Tunlai kan hun tawn avangin rilruah thil tam tak a awm lai a ni a. Pawimawh ka tih em em pakhat ka’n thai lang ve teh ang. Hri leng avangin khawvel ram hrang hrangten ei leh bar leh nitin mamawh thawh chhuahna kawngah harsatna kan tawk nasa hle a. He kan India ram ngei pawh hi a tuartu zingah kan bang bik lo a. Kan state pawh hian engemaw chen chu tuar mah ila thawh chhuah kan neih loh lutuk vang zawng nge ni, a tuar na lo pawlah kan tang hlauh ti ila kan sawi sual awm lo ve. Lawm tur nge lawm loh tur tih pawh sawi thiam a har khawp mai. Amaherawhchu nakin lawkah he thil avang hian harsatna tawk thei dinhmunah kan ding ve tho tih hi hriat a tha a. Thalaite mahni kea din tumna kawngah hma kan sawn a ngai hle a ni. Kan thawh awm tawk thawh hi thil zahthlak a ni lo a, kan thawh awm ngawih ngawih pawh kan thawk peih lo hi a zahthlak zawk hle tih hriat a tha khawp mai. Eng hna pawh nise taima tak leh rinawm taka kan thawh hi a tha hle mai. A tam emaw a tlem emaw thalai ten thawh chhuah kan neih ve hrim hrim hi chhungkua, Kohhran leh kan ram tan hian a pawimawh hle tih hre thar leh ila. Kan phak tawkah taima takin kut hna a ni emaw eng hna pawh ni se i thawk ang u. Taima taka awm hi ringtu nun nen pawh a inrem em em a ni.
