KHAWVEL HI BO MAHSE, ISUA KA NEI
(KHB 150)
“Khawvel hi bo mahse, Isua ka nei” tih hla hi Kristian hla bu number 150 na a mi kha a ni. Mizo Kristian ten kan sak tam pawl leh kan tui pui em em hla a ni. Isua Krista neih pawimawh zia leh hlut zia uar leh thiam taka sawi lanna hla niin, he hla hi Sacred Selection for Churh hla bu-ah chuan number 658 ah dah a ni. He hla phuahtu hi Catherine Jane ( emaw Jane Catherine) Lundie Bonar a ni. A tawi zawngin J.C.Bonar an ti mai `hin. Robert Lundie-a fanu niin Scotland ramah December thla, kum 1821- ah a lo piang a ni. Scotland ram thuhriltu leh hla phuahtu lar tak Horatius Bonar nen kum 1843-ah an in nei a ni.
Catherine Jane hian a pasal rawngbawlna nasa takin a pui ve `hin a, harsatna leh manganna karah pawh a pasal rawngbawlna a thlawp tlat `hin a ni. An nupa hian fa 5-zet an sun nghe nghe a ni. ‘Isua ka nei’ tih hla hi kum 1843 emaw 1844-ah a pasal H.Bonar a hla dahkhawm “Song of the wilderness” tih ah dah tel ve a ni. He hla hi mizo `awngin Rev.Chuautera’n min dah sak. Rev. Chuautera hi a hming tak chu Chuaukunga (Mizoram Baptist Kohhran Pastor hming thang, “Kristian Vanram kawng zawh Thu” lehkhabu hmingthang lettu) a ni. A naupan laia an uipui mit terh chu Chuaukunga chhawnchhaih nan an hmang `hin a, Chuautera tia an koh fiam `hinna chu hmingah a pu hlen ta a ni. He hla hian he khawvel leh khawvel lo la awm tura Pathian nena hun hman dunna uar takin a rawn puang chhuak a ni.
Khawvel hi bo mahse ti a `anin he khawvel hi boral thei, tih chhiat theih a nih thu a rawn sawi a. Matthaia 6:19-20. He khawvel leh a chhunga hlimhlawp thil chi hrang hrang awm hian hlimna emaw, thlamuanna emaw, chawlhna pakhat mah a awm lo. Hmuh theih leh kan khawih theihte hian kan thinlung hruaibo lo se, khawih theih loh leh hmuh theih loh, awm bawk si te zawk chuan, kan nun min khalh kal zawk rawh se a ti. II Korinth 4.16-18. He khawvel sual leh a nawmnaah hian rilru nghat lo a, chunglamah chauh kan rilru nghat tur a ni tih min hrilh a ni, Kolosa 3:2. Jane Bonar hian he hla ah hian Isua ka nei tih hi vawi 12 lai a rawn chham chhuak a ni. He khawvel kan chenna hi thlakhlelh tur tam tak awmna hmun a ni. Kan thinlung thil tam takin min luh chilh lai hian Isua ka nei tih hian min fan chhuak ve dawn em le! Kan tui zawng, kan rilru luahtu hi Isua a ni em tih i in zawt thar leh ang u.
He hla hian mite hnenah testimony ropui a lo pe tawh `hin a, chung zinga mi pahnih chu i lo thai lang teh ang. Pakhatna chu, Rev. E.P. Hammond-a sawi hi a ni. Dublin khuaa Pu J. Denhman Smith-a’n rawng a bawl lai khan, fapa Willie-a kum 4 mi a nei a, naupang zai ngaina em em a ni. Vawikhat, naupang inkhawmna a`anga a haw chu an chhungin an zaiho ta a. Willie-a hi a kum la tlem hle mah se, hla tam tak chu a sa ve thei tawh a. “Khawvel hi bo mah se,” tih hla hi an han sa a. Willie-a chuan a sa ve duh ta hauh lo mai a. ‘Ka nu, chu hla chu sa suh u. Isua hi ka ta a la ni lo,” a ti ta reuh va! Pu Smith-a lo haw chu an hrilh a, ani chuan, “A naupang em a, a la hre ve rih lo a nih chu, thingpui kan in zawhah hla kan sa ho leh ang a, he hla pawh hi kan sa dawn nia,” a ti a. An han sak leh chuan, “Ka nu, he hla hi ‘sa suh u’ ka tih tawh kha, Isua hi ka ta a la ni lo va, ka sa ve ngam lo,” a ti leh ta a. A pa chuan mak a ti hle nghe nghe a ni. A tuk zinga tuk`huan an ei dawn chuan, Willie-a chu a lo tel ve lo va; a pa chu a pindanah a han kal chuan, naupang chu a khum bulah tih tak zeta `hing`hia `awng`aiin a han hmu a. “Ka pa, engtikah nge naupang inkhawm a awm leh dawn?” a lo ti thuai a, A pa in a awm hun tur a’n hrilh chuan, “Thlarauthianghlim chu keimahah a chen theihna turin, chu inkhawmah chuan min `awng`aisak turin hrilh rawh aw. `hian Isua ka chhar ta e,” tiin a pa chu a tir ta a ni. Naupang inkhawm lehah chuan tui takin Willie-a chuan hla a sa thei ta a. Inkhawm banah chuan a pa bulah kalin a pa kut chu a chelh a, “Ka pa, tunah chuan ka sa ve thei ta e, ~hian Isua ka nei ta” a ti a ni.
A dang leh chu, Kum tam tak liamta khan, Pastor thi mai tawh tur hian a khum bula amah uia awmte hnenah chuan, a thih hun a lo thlena amah `ah ai chuan hla pakhat sak sak turin a ngen a. Chu chu he hla hi a ni. Pastor hnuk chah lai chuan mittui nen he hla hmang hian an thlah liam ta a ni.
Thihna ka hnaih pawhin, Isuan min zui;
A hnenah min hruai ang,Vanram thlengin.
Chumi ka thlen hunin, Chatuanin ka chawl ang;
Amah chu kumkhuain, Ka fak fo vang.
Amah chu kumkhuain,
Ka fak fo vang.