DAIPAWNAH
Leviticus 13:45,46 leh Hebrai 13:13
Rev TC. Zodin Sanga
Executive Secretary, TLM, Mizoram
Thu hma:
Vawiin phar pual Pathianni-ah hian tawngtaiin kan thupui, BCM Hqrts-in an rawn thlan chu ‘Dai pawn-ah’, tih a ni tlat mai. Dai pawn hi hmun duhawm leh hmun tha a ni ngai lo. Khawpui a ni emaw, thingtlang a ni emaw, Dai pawn chu bawlhhlawh paihna hmun, sihal leh chinghnia, sanghar leh sachhiate tlatna hmun a ni a. Mihringte riahna tlak loh, in pakhat pawh awm lohna, hmun reh a ni. Chu hmun duhawm lo tak, ‘Dai pawn-ah’, tih chu kan thupui a ni miau si a, I ngaihtuah ho teh ang u.
1. Pharte hmun neih chhun a ni.
Leveticus 13:45-46 kan chhiar chuan, pharte dinhmun a sawi a. Phar hri vei chu a puante pawh thler, a sam thlah, a hmuichung lam tuam, ‘ka bawlh hlawh e’, tia au tur, ava rapthlak em! Khaw chhungah a awm ve thei lo. A awm hrang tur a ni. A awmna tur chu dai pawnah. Hei hi an dinhmun, Pathian thu in a puan a ni. Kei mahni ang mihring ve tho an ni a, phar in a bawm avangin dai pawna an awm hran a ngai ta; Bawlhhlawh anni ta.An va khawngaih thlakin an va lainatawm tehlul em ! Hei vanghian kumin phar pual Pathianniah hian kan thupuiah pawh ‘Dai pawnah’, tih hi thlan a ni ta a ni.
2. Lal Isuan daipawn a pan ve:
Lal Isuan amah pantu Phar in, ‘Lalpa, I duh chuan min ti thianghlim thei e’, ti a ngentu phar hnen a, “Ka duh e, lo thianghlim tawh ang che’’, ti tu’n a zirtirte a tirh chhuah pawha, ‘Pharte ti thianghlim ula’, ti tu Isua chuan pharte chan chang ve in, khawvel sual phur chungin, anchhedawng kraws pu in, Jerusalem kulh pawn lam Dai pawnah a nun min hlan ta. Phar ten, Puithiamin ‘phar hri vei chu bawlhlawh a ni a, a awm hrang tur a ni, a awmna tur chu Dai pawn a ni’, tih a puang anga daipawn a an hruai angin Isua Krista pawh kan sual anchhia a phurh avang leh Pilata’n Kraws a khenbeh tura thu a pek angin, Jerusalem kulh pawn Dai pawnah, pharte tuar ang tuarin, hmusitna leh endawngna nen Dai pawn an pan pui ve a ni.
3. Dai pawna kal chhuak ve turin min ko:
Chutichuan, amah an hmuhsitna chu phurin dai pawnah a hnen lamah i kal chhuak ang u (Hebrai 13:13 ). Hebrai 13:13 kan chhiar chuan Amah (Isua) an hmusitna phur chunga dai pawna kal chhuak ve tura sawmna leh kohna, ringtu ten kan dawng a. Ringtute hian Lal Isua hi kan zui dawn a nih chuan kraws pu chungin dai pawn a pan a, kan sual tlan nan, kraws maichamah kan tan a inhlan a, a nun min pe a ni. Kan tan, pharte tan, mi zawng zawng tan Dai pawnah kalin a nunna min hlan a, kan dam ta. Pathian ta kan lo ni ta. Kan taksa, kan rilru, kan thlarau min tidam ta. Keini pawh dai pawna kal ve turin min ko va, ‘Amah an hmuhsitna phurin a hnenah Dai pawnah i kal chhuak ang u’, min ti a ni.
4. Dai pawnah chuan eng nge kan hmuh ang?
i) Lal Isua, a thisen min hlan tura dai pawna awm, Kalvari Kraws maichama kan tana thi kan hmu ang. Min hmangaihzia kan hmu anga, ‘min hmangaihtu Lalpa ka hmangaih che’, tiin lawmthu hrilhin kan fak ang.
ii) A hmangaih pharte pawh dai pawnah chuan kan hmu ngei bawk ang. ‘Pharte ti thianghlim ula’, min lo ti leh anga, a hmangaih pharte kan hmu ve tel ngei ang. Dai pawnah pharte chu an hmun a ni si a.An taksa, an rilru, an thlarau dam nan rawngbawl turin, Lal Isuan Dai pawna awm Pharte tan rawngbawl turin mi lo hrilh ngei ang.
5. Engtinnge Pharte kan tih thianghlim ve ang?
i) An tana tawngtaiin.
ii) TLM Membership leh Gift pein.
iii) Donation hmangin.
Thu kharna:
Nurse-te chawimawina sang ber‘National Florence Nightingale Award 2009’ dawngtu Pi Zawni chuan, ‘Farkawn daia kum rei tak Phar an dah Pi Suniangi khawtlangin tualchhunga awm an phalloh, damdawi lam thawktute pawhin an tlawh that ngam loh leh mipui pawhin an pawh ngam loh, ka hna pangngai thawk chunga ramhnuaia kum li chhung vel a enkawl avanga chawimawina dawng a nih thu a sawi.
Kan taksa ngeia pen chhuak ve in Pharte hnen kan thleng ve kher lo thei e. Mahse, heng hmang hian Daipawna chhuakin rawng kan bawlin Pharte kan ti thianghlim thei a ni. Hengte hmanga pharte tana rawngbawl turin Amah(Isua)an hmusitna phurin Dai pawnah, Lal Isua leh Pharte awmnaah i kal chhuak ve ang u. Hetah hian khaw hmun nghet kan nei si lova, khaw lo la awm tur chu kan zawng zawk a ni, Amen!