Education Sunday Thuchah
ZIRNA HMANGA ENNA
Bible chhiar tur: Ephesi 5:8-10
Vawiin Education Sunday (Zirna pual Pathian ni)-ah hian zirna pawimawhzia kan ngaihtuah thar leh a pawimawh hle mai. Missionaryte kan rama an lo chhuah hma kha chuan kan ram hi a thim hle mai. Chanchin Tha eng nei lovin Setana leh a hmanrua sual bawihah kan awm a. Zirna sikul eng mah a awm loh avangin mawlna avanga khawvel eng hmu pha lovin kan awm bawk a ni. Vawiina kan thupui hi chawhma inkhawmah hun neitu in sawi sela, Thu chhiar tur buatsaih hi Kohhran Secretary in chhiar chhuah tur a ni. Zan inkhawmah tawngtai thupui dah sa hmangin tawngtai rual neih ni se. Programme kimchang siam a ni lo va, Tualchhung Kohhran kutah dah a ni.
1. A, AW, B neih leh zirna bul tan: Mizorama Missionary lo chhuak hmasa ber, Sap Upa leh Pu Buanga (Rev. F.W. Savidge leh Rev. J.H. Lorrain) te 11st January 1894-a an lo chhuah khan zirna sikul kan la nei lova, A, AW,B pawh kan la nei lo. Anmahni in zir chawpin thla thum chhungin Mizoram tana zirna lungphum A,AW,B an lo siam chhuak ta a. Chu chauh ni lovin Mizorama sikul hmasa ber chu 1st April 1894 khan Aizawlah an lo din ta a ni. Mizo naupangte lehkha an zirtir a, 1897-a Mizoram an chhuahsan thleng khan. Kum 1898-a Rev. D.E Jones-a lo chhuah khan Mission sikul chu a rawn thar thawh leh ta a ni. Sap Upa leh Pu Buanga Mizoram chhim lama Missionary tura an rawn chhuah leh khan 3rd July, 1903 ah Lungleiah sikul an hawng leh ta a. Heta tang hian thingtlangah sikul an hawn belh zel a. Sawrkarin Mission rawngbawlna a hmuh in tha a ti a, Mizoram zirna chu Missionary te kutah a dah ta a, April 1904 khan Sawrkar chuan Rev. F.W.Savidge leh D.E Jones te chu Honorary Inspector of school hmasa ber atan a lo ruat ta a ni.
2. Zirna hmanga Enna: Missionaryte kuta zirna awm chu a lo hlawhtling ta em em a, Chhim lamah Serkawn chu zirna hmunpui a ni a. A tira Primary school chu kum 1915 ah chuan Middle English School a lo ni ta a. Heta zir chhuakte hian zirna meichher chu chhi darh in thingtlang hmun hrang hrangah zirtirtu atan dah an ni a. A tira mipate chauh zirna chu hmeichhiate tan pawh a lo ni ta zela, Pathian thu Chanchin Tha leh zirna chuan Zoramah Enna a lo thlen ta a ni. Missionary te kuta zirna a awm chhung hian zirna in a ken tel hmasawnna pawh a lang tel zel a. Kum 1917 khan Zosapte hmalaknain Serkawnah Hockey khelh tan a ni a, 1920 khan Badminton leh Valley ball khelh tan a ni bawk. Infiamna chauh ni lovin Lungleiah Boy Scout din a ni a, Mizorama Scout lo awm tanna pawh Serkawna Zosapte bul tanna bawk a ni. Mizoramah pawh Sawrkar hmalakna a lo lian sawt ve zel a kum 1952 chuan zirna chu Mission kut atangin Sawrkar (Assam hun lai) in a lo la ve leh ta a ni.
Zirna hi hmasawnna bul leh innghahna ber a nih avangin sawrkar pawhin nasa takin hma a la zel a tunah chuan Mizoramah zirna kungpui University thlengin kan lo nei ta a.Mizoramah chauh nilovin thangtharte chuan khawvel ram changkang ber berah te lehkha an lo zir ve thei ta a ni.
3. BCM leh zirna : Tunah chuan Sawrkar leh mimalte thlengin zirnaah tan an lak laiin Kohhran pawhin hma lak nan kan la hmang zel a. Zirna bul thut (Elementary) atangin College thlengin kan la kalpui ta zel a ni. Kan Missionary te hun laiin kum 1952 khan Nursing School (ANM) Course chu tan a ni a, lo phuisui zelin tunah GNM zirna Nursing School puitling a lo ni ta a. Kum 1961 khan Christian High School Serkawnah din a ni a, 1997 khan +2 niin tunah hian KG 1 atangin Class XII thleng kan nei a, kan Higher Secondary School ah hian Arts, Science, Commerce, Computer Application leh MLT (Medical Laboratory Technician) zirna kan nei mek a ni.
Kum 2007 khan BCM chuan Residential College (HATIM) chu a lo din ve leh ta a. Mizorama Christian College awm chhun a ni a. Degree Course hrang hrang- Computer Application, Commerce, Arts (English) leh Social Work department te kan nei. State chhunga College tha ber pawl a lo ni ta. BCM Education Department chuan HATIM leh BHSS bakah Comprehensive School pakhat leh Primary school pakhat a enkawl a, hengte bakah Tualchhung Kohhran leh Bialten an din English Medium School 20 te tanpuina kan pe a, School thenkhat tanpui ngai tawh lote kan nei bawk. Zirnaah tan la zel ila, tunah hian Kohhran pawl thenkhat an harh chhuak a, zirna an lo uar ta hle a, hetih lai hian Mizorama zirna sulsutu ber Kohhrante hian zirna hi i uar zel ang u. (Ni Pawimawh bu 2015)