Inhlantharna
Rev.P.C.Liandula
Kohhran leh a hnuaia pawl hrang hrangten kum a lo thar hian inhlantharna kan nei thin a, a tha khawp mai. Mahse, inhlan thar e ti si hian a ngai reng hian kan kal leh duh viau. Inhlanthar lehna thuchah atan inhlan thar satliah lo deuhvin “Intuai thar leh ang u” tih ka sawi duh a ni. Retreat tih hi intuai thar lehna tiin hrilhfiah a ni tlangpui a, kan hriat dan pawh a ni. Laltin tawng “Retrahere” atanga lo kal a ni a,“Tawlhkir” (draw back) tihna a ni. Mahse, awmze nei taka tawlhkir an ni thin.
Sipaiho hian “Retreat” hi an uarin an sawi thin. Mahse, an tawlh kirna chhan chu tlawm vang ni lovin, an dinhmun siam that leh nan te, an ralthuam leh hmanraw dangte tuai thar lehna atan te, an mamawh han chawk thar leh nan te, Headquarters nena an inzawmna tihthar lehna atante retreat hi an nei thin an ti. Chumi zui chuan keini Kristian-te pawhin retreat hi kan hmang deuh a, mahse, chumi rilru erawh chu kan pu phak lutuk lo thin niin a hriat.
Planning leh project tihhlawhtlin nana kan hman mai chang a awm. Kan sawi tak sipaiho retreat rilru kha chu kan pu pha chiah thin lo. Programme tihhlawhtlin nan mai ni lo vin, intuai thar duhna rilru pu ila, mahni mawi duhna mai ni lovin, Siamtu Pathian leh a ram tan hlu lehzual nih duhna leh tangkai lehzuala kan inhman a, kan hmanruate chu awmze neia kan hman thiam theih nan te, kan dinhmun siam that nante, thuam thar inbel lehna hun atante he hun rei lote hi hman i tum ang u. ~awngtai ila – Pathian hmaah i ding ang – kan inhmu chiang ber zel a ni. – Sipai rinawm, hlu lehzual ni turin kraws i vuan ang.
II Tim 2:1-4 thu hi ka lakchhuah duh hmasak a ni a. Kristian nihna tak hi Latin-hoten lal pakhat hnuaia sipaia inpekna (soldiers of a particular general) thu atanga lo intan ni berin mi thenkhat chuan an sawi thin. Chuti a nih chuan Paulan, Krista sipai tha tak angin hrehawm mi tuarpui rawh. Sipaia awm tura thlangtu chu a tihlawm theih nan, sipai tumah indo laiin tun dam chhung khawsaknate hian an intihnawk ngai lo va (3 & 4) tia a sawi pawh hi kan thupui nen hian a inhmeh em em a ni.
Pastor Paul Y. Cho chuan heti hian a sawi a, “Hun liam ta zawng aiin tunlai hian setana leh a tirhkoh ramhuai sual hoten kan khawvel hi an uap leh ta churh mai. Hremhmun lahin a theihna zawng zawng sawmkhawmin hurna te, dan leh thupek awmze nei lo te, tualthah leh pawngsualnate leh ruihhlote nasa takin kan hun hman mekah hian a rawn tipung lehzual ta,” tiin. A dik a ni. Kan ram leh khawtlangah hian setana sulhnu a lian hle. Hengte ngaihtuah hian tawlh kira kan dinhmun siam tha a, chakna thar kan lak a, kan ralthuam leh hmanruate pawh kan tuaithar a, thlarau lam thuam thara kan inbel a ngai khawp mai.
Tichuan sipaia min thlangtu min thanna leh min buatsaihna Kraws-ah kirin thuam thar inbel turin inhlan ila. Thutak hrengin, Felna awmphaw inbelin, Remna chanchin tha bunin ding ila, Rinna phaw keng ila, Chhandamna-lukhum khumin, Pathian thu-Ngunhnam chu i vuan ang u. Chutianga min thuam thar leh chu Pathian Thlarau Thianghlim min duh dan a ni a. Keimahni duhdan lam hi chu a ni lo mai thei. Lal rawng hi kan bawl a nih rau rau chuan a duh dan hi kan dah lal a tul ang.
Jeremia 1:10 thu kha ka lakchhuah leh duh a ni. Israel fate Pathian hmangaihna leh duhsakna tinreng dawngtu khan an Pathian chu an hransan a. Chutih laiin Jeremia chu din thar lehna hnathawk turin hnamte zingah chuan a ko a. Hnamte leh lalram chungah te pawt chhuak tur te, thiat tur te, paih thla tur te, siam tha tur leh din thar leh tura koh a ni. Jeremia kha a zam hle a, zam lo chi pawh a ni lo. An dodal ngei dawn tih a hriat bakah a zawlnei puite ngei pawhin an phatsan dawn tih a hria a.
A malsawmna tinreng chen a, a hmangaihna par tlan chungin an Pathian chu an hransan a, pathian dangte biain, inthawina an hlan a. An puithiamte lahin Pathian an ngaihsak lo va, dan hmangtu leh roreltuten Pathian an pawisa hek lo. An zawlneite meuh pawhin Baal hming lamin Pathian pawi an sawi a ni. Kan ram kan han thlir a, Israel fate ang bawkin phawi chhuah daih chi, thiah darh vek ngai, tihchhiat hlauh ngai leh paih bo daih tur tam tak a awm a, siam that tur leh din thar tur kan hmu teuh ngei ang. Chu hna chu thawk turin intuai thar leh kan ngaih theuh ka ring. Chu hna chu thawk turin kan sawi takte kha kan mamawh a nih ngei a rinawm. Chumi atana kan mamawh chu Lal Isua hnenah Kraws-ah a awm.
Inhlan thar kan duh takzet chuan kraws hi hlamchhiah theih a ni lo. Pathianin mihring hlui min siam tharna kraws-ah lo chuan intuai thar lehna hmun dang a awm lo. Hei aia standard sang leh hniam hi Lal Isuan a siamsak bawk lo. Kraws-ah chuan Thlarau Thianghlim hruaiin, an intuai thar leh thin a ni. Khawvel mite tihdan zawng zawng ti ve thei zelin rawngbawltu tha a nih theih loh. Sipai tumah he dam chhung khawsaknate hian an intihnawk ngai lo a ni.