PATHIAN HNAIH LA ANIN A HNAIH ANG CHE
Tv. RK Rohmingliana
(Jakoba 4:8, Matthaia 8:1-3, I Johana 4:8)
A hmasain kan Lalpa Isua Krista hmingin chibai ka buk a che u. Pathian hnaih hi kan nun hian a mamawh em em a, mitinte kan nunah hian ruak, khawharna engemaw kim lo hi a awm a, chu kan nun ruak chu hnawh khah kan tum thin a ni. Kan nun ruak hnawhkhahna a nih beiseiin thenkhat chuan ngaihzawngah, ruihtheih thilah, mipat hmeichhiatna, sum leh paiah-te kan tlan a. Chutiang thil nei tur chuan thalaite kan tlan a. Mahse, chutiang thil chu lo nei ta pawh ni ila kan nun ruak chu a hnawhkhat thei chuang lo a ni. A nei tura kan beih lai hi a chak awm lai ber a ni. Chutiang dinhmunah chuan kan lo ding ta a nih pawn lungawina tak tak min pe ngai chuang lo a ni.Heng thil zawng zawng ruihtheih thilte, sum leh pai. mipat hmeichhiatna, ngaihzawngte pawh a ni ang. Hengho zawng zawng hian i nun ruak, ka nun ruak hi a hnawhkhat zo lo a ni tih hre tur khawpin tute pawh hi kan tlan tawh a ni. A tawpah chuan kan nun a beidawnga, kan mamawh chu Pathian a ni tiin kan au leh thin a ni.
Amaherawhchu, Pathian kan zawn nasat ang hu hian ngatinge kan nun ruak hnawh khahna kan hmuh loh? A chhan chu Pathian hi kan duh a, kan zawng anih chuan, a kawngah kan zawng tur a ni. A kawnga kan zawn loh avangin alawm kan hmuh loh thin ni. Kawng hrang hrangah, thil hrang hrangah Pathian zawngin i tlan a. Mahse, Ama kawnga i tlan loh thin avangte, Ama kawng ngeiah i zawn loh vangin alawm Lalpa chu i hmuh loh thin ni.Keimah hi Serkawn a awm ka ni a. Keimah mi rawn zawng anih chuan kan vengah ah i rawn kal a ngai a ni. Veng dangah mi zawn chuan min hmu dawn lo a ni. Chutiang chiah chuan thil hrang hrangin i nun ruak hnawh khahna i zawnga, i mamawh chu Pathian a ni tih mi sawi i hria a, nang pawn i lo ring ta a.Lalpa chu i zawng ta ngei mai, i hmuh loh fo na chhan chu a kawnga i zawn loh thin vang a ni.
Tunlaiah mi tam takin Pathian a awm lo a niang? tih zawhna kan lo neih takna chhan pawh hi kan duh danin Lalpa hi rawnin puang se, hna rawn thawk se kan ti a. Kan duh leh kan rin, kan beisei dana a rawn in puan loha, hna a rawn thawh loh thin avangin kan beidawnga Pathian hi a awm lo a niang kan tih phah fo thin a ni. Mahse, kan duh dana Pathian awm tir kan tumna hi han ngaihtuah chiang mah ila, a nihna dik takah chuan chapona asin! Ani chu Pathian a ni a, i duh dana Pathian awm tir i tumna kha chapona zawk a lo ni! Jakoba 4:8-ah chuan tihian min hrilh a,Pathian hnaih rawh u,tichuan anin a hnaih ang che u a ti a ni. Kan duhdana Lalpa awm tir tumna ni loin keimahni zawk hi Pathian duh danin nung hmasa zawk ila. Keihmahni zawk hian Lalpa chu kan hnaih hmasa anga. Kan nunah Lalpa a lo in puang zawk dawn a ni. Kan duh dana Lalpa awm tir loin, nangmah zawk kha Pathian duh danin awm hmasa la i nunah Lalpa a lo inpuang chhuak dawn a ni. Chutiang ni lo a, kan duh danin in puang se kan ti a nih chuan, nangmah zawk kha Pathian duh danin awm hmasa la, Pathian hnaih hmasa la, i nunah Lalpa chu a rawn in puang mai dawn a ni. Mahse, mi thenkhat ten an zawh leh fo thin chu hei hi a ni. Kei chu ka sual lutuk a, chutiang thil chu ka ti tawh a, Pathian hnaih hi a har em alawm pawh i ti mai thei a ni. Lalpa hnaih rawh tia kan hrilh che hian i fel phawt, i that phawt hunte, engtiang emaw deuha i awm a, Lalpa hnaih i tum chuan i hnaih thei ngai lo ang. Pathian zawk hi a thianghlim lutuk a, a bulah bawlhhlawh a awm thei lo a ni. Kei mi bawlhhlawh, mi tenawm hian ka bawlhhlawh ang ang a ka va pan hian Lalpa (a thianghlim em avangin) chuan min lo ti thianghlim ve mai zawk a ni. Chuvangin kan nihna ang ang hian Lalpa hnaih tur kan lo ni zawk a ni.
Matthaia 8:1-3 ah khan pharte chanchin kan hmu, khang pharte khan Isua hmuh an duh a, hnaih an duh. Khang pharte kha an bawlhhlawh a, khawchhungah pawh awmve ngai lo khawp a, mite thinhrik an ni. Mahse, Isua hmuh an duh ve tlat. An thianghlim phawt, an fel phawt hun chu nghak se engtikahmah a thleng ngai lo ang. An bawlhhlawh ang ang a Isua an va panna, an va hnaihna zawkah khan Isuan “Ka duh e lo thianghlim tawh ang che u” a lo ti zawk hlauh a ni. Chutiang chiah chuan kan nihna ang anga Lalpa i hnaihna zawkah khan Lalpa chuan a lo tithianghlim duh zawk che a ni.
I Johana 4:8 -ah chuan Lalpa chu hmangaihna a ni a ti. Pathian chuan hmangaihna a ngah, hmangaihna nasa tak a nei pawh a ti lo a, Pathian chu hmangaihna a ni a ti. Ni khi meialh hlawm a nih tlat avangin nunna leh enna a pe chhuak thin a ni. Chu chu a nih phung a ni. Chuvang chuan ni a rawn chhuah hian khawi hmun, kil tin a enna pek tur, a duh a thlang thei lo a, a tihtur chu enna a pe chhuak tawp mai a ni. Chutiang chiah chuan Pathian pawh hmangaihna anih tlat avangin, eng anga misual mibawlhhlawh pawh lo ni la.Pathian hnaih hmasa la, Ani chuan a lo hmangaihin a lo pawm ang che. A chhan chu hmangaih che leh hnaih che hi a nih phung a nih vang a ni. Lalpan malsawm rawh se.