ENGTIN NGE KA PIANTHAR ANG?
Billy Graham
Johana 3:5-7 ah chuan Isua leh Nikodema inbiakna kan hmu a, “Mi tupawh tuiah leh thlarauva an pian loh chuan Pathian ram an lut thei lo vang.” Heng zawhna hi rilruin a lo inzawt ta zung zung mai a ni. I piangthar tawh em? Nun inthlak thleng i ti emaw, Sual simna emaw, chhandamna i ti emaw pawh lo ni ta se. I nunah a lo thleng tawh em? Isua Krista chu i thinlungah a nung em? Nangmahah inhriatna i nei em? Kristianna leh sakhuana hi mi tam takin an zir a, an atchilh a. Amaherawhchu, Krista an pan duh si lo. Krista hnenah i inpe tawh em? Nikodema hi sakhaw hruaitu ropui a ni. Mahse, nunna tak chu a la zawng tho a ni.
Biak Ina nitin a inkhawm chung pawn chu chatuan nunna chu i la zawng si a ni. Kan thinlung ah hian hmun ruak tih khah theih loh a awm a ni. Kan chhia leh tha hriatna hian vawi tam tak, ‘Krista nen lo hian ka him lo a ni’ tih min hrilh fo a ni. Nikodema hi kar khatah vawi hnih chaw a nghei thin. Nikhatah darkar hnih a tawngtai thin. A nih leh Isuan Nikodema kha engvanga i piangthar tur a ni a tih? A thinlung phek kha Isuan a chhiar sak a, Pathian nena inthianna, inkawmna, thiltih dunna (fellowship) kha an nei lo a ni.
Engnge kan harsatna bul chu ni ta ang le? He khawvel a harsatna thlentu hi engnge ni ang? – ruihtheihthil, dawt, huatna, rinawm lohna, thiam reng thiam loh chantirna, intluk tlan lohna leh indona? Isua chuan, “Kaa chhuakte erawh chu thinlungah a lo chhuak a ni; chung ngei chuan mihring a tibawlhhlawh thin a ni.” Isua chuan a bul ber chu thinlung hi a ni a ti tlat mai a ni. Kan thinlung hi thlakthleng ngai chu a ni.
Rilru lam zirmi-te, Mihring khawsak dan zir mi (Sociologist), Rilru daktawrte hian mihring a dik lo awm hi an hre hle a ni. Bible hian chung zinga tam tak chu a sawi a, chung zinga pakhat chu bawhchhiatna hi a ni. I Johana 3:4 Sual chu dan bawhchhiatna a ni. Eng dan nge? Mosia dan, Thu sawm pek? A nih pakhat tal i bawhchhe tawh em? Dan chu zawh kim mahla, pakhata i bawhchhiat si chuan dan ah chuan thiam loh i chang tawh reng a ni. Sual han tih hrim hrim hian thil a nih tur ni pha lo, siam chhan anga awm lo tih na a ni. Bible chuan, “Fellohna zawng zawng hi sual a ni” I Johana 5:17. A nih leh van ramah sual a awm si lo, engtin nge sual awmlohna ah sual neiin kan luh teh lul ang. Pathian chuan, “Pa vana mi a tha famkim angin in tha famkim tur a ni” a ti hmiah mai si. Engtin nge ka that famkim ang? Khawiah nge ka that famkimna chu? Engtia neih tur nge? Ka neih rih si lo. That famkimna nei lo in Vanram ka lut dawn si lo. Hemi avang tak hian alawm Krista chu ka tan a lo thih; Kalvari ah a thisen chhuakin a nunna a hlan a, a tho leh ngei a, ka that famkimna turin a ni a tuar ni.
Kan khawlohna emaw sawi dan dangin kawngdik atanga kan bona, “Kan za hian beram angin kan vak bo va; mahni kawng kawngah kan peng theuh va; Lalpa chuan ani chungah chuan kan zaa khawlohna chu a nghat ta a.” Anih chuan kan za hian pianthar chu kan ngai ta a ni. Thinlung thar neih chu, kan sual te chu ngaihdam ngai a ni. He nun famkim lo hi a lo famkim theih nan mi dang a mamawh a ni. Chu innghahna atan chuan tunge ilo belh ve? Nge innghahna nei ve ngai lo mi i nih? I nun chhan atan Krista hi hmangin tih tak zetin han zui teh la aw! Vawikhatte mah inchhirin a siam dawn si lo che. Vawikhatte mah a phatsan dawn si lo che. I nun chhan, i damchhan ah Isua hi lo nei ang che. Tumah inchhir an la awm lo. Lal Isua Krista duh a, pawmtute inchhir pakhat mah an la awm lo e.
Piangthar nun chu engnge?
Mi tam takin an zawt thin? Nikodema pawhin a zawt a ni. Hriatthiam a duh avangin a zawt a ni. Nikodema chuan pawnlam chet zia leh nun dan (physical) chiah a hmu, mahse Isua sawi hi thlarau lam thil a ni. Bible in piangthar a tih chu heng mite hi an ni. Johana 1:13 Pathian hrin an ni. I nu leh i pa an pianthar avangin i piangthar ngawt lo a ni. Mi tam takin Kristian chhungkuaa an seilen avangin Kristian a maw an in ti ve ngawt. Mahse, Kristian an ni lo. Piantharna hi thawh chhuah chi pawh a ni lo. Bible chuan, “Thil fel taka tih, keimahni ngeia tihte chu, chumi avang ni lovin, siamtharna silna leh thlarau thianghlim siam thatna lehna chuanin a khawngaihna ang zel zawkin min chhandam ta.”
Insiamthatna (Reformation) pawh hi a tawk lo. Isaia chuan kan thatna lai ber pawh hi pawnchhe hnangkhai ang a ni a lo ti. A thenin Isua an te kan zir a, Isuan a ti angem tiin kan ngaihtuah thin thul. Kan lan dan, pawnlam miziate hi thlakin, kan nun dante tidanglam mah ila, kan thinlung hi thlakin a awm si lo a ni. Chutak chu a ni Isuan Nikodema hnena a sawi chu. Nikodem i thinglung thlak hlawk a ngai a tih chu ni. Chu chu thlarau thianghlim chauhin a thei a ni. Thlarau thianghlim chuan kan sualte min hriattir a, thiamloh min chantira Pathian laka misual kan nih avangin, Thlarau thianghlim chuan min siam thar a. Kan nitin nunah ka thinlungah awmin a lo nung a, nun dan tur min zirtir thin a ni. Chu mite chu mi piangtharte chu an ni. Pathian hruaia awm apiangte chu Pathian fate an ni si a.