ABRAHAM LINCOLN-A NUNAH ISUA KA HMU!
H.Lalrinawma
Rob Bell show pakhat ‘Everything is Spiritual (Engkim hi alo rau vek mai)’- tih 2010 kuma ka en hnua ka rilrua zawhna lo awm chu vawi duailo ka lo chhiar chhuah tawh Rev.H.Sangchema lehkhabu ‘Mahni Nun Dinthar’ tih phe6k 46 na-a inziak Abraham Lincoln chungchang atangin kan zirho dawn a ni.
Sal chhuahtu ropui Abraham Lincoln (Ab-a) khan hling leh hriam karah ro a rel a, thlawptu tam tak karah hawtu/dotu engemaw zat a nei tel. Tin, heti hi a ni a, Chhimlam Sipai tang pakhat khan an zuah a rin loh em avangin theihtawpa anchhe lawhin a sawichhia a. Chupa chu mak tak maiin a ngaidam, chuta chin chu amah tantu rinawm ber alo ni ta.
Vawikhat pawh President thutthleng a luah hlimin mi pahnihin hna thuhmun an dil a. Pakhat chu election dawna amah campaign puitu rinawm deuh a ni a, midang chu a khingpui lam party thlawptu a ni; a khingpui thlawptu zawk chu hna a pe daih.
Luka 5:32-ah, “Mi fel takte lam tura lo kal ka ni lo va…” tih kan hmu a, fair lo’ti ve thin kan awm em? Theihpatawpin Ama zarah fel kan tum ve char char a, sim ngaite kan sim a, kan tih chak em em thenkhatte ti thei loin kan awm a; mifelte a lam dawn si loh chuan inlak fel viau hian awmzia a nei em? Sual chhunzawm zel hi a hit ru phian zawk lo maw?
Luka 15:31-ah fapa tlanbo alo let laia apa hlimzia kan hmu. Duat theihpatawpin a lo duat. Fapa upa zawk a hlim ve hauh lo. “Tin, ani chuan a hnenah, ‘Ka fapa, ka hnena awm reng i ni alawm, ka neih zawng zawng hi i ta a ni e…” a ti a. Pa berin upa zawk thinrim leh thikna-a khat a khap daih dan a ni.
Thuthlung Hlui hun lai ang thovin, ‘Min duhsaktu te leh min duattu te duat/duhsak let ve hi kan mawhphurhna a ni’’ kan ti thei awm e. Mahse, Lal Isua kha chuan ‘dan ding lai’ kalh chiahin, “In hmangaihtu te chauh in hmangaih hian lawmman eng nge in hmuh ang? Chhiahkhawntute pawhin chutiangin an ti ve lawm ni? Tin, In unaute chauh chibai i buk hian eng nge in tih hnem chuan bik? Jentail-te pawhin chutiangin an ti ve lawm ni? (Matthaia 5:46,47)” tiin ‘Remruattu Maka’ a nihna lai a lo tarlang daih!
A thusawi awmzia chu “Min hmangaihtute chauh ni lo, min rel thintu/hawtute pawh hmangaih tur an ni. Tin, chibai min buktu chauh ni lo, an laka thil tha dawn let kan beisei miah lohte pawh chibai bukin thatna kan lantir tur a ni,” tih a ni tlat! Ab-a khian khi hmelma sipai khi khaihlum tir se tuma’n an dem hauh lo ang. Mahse, huatna nen sipai pakhat a thi ang a, a chhungte’n an haw kumkhua tawh ang. Ngaihdamna avangin sipai pakhatin nun thar a nei a, a chhungte an lawm a, Ab-a lamah a tang kumkhua ta.
Hna pawh khi ama campaigner zawk khi pek awm a nia, mahse a lamtang sa tihlawm a ngai lo a ti a ni mai thei, lamtang siam belh nan midang a pe niin a lang tlat. Football Joke pakhat, “Kei aia thiamlo pawh in thlak loa, kei kher min thlak a; yes, lehlam pawl ka tan nghal,” tih zawngin la ta se chuan Ab-a pawl a nihna chhan kha therhlo beisei vang a nih theihna a awm ang.
Thiltihtheihna leh ropuina mite’n an chan vanga an lama kan tanna hi eng anga nghet nge ni ang le? (Sorkar leh Society-a chanvo nei sang te). Luka 5:32-a misual lam tura a lo kal thu a sawi khian misual ngawr ngawr a duh a ni ber lo. A fel sa chu an him tih a hriat leh beisei vangin ‘tlawn leh duat’ viau ngaiah a ruat lo ani thei a, A ta la nilo te kha A lo ‘focus’ zawk a ni thei tlat a ni. Vawiin hian chantawkah kan lungawi nge Fapa Tlanbo lo letin a dawn ang duhsakna leh ropuina kan la beisei reng zawk? (Kohhran a chanvo, mi hriat nihna leh zahawmna leh adt.)
Midang chan tha kan thik rualin kan chanvo (Vanram) hlutna kan ngainep a, kan tawngtaina leh kan dilnate pawh min chhang ve ngai ta mang lo angte hialin kan hmu a; keini aia sual ve leh chhawng nia kan hriatte hlawhtlinna leh malsawm dawnte kan lo hmu mawh ve hial thin em!?
Lal Isua khan awmze neiin engkim a sawi thin. “Ama ta sa, duhsakna pawh a hranpaa pek viau ngai ve tawhlo khawpa rinawm nge i niha, tlawn leh duat reng ngai ringtu nghet lo?” tih hi zawhna pawimawh a ni e!
Engkim hi a thlirtu thinlung a zirin a lo rau thei hle mai. President Abraham Lincoln nunah Lal Isua ka hmu tlat a ni!
(A hun chep tak karah sermon tha leh ngaihnawm, zirchian tlak tak mai kan ngenna anga min rawn ziah sak avangin kan lawm takzet a ni. A rawngbawl zelnaah Lalpan vengin awmpui zel rawh se. – Editorial Board )