HC. Lalrinliana
Damlo ten dam an thlahlel ngawih ngawiha, a dama te lah an hlim bik chuang miah silo. ‘Pawisa chuti zat chu han nei ila aw!’ kan ti a, a nei ther thur te hi an lo nui ver ver bik chuang hauh si lo. Ani saw chuan min han duh ve se chuan aw kan tiha, min lo duh ve em em te pawh hian; lungawina kim kan neih phah ngai chuang miah lo. Chutiang khawvela leng chu kan ni a, enge kan tan hian hlu ber ang le?
Mihring tu pawh maiin kan zawn leh kan thlakhlelh ber thin chu hlimna, nawmna ani. Inngaihzawnna ah tleirawl ten kan zawnga, kan hmu emaw kan tih lai mekin, rilru natna min thlen a. Hlim hlawp te kan han bawl a, a zawh rual rualin adang beiseinain min ti hrehawm leh nghal thin a. Vawiina kan hlimpui khan naktukah chuan min ti hlim zo tawh thin si lo. Sum leh paiah te kan zawnga kan rilru a hah zual sauh a. Zu leh drugs ten min chhawk thei dawn emaw kan ti a, min ti zahawm lovin, tuihal a zual zel si. Sex ah tal chuan tiin inthlahrung tak leh beisei nei takin bul kan han tan chhova, kan rilru min tihnat saka, beidawnnaah min hruai luta, mittui nen hun hmang chhovin; thih daih hialte duh khawpin setana bumna avangin kan awm thin.
Hetiang thil hi Kohhrana inhmang thin te leh, inhmang ngam lem lo te nun-thuruk, Lalpa mit hmuh a lang chiang em em si, Zoram mipui tena kan phat theih miah si loh nun chu a ni. Heng zawng zawng nun kan lo neihna chhan hi nu leh pa ten, kan fate tana hlu ber nia kan hriat leh, kan duhsak ber kawng kan zawh tirna atanga rawn chhuak ani mai em? Fate’n, nu leh pa hmangaihna an dawn thiam loh vang zawk ani mai em? kan BIBLE chuan “Mahni tisa lama thehtu chuan tisa ami chhiatna a seng anga, thlarau lama thehtu erawh chuan thlarauva mi chatuana nunna a seng dawn a ni” (Gal 6:8) tih min lo hrilh ve bawk si.
In pawm chu a har thin khawp mai, mahse kan na ani tih chu tuman kan hai thei lo. Kan tan a hlu ber leh nuam ber tur kan zawng theuhva, kan khawsak nawm ve theih nan te tiin, chu kawng chu harsa deuh mahse kan zawh lui hram hram thin. Chutianga Hlimna leh Lawmna kan zawn thin te chuan nun tuihal zualna mai min pe thin si a, hlim leh lawm kan duhna te hi a zual tulh tulh tho si.
Kan tana hlu ber nia kan hriat, hlimna tur nia kan ngaih kawng kan zawhna ah, Isua hi min veng turin kan dil thin. Kan lawmna(lungawina) tur nia kan hriat kan tih mek, alo hlawhtlin theih nan Isua tanpuina kan ngen thin. Anin min khawngaiha min pe a, mahse kan tuihal a zuala, beidawngin kan rum vawng vawng thin a lo ni. Kan la zawng fuh tawk lo ani ti ru !!
Kan tan chuan hlim leh lawmna tluka thil hlu chu a awm kher lovang. Chu hlim leh lawmna erawh chu; ISUA ah chauh hian ani a awm ni. I hmeltha in i luck viau ani maithei ! Chutiang mi i tling zo ve lova, insit takin i awm pawh ani thei e emaw, i lo upa deuh tawh pawh ani mai thei. Kan damchhung hi a reilo em em a, kan thatlai leh kan chhiat lai hun te hi an liam mek zel ani.
KA TAN A HLU BER, tunah leh chatuan pawha ka lawmna leh hlimna ber tur, ka hahdamna tur chu; LAL ISUA KRISTA chauh hi alo ni. In zawnpui tir lovin, amah ngei chu zawng zawk ila, kan hmu ngei ang.“Nangni zawngin mi hmu ang; keimah ka nun avangin, nangni pawh in nung ve ang” (Joh14:19).