KHAWNGAIH RAWNGBAWL HNA LALPA MIN PEK
K. Lalmuanpuia
Kum 1951 July ni 30 a piang, Krista leh Kohhran tan a ding, pawl pakhat, kohhran kut leh ke pawimawh tak zing a pakhat, TKP han chhuahsan dawn meuh chuan ngaihtuah na ava kal thui duh em.
Kohhran-ah hian mi chitin reng kan tel angin TKP member ah pawh hian Kum 14 – 40 inkar, vawi 10 aia tam piangthar tawhte, Pa lianpui mam per pur atanga pa te takte sam kir chip chep, hmul thip thuap te, ngaihsam em em te, hnatlan nikhua pawh a hmaraw thawhchhuah pui pawh hawn tum tawh lem lo leh mi hmanraw ken, mahni ta amaw ti a chuh chut chut chi te, mi chekngei ve tak tak awm khawmna a nih miau avangin han chet phawsawlh viau changte pawh kan nei a, hetiang zinga tel ve ngei hi ka nih avangin kei mi famkim lo tak rawngbawlna pawh hi Lalpa hian a lo pawm ve tlat mai si.
TKP a bul kan tan lai te rilruah a lo lang ve uar uar a, Baptisma chan zawh TKP inkhawm hmasa ber zan a Upa C. Zorema (Fam) TKP President in, TKP a min lawmluh atanga TKP member a ka tel ve tan kha kan ni a.
Krista leh Kohhran tan a TKP hruaitu ten ka rawngbawlve na tur a mawhphurhna min pek Bible chhiar, Thawhlawm khawn, Krismas Carol (Upa Lalrinmawia ho a) zan a Mike tlangarh putu leh Amplifire incharge, Petromax khai tu, TKP Group Leader, Ushering, Juniper Editorial Board member, Programme leh Executive Committee member a min ruatna te chak lo chung pawh ka tih ve talh talh avang in vawin a ka dinhmun hi Lalpan min pe a ni tih hi a va chiang teh lul em. Pathian rawngbawl tur hian te lua a lo awm hlei nem mawle. Kan hruaitu hmasa te khan kan tih awm tawk hi an va lo hre em.
Bible chuan “Pathian i zawn ngat ngat a……..… i tan bengvar a chhuah ngei anga, a tir lamah te mah la a tawpah i lian ang” a tih miau avangin rilru leh ngaihtuahna, mumang pawh a man chhin ngai loh TKP OB kan han ni ve ringawt mai hi mak tak a ni,
“Kei kum khuain Khawvel tawp thleng pawhin in hnenah ka awm zel ang”, ti tu kan Pathian chuan chak lo chung pawh a kan tih ve tlemte avangin, mawhphurhna lian tak min pein min chelh tlat reng a, ’Lalpa a rinna nghat tute chu an mualpho ngai lovang’ a tih tlat avangin amah ringtute chu an mualpho hi a phal ngai lo tih hi a va lang chiang thin tak em!!
Hei erawh hi chu a chiang a ni, Kohhrana mawhphurhna hi tlin vang leh fel vangte ni loin, chak leh thiltihtheih vang ni hek lovin, Pathian leh Kohhran belh ve tlat na avang a KHAWNGAIH RAWNGBAWLNA, Lalpa’n kan ko a nghah a ni tih hi a chiang hle thin a ni.
Rawngbawlna, Khawngaih rawngbawlna a ni tih kan hriat chhuah fo loh chuan mi dangte sawiselna leh tlinglo tihna hlirin kan khat fo ang a, kan peihlo chinah kan in rek bung fo ang a, chu chuan mi dang ni loin, keimahni ngei min vaw chau a, a tawpah mahni bawkin kan tuar leh thin. Hetiang mi hi Pathian pawhin a hmang tak tak thei thin lo. Chuvangin, khawngaih rawngbawlna hi kan chian fo a ngai. Mi fel leh tling chauhte telna tur nise Kohhran-ah leh Fellowship Organization hrang hrangah hian tel tur kan awm awm lo a sin.
Rawngbawlna-ah hian te lua a awm lo a, kan tihtheih tawk tur hotute kal tlangin, Pathian in min ruatsak thin tih hi hre thar leh ang u.
Hnatlang rawngbawlna te hlei hlei hi a pawimawh lai a ni tak a sin, Fellowship na tha tak a ni bawk. Keimahni Fellowship Programme Sunday tlai a kan nei leh Inkhawm atang ringawt hi chuan innelna leh rawngbawlho tur a inpawhna tur a inkawm nelna hman a awm thin lo. Pipe fit leh Blanket suk, lei laih leh thil dang hnatlang a tel nasa te hi chu a hun lai chuan hahthlak viau mahse, rawngbawl ho tur a inpawhna tha tak min neih tir tu leh thawk ho tur a min ti chak tu pawimawh em em a ni.
A tawp berah chuan TKP a ka member pui zawng zawng te, Kum thar atang hi chuan Kohhran leh TKP a tih tur, kan ko a Lalpa’n hotute hmanga a nghah hi kan duh chinah hian rek bung ve ringawt lo ila, chak lo chung pawhin Krista leh Kohhran tan tiin mahni infuih thar fo in, tiam chin lam panin Lapa rawng hi i bawl zel ang u.