuan kan lo hmang tawh thin a. Kum 1947-ah Assam Kristian Council chuan a huam chhunga Kohhrante chuan Phâr pual Pathian ni siam a, he mi nia thawhlawm pawh chu The Leprosy Mission tanpui nana pek nise a tih chu keini pawhin zawmin, hun rei tak chu January thla Pathian ni vawi 4-na hi hman thin a ni a. Kum 2006 Assembly-in a rel ang khan January Pathianni hnuhnung ber hi tun thlengin hman thin a lo ni ta a ni. Hemi nia thilpek tlingkhawm hi BCM pawisa luh dan pangngaiin BCM Headquarter’s office-a chhun luh vek tur a ni.
THE LEPROSY MISSION RAWNGBAWLNA
Irish tlangval Welesly Cosby Bailley, zirtirtu, Missionary tura inbuatsaih mek chuan India rama phâr khawngaihthlak em em, enkawltu tha nei lova kawtthler leh an dahkhawmna hmuna awmte a hmuhin a khawngaih em em a. Chung mite taksa leh thlarau chhanchhuah aia rawngbawlna ngaih pawimawh tur awm bikin a ring lova, phârte tana rawngbawlna chu kum 1874-ah India ram Ambala (Chûng hun laia Punjab)-ah harsa takin bul a tan a. Tunah chuan khawvel hmun hrang hrangah Kohhran pawl hrang hrang 100 zet kan thawkho ta. Mizoramah chuan 1985 atang khan TLM rawngbawlna hi Promotional & Support hna thawkin tan a ni.
KUM TINA INDIA RAMA THAWH DAN TLANGPUI:
TLM Hospital-ahte hian kum tinin phâr enkawl an ni ziah a. Phâr dam leh te an eizawnna atana chhawmdawlna a pe thin a, an mamawh dan azirin enkawl zui reng (Rehabilitate) an ni. Phâr dam leh te tana thiam thil zirna a buatsaih VTC 6-ahte hian kum tinin student 1,000 velin an zir reng a, an zir chhuah hnuah an thawhna/bul tanna tur ngaihtuahsak thin an ni. Phâr natnain taksa peng a tih chhiatsak mi 1300 vel leh mit a tihchhiatsak mi 3,600 velte chu kum tinin an zaisak (surgery) bawk thin. Tin, a chunga kan sawi tak phâr dam leh an chhungten an ina haw an phal tawh loh ho enkawlna (Mercy Home) Home-ah mi 200/300 vel enkawl reng an ni bawk. Phâr naupang enkawltu nei lo leh sikula an admit duh loh 1334 velte chu kum tinin catch them young programme hmangin an zirna ngaihtuahsak thin an ni. Phâr dam leh chenna nei lote tan chenna in 200 vel sak sak ziah an ni a, eizawnna bul tan nan sum leh pai pek thin an ni bawk. An kea phâr natna veite bun tur bik Micro cellular rubber hmangin kum tinin pheikhawk tam tak siam sak a ni thin. Phârten Lal Isua an neih theihna turin Hospital leh Centre tinah counseling neihpuiin Chapel-ah te inkhawmpui an ni thin.