KNP CHANCHIN
Pi R. Lalhmingthangi
Juniper Editor in KNP Platinum Jubilee pualin KNP chanchin ziak tura min sawm hi ka phu lova, ka huphurh hle a. Amaherawhchu, ka lawm em em bawk si a ni.
29th March, 1943-a Serkawn Kohhran Upa rorel chuan inkhawmnaa naupang te lo enkawl a, huikhawm thin turin Kohhran Committee member pahnih, Pi Zoduhi (Zosap) leh Pi Rovi (Rochhingpuii) te a ruat a. Anni hian 23rd April, 1943, Easter Sunday-ah naupang te chu thutkhawm puiin an huikhawm ta a. Hei hi KNP lo dinchhuahna a ni ta a ni. Tichuan, Pathianni tuka thutpui mai ni lovin, a hranpain inkhawmnate an neihpui ta zel a. Hruaitu dangte an ruat belh a, chungte chu Tv. Vanlalkunga, Tv. P. Lalsawma, Nl. PC. Nuchhungi, Nl.LH. Lianhliri leh Nl. C.Laltawni te an ni a, Pi Zoduhi leh Pi Rovi te nen, hengho hi KNP hruaitu hmasa ber te an ni.
“KNP” tih hi a tirah chuan “Kohhrana Naupang Pawl” tihna a ni a. A hnuah Kristian Naupang Pawl ti hian thlak a ni leh ta a ni. Pi Zomawii (Miss JT. Smith) khan hunrei tak KNP a lo kaihruai a. Ama ho hian 4th March, 1968 ah naupangte kaihhruai dan mumal deuh te sawihovin hruaitu turte an inruat thar a ni. 1967 BCM Assembly chuan naupang inkhawm hi a pawimawhzia hriain KNP hi khaw tinah neih ni se tiin a rel ta hial a ni. Kum 1968 atanga 1983 chhung khan KNP hi BKHP in a enkawl a. Kum 1984-1994 chhung Baptist Sunday School Union of Mizoram in a enkawl leh a. Kum 1995 atanga 2001 khan BCM Assembly chuan Christian Education Department hnuaia peng pakhatah a dah ve leh a ni. Christian Education Department hian “Naupangte ~hian” chanchinbu January 1997 atangin a tichhuak a, tun thlengin chhunzawm zel a la ni.Kum 2001 atangin KNP chu Organiser hran neiin Director, Fellowship Organisation hnuaiah fel zawka inrelbawlin a lo awm ta a ni. Tunhma deuh chuan KNP Day atan kum tin February Inrinni vawihnihna ram pumah hman thin a ni a. Kum 2002 BCM Assembly chuan Serkawna KNP an din tan ni 23.4.1943 chu KNP din niah a pawm a. Heta tang hian KNP Day hi a hun dik takah hman a lo ni ta zel a ni.
Serkawn KNP ten Headquarters ah KNP flag neih, KNP Day atana Serkawna a din tan ni 23.4.1943 hman, Diamond Jubilee denchhenin unit tina KNP member zawng zawng hnenah BCO tanpuina khawn tihte, rawtna an thehluh chu headquarters chuan a pawm vek a, a lawmawm hle a ni. KNP inkhawmpui hmasa ber hi kum 1971 ah Lunglawn Biak Inah neih a ni a, Isaia Bung 53 hmangin changvawna inelna neih a ni. Serkawn KNP hian Lunglei Bial a nih lai atang tawh khan lawmman pakhatna hi an dawng ve fo mai. Kum 2003 hma lamah chuan Serkawn KNP an sum mamawhte thawkchhuakin sum an tuak thin a. Kum 2003 kha KNP Diamond Jubilee a ni a. Theihtawpa ropuiin Serkawn KNP te hian an lawm a ni. Jubilee lung phun a ni a, souvenir magazine buatsaihin, ruai pawh theh a ni. Hemi lawmna pakhat atan Serkawn Tualchhung Kohhran Committee-in KNP te dilna a tihhlawhtlin sak a, Dt 12.1.2003, Pathianni Zing inkhawm chu KNP pualin an hmang a ni. Diamond Jubilee-ah hian sum mamawh a tam avangin hruaitute nasa taka inhlawhfain vawk pawh tam tak an talh a ni. Tunah erawh chuan KNP-te mamawh hi Serkawn Tualchhung Kohhran Committee-in a pe vek zel tawh a, sumtuakin engmah tih a ngai ta lova, a lawmawm hle a ni. Tunah hian Pathian thatna avangin Platinum Jubilee hial te kan lo thleng ta reng mai. A lawmawmin a va ropui em ! He hun min hruai thlengtu Lalpa chu fakin awm se la, KNP hruaitute leh member-te, he hun min hmanpui thei ta lo, khawvel chhuahsan tawhte erawh chuan khua an ti har dawn hle a ni.
A tawp berah chuan KNP pawl hming hi “Kristian Naupang Pawl” a ni a. He hming pu tlak hian ka awm em? tih hi KNP member te hian ngaihtuah theuh ila. KNP thuvawn – LALPA, THUSAWI RAWH, I CHHHIAHHLAWHIN A NGAITHLA E tih kha hre rengin, Lalpa thusawina tlak ni turin naupang ten, kan nun i vawng thianghlim zel ang u.
KNP member-te leh hruaitu zawng zawngte Platinum Jubilee chibai ka buk a che u.