Thuawihna
Hripui (Covid 19) thawhhnihna-in min han nuai leh tak mup mupah chuan khawvel a buaiin nunphung pangngaia nun a harsa leh ta hle mai. Sawrkarin hripui laka kan him theihna turin ruahmanna hrang hrang a siam a, chumi zulzui chuan LCTF/VLTF-ten kan awmna veng/khua theuh mil turin ruahmanna an han siam leh a. A hmaa kan nunphung thin kha thlak danglam a lo ngaih tak avangin tam tak chuan hrehawm kan tiin zawm har pawh kan ti hlein a rinawm. Amaherawhchu, thuneitu lam ten kan him tlanna atan ruahmanna an siam hi thuawih taka zawmtu kan nih hi a thain a Pathian Thu em em a ni tih hi i hre tlang leh teh ang u. Eng emaw chhuanlam tha tak neih vanga dan palzut chhente hi intihtheihna chi a ni lo a. Ka himna a pawimawh tluk zetin midang himna atan kei hian mawhphurhna pawimawh tak ka nei a ni tih hi i hre tlat ang u. Bible hmun tam takah kan hmu a, Pathianin thuawihna a dah pawimawhzia leh chu thuawihna dan zawm lote chu na taka a hrem thute pawh kan hmu a. Hengte hi chhiar liam mai lova a taka nunpuitu kan nih hun chu tun hun hi a ni tih hre tlang leh ila. Kan himna tura dan zam hi a palzuttu ni lova tha taka zawmtu kan nih theuh hi Kristian tha tak nihna a ni tih i hre tlang leh theuh ang u.
