KOHHRAN ZAIPAWL
Lalthanliana
Bible : Ephesi 5 :19 , Sam 30: 11
Fakna hlate, Pathian hlate, thlarau lam hlate a inbe tawnin Lalpa chu in thinlungah hla sak sakin tingtang kaihsak rawh u.
Lalpa fakin zai ula,a hming thianghlim chu fak rawh u.
Mizo kristiante hi, vawiin thlengin Pathian kan fakna leh chawimawina langsar ber chu zài hi a ni. Kohhran kan hlim leh hlim loh tehna ber pawh kan zái boruak a nuam em? Hlim takin kan zái em? tih hi tehna pakhat a ni ve a. A hnam ang pawhin zái ngaina kan nih dan leh zái peih tak kan nih dan hi sawi tam ngai lutuk tur a ni lo ve. Naupang tawng thei tìr atanga pitar, putar thlengin, he zái ngainatna hian min kiansan lo va. Kan nunah hmun pawimawh tak a luah reng.
Heti taka zái kan buaipui avang hi a ni ang Serkawn Tualchhung kohhran pawhin a ngai pawimawh a, kohhran zaipawl tan Sum leh pai tamtak a seng fo reng a ni. Kum 2016 khan budget-ah Rs 3,33,500 zet a dah a. Kumin budget-ah pawh Rs 1,63,000 a dah leh a ni. Heti tak maia tualchhung kohhran a insengso hian a entir chu Zaipawl a ngaih pawimawh zia leh zaipawl rawngbawlna a dah pawimawh zìa tilangtu a ni awm e.
Kohhranin Eng vangin Nge Zaipawl a ngaih pawimawh
Kohhran hian eng lai pawhin thlaraubo a vei reng a, thlarau chhandama awm tawhte tan pawh hma kan sawn zel theihna turin hma a la reng. Tin, rawng kan bawl tlan theihna te ngaihtuahin kohhran member-te tana tha tur ang ber zelin theihtawp a chhuah thin a. A hma lakna langsar tak pakhat chu kohhran zaipawl hi a ni. Inkhawm boruak zalen tak leh nuam tak kan neih theih nan zai a pawimawh a. Pathian thuchah inhawng taka kan ngaihthlak theih nan zai hi a pawimawh bawk. Zaipawl rawngbawlna nung tak hian Pathian hlat tawhte nasa takin harh tharna a pe thei a. Nun ngui tawhte hnenah chakna a pe thei a ni tih hriain tawngtaina nen kohhran hian eng lai pawhin min tanpui reng zawk a ni.
Zaipawl leh Pathian Fakna..
Kan Pathian hi faka chawimawi tur kan ni a. A phu tawk fakna kan hlan lo fo. Fak leh chawimàwi kan tih hian thildang sawi tur a awm teuh ang a, kan rilru lang hmasa ber chu zài leh làm a ni ang. Fakna hla hmang a, Pathian ropuina hi kan chawimáwi thei a nih ngat chuan, zái mai tur kan ni a. Zaipawlah pawh tel mai tur kan ni. Kan fakna chhuanawm lo taka lawm thin a ni. Pathian hi kan fak loh pawhin a ropui tho va, faktu sang tamtak a nei tho. A mite pawl nana thu leh hla hmang thin Pathian hian, fak hla hmanga kan chawimawi hi a ngaihhlut ka ring a. Zaipawl hmanga kan fakna tlawmte hi rimtuia a pawm pawh ka ring bawk.
Zaipawla tel turin ka tling lo..
Mi tamtak, ngaihdan tha lo deuh chu “Zaipawla tel ve turin ka tling lo” tih hi a ni. Thenkhatin “Kei chu ka zaithiam si lo” kan ti bawk a. A ni viau mai. Tihian ngaihtuah teh ang, zaithiam tak ni ila, zaipawla telna hun nei lo lekin zái tura sawm kan ni thei a. Zaipawla tel tlak lo khawpa nun felhlel niin kan inngai a ni thei bawk, chu lam ngaihtuah hman a ni lo. Kan zaithiam loh avang leh kan insit avang tak hian tel tur kan ni. Kan thiam lohna leh tlin lohna kha hliahkhuhin a awm a, mawi takin Pathian ropui fakna’n a ri chhuak ta thin a.A mala kan zai a,mi nuih tiza thin kha mi thinlung hnehtu a ni thei. Mahni chauha kan awma belhchian tlak loh kha zaipawlah chuan nun awhawm tak a ni thei a ni. He taksa dam lai ngei, chak tha lai ngei hian A fak loh chuan hun dang a awm chuang lo.
Mi chi hrang hrang zai tura intel khawmin zaipawl a siam a. Aw-ri inang lo tak te, tha lo leh mawi lo tak tak tangrualin rimawi ropui lutuk a tichhuak thei a. Chu chu Kohhran Zaipawl tihlutu a ni. Thil danglam tak beisei tur a awm hran lo, kan Fak hian mawina aiin,a faktu thinlung a duhzawk a. Khawvel ngaihsan nih aia daikawm kar atanga Amah fakna ngaihlutu Pathian a ni. Kan tlin leh tlin loh te, thiam leh thiam loh aiin a tana kan inpek dan a pawimawh zawk.
Engtin nge ni ta ang…
Zaipawlah chuan tel ve ka lo duh a ni thei, thil dang ngaihtuah vak a ngai lo. Inpek ve tawp a ni mai tur a ni. Hruaitute’n an lo ngaihtuah ang a, an phal em em ang. Thil dang an phut tehchiam lo. A lawmawmin a va awlsam leh si ve.. Khawvel mahin a duhtui nen kan Pathian fak tura a kawng awlsam dan hi a mak zawk asin. Nang leh kei hi kohhranah chanvó tamtak kan nei lo a ni thei a. Pulpit tlang atangin thuchah ropui kan auchhuahpui lo a ni thei bawk e. TKP huangah pawh hla thlangtu dinhmun bak kan luah phak lo a ni thei, kan tel vena awm tak hi kohhran huangah thil dang a awm lo a ni thei e, mahse he zaipawlah hian a awm a. Neitu i ni thei a, Thuchah ropui hla hmangin i puang thei a ni. Hmun lailum tak luahin zalèn takin fakna i puang thei asin. Mahse, inkaihhruaina dan kan nei a, zawm a ngai ve thin. A harsa lo va, zawm loh a harsa zawk. Hmasawn zel tur kan nih avangin kan nuna tha lo lai paihthlaa hmasawn zel tur ka ni tih erawh hriatnawn fo a tul a ni.
Eng Nge a Hlutna..
Kohhran mi pawimawh tak ni tur leh neitu dinhmun kan luah theihna turin kohhran zaipawl hi a pawimawh hle. Kohhrana mi thar tan neitu nihna min pe theitu a ni a. Inthlahrung taka Kohhran bel thin tan kan harsatna min hnehsaktu hmanraw tangkai tak a ni bawk.
Chhawr tlakin min siam thei a, midangte nen rawngbawl ho dan min kawhhmuh bawk. Vawiin thlenga kohhran tana mi tangkai tak takte hian bul tan nan an lo hmang tawh thin a. Kohhran hi zaipawl nei thei lo khawpa a buai a, zaipawla tel tur pawh kan neih loh hun chuan kan chanchin hi thui tak sawi tlak a awm lo ang a. Kohhran mite’n zaipawl rawngbawlna hnualsuat a, telna tlaka an ngaih loh hunah chuan rawng kan bawlsakte’n kan rawng an bawl a ngai ngei ang.
Fak ula..
Kan Pathian hi fak tlak a ni a, fak ngei tur kan ni. Fakna chungchang hi Bible-ah tamtak kan hmu a. Fakna kan sawi ruala tel ve ziah chu zài hi a ni. Engvanga fak tur nge kan nih? Ti ila chhanna tamtak a awm thei ang. Zaipawl chauh hi fakna chu a ni lova, zaipawl kaltlangin kan vanglai tak hian Pathian i fak ang u kan ti zawk a ni. Pathian fak hi kan chakna a ni a. Thinlung taka Amah faktute hnenah ropuiin a inpuang thin. Fakna hi hnehna a ni a. Tlawmna tel lovin amah a fak theih loh, chapona tlangchhip atangin fakna tak tak a chhuak ngai lo va, a hlu bawk hek lo. Kan tlin lohna hre reng lovin kan tana thil ropui min tihsak avang zawkin Kohhran Zaipawl kaltlang hian Pathian I fak ang u.