PATHIAN HMANGAIHNA LEH THINRIMNA INTAWHNA KRAWS
Kristiante rinna innghahna laimu tak tak chu Kraws hi a ni tih kan hrethiam tlang vek awm e. Kraws tello rinna hi a pawmtlak zik tluak bawk lo a ni. Chuvangin Kraws chungchang hi kan han zir chiang leh dawn a ni.
1. Pathian thinrimna a rehna hmun a ni:- Mi tam takin Pathian thinurna hi kan sawi tam teh chiam tawh lo. Pathian hmangaihna hi sawi tam, ngaihthlak nuam a nih zawk vangte pawh a ni ang. Pathian thinurna leh hmangaihna hi Bible nen a in rem thlap e. Pathian chu hmangaihna a ni. 1 John 4:8. Mi suaksual leh rawng taka thil ti thin te hawtu a ni. Sam 11:6. A chang chuan mi hneh kan tum lutuk naah hian ‘Pathianin sual a hua a, misualte a hmangaih’ kan ti thin. Amaherawhchu, he thu hi thudik famkim lo a ni awm e. Pathian in misualte a hmangaih, a chhan chu Isua chhandam tur te an nih avangin. Sam 5:4-5; 37:13, 20; 101:7; 119:119 hi han en ta ila, Pathian in sual a lawm loh zia leh thil sual ti tu te a ngaihtheih loh zia chu kan hmu thei ang. Ringlo mite hnenah hian “Pathian in a hmangaih che” tih ringawt kan sawi chuan, sual a awm reng pawh hi a pawi chuang lo tih ngaihin an lo ngai dah ang tih pawh hi a hlauhawm a ni. Sual tlansana Pathian thinurna lak atanga an him theih nana Kraws bel turin kan hrilh zawk tur a ni.(Luka 3:7). Hmangaihtu dik tak chuan Setana nena in zawmna sual i neih hian a thinrim thin a ni. Thuthlunghlui ah an sual ngaihdamna atan vawi tam tak an inthawi a ngai thin. Mahse, Krista chuan vawi khat atan min lo tlaksak ta a ni.
2. Pathian rorelna chu a dik a ni tih lan tirnan: Pathian danah chuan sual hi hrem tur a ni. Sual man chu thihna a ni. Engvangin nge Pathian hian Krista chu a thih tir ngawt. Nang leh keia sual man hi thihna a ni. Chu thihna chu tlingtlak a nih hma chuan pek ngei ngei tur a ni. (Sual chu a te emaw, a lian emaw). Pathian chuan a fapa chu sual titu te tan a lo tir a, an sualna chu Kraws-ah a lo hrem ta a. Amaherawhchu, Chu Krista tuarna ringtute erawh chuan ngaihdamna an chang ta hlauh si a ni. Pathian chuan a Pathianna kalsan si lovin min chhandam ta a lo ni. Pathian thianghlimna chuan sual chu a hrem a, Pathian khawngaihna a inhlan ral a. Pathian in a phut chu, amah leh amah a in tum chawp a ni. Chuvangin, chhandamna hi a bul atanga a tawp thlengin Pathianin a lo hlenchhuak ta a ni.
3. Pathian khawngaihna a leihbuakna hmun a ni: Pathian tan hian a mihring siamte hi han chhan chhuah leh tur chhan a awm tawh lo. Kan fel lai ber pawhin pawnchhe hnangkhai ang kan ni. Felna lai ber pawh chhanchhuahna atan a tlak loh a ni. Rinna avanga khawngaihna a chhandam kan ni. Keimahni thawhchhuah a ni reng reng lo. Pathian hian min chhandam hian atana kan tangkai viau dawn vang a ni em? A tana kan hlut theihna lai kan neih vang a ni em? Thusawi ka thiam vang a ni em? Rimawi tum thiam i nih vang a ni em? Hnathawh lama i tangkai vang a ni em? Ni lo, Misual i tangkai lai ber pawha pawnchhe hnangkhai ang i ni. I chhuang dawn a nih chuan Pathian khawngaihna Kraws lera an khai kan Isua Krista hi chhuang ang che.
I tan ka tawngtai e, Kraws chu i pan theihna turin chu bak chu i tan chhandamna a awm si lo. Keimahah hian i thinlung thlak theihna pakhatte mah ka nei si lo. Darkar tam tak chhandamna thu ka hrilh ang che. Mahse, lungte hnena thusawi ang chauh ka ni ang, Pathianin nunna a pek si loh che chuan. I rilruah Krista mamawhna leh hnaih duhna i nei em. Khawngaihna avanga chhandam duhna i nei mial lo maw! kha duhna kha Pathianin a dah a ni, kha duhna khan Kraws hruai thleng che se la, Isua’n a lo nghahna hmun ngei chu thlen mawlh che rawh se.
Aw Lalpa, I thlarau thianghlim chuan chhandamtu lamah hip ang che. Krista neilo tute chu ti mangang ang che. Krista an hmuh hma loh zawng chawlhna chhete mah hmuh tir suh ang che. Isua Krista hmingin kan dil a che. Amen.