Isua’n ropui taka Jerusalem a luhna kawng kha, Rev. Kelvin L Jones-a chuan ‘Hnehna Kawng” (Road to Victory) tiin a sawi a, Isua kha “Hneh tura Jerusalem-a lut a ni” a ti a, a dik hlein ka hria. A chunga Bible chang kan tarlan hi kan chhiar chuan Isua’n Hnehna kawng a zawh lai khan mipui tam takin an zui a, Amah chawimawiin an au tih kan hmu a. Keini pawhin hemi hriatreng nan hian vawiinah Tumkau Pathianni hmangin Isua fakin naupangte pawh an au a ni.
Tumkau Pathianni kan hman mekah hian Isua’n ropui taka Jerusalem a luh laia Amah faka au mipuite leh an fakna chungchang kha lo ngaihtuahho ta ila. Khang mite khan engvangin nge Isua an fak a, an chawimawi?
a) Mipuite khan Isua kha a thil tih te avangin an chawimawi a ni. Damlo a tihdam te, thilmak a tih te an hria. Luka 19:37-ah “Tin, an thlen dawn hnaihin, Olive tlang liam dawnah chuan, zirtir mipui zawng zawng chuan a thilmak tih zawng zawng an hmuh avangin an lawm a…” tiin a sawi a. Khang mipui te’n an hmuh ve loh thil tam lehzual hmutute kan nih avangin Isua hi nasa lehzuala fak tur kan ni. Damlo a tihdam te, mitthi a kaihthawh te, thlipui a haureh te mai bakah thihna hneha a thawhleh thu te kan hria a.
Kum 2000 aia tam a ral hnuah Isua’n inngaihtlawmna nena krawsa thihna hmanga A din Pathian Ram hi a la zau zela, Rom sipai ngunhnam, Communist silaimu leh Islamic State te chemte hriam pawhin a tukdawl zo lova, finthuril (philosophy) sang tam tak hmanga hnial bo tum ni mahse A Hming a la ropui zual zel a, a ram a zau zel tih pawh a tak ngeia hmutute kan ni. Jerusalem a luh laia Amah chawimawitute ‘n thinlung leh tih takzeta an chawimawi chuan keini hian kan theihna zawng zawngin kan chawimawi tur a ni.
b) Isua kha A nihna an hriat avangin an fak a ni tih Luka 19:38 kan chhiar chuan a chiang a. Jerusalem a luh laia Amah faktute khan Isua nihna hi eng chen chiah nge an hriat ang le? Josefa fapa, Nazareth atanga zawlnei lochhuak a nih thu chu an hre ngei a. Pathian atanga thilmak ti thin a ni tih pawh an hmu ang. An auhla atanga a lan danin Davida thlaha lo piang a nihzia pawh an hria a. Israel te lal ropui ni turin an ngai a, Messia an beisei chu niin an hre bawk. Heng te vang hian Isua an chawimawiin an fak a ni.
Keini hian heng mite ai hian Isua nihna kan hmu tak zawk a, fakna chhan tur kan ngah zawk a ni. Kan tana thia tholeh, kan Chhandamtu a ni tih kan hria a. Vana a lawn hnuah pawh Thlarau Thianghlimin min chenchilh a, Pathian kan hnena Awm-a chu a la ni reng tih te kan hria a. A mite a la ensan ngai lova, A Kohhran te a thlahthlam ngai lo, kum 2000 chuang kalta a, Jerusalem-a an chawimawi hunlai ai khan Krista nihna leh ropuina pawh a langfiah lehzual tawh em em a, Amah fak mai loh hi chu tih tur kan nei lova ni.
c) Fakna leh chawimawina changa Hnehna Kalkawnga Isua a kal mek lai hian fakna leh chawimawina duh ve lem lotu pawh an awm ve a ni. Luka 19:39 ah chuan “Tin, mipui zinga Pharisai thenkhatin a hnenah, “Zirtirtu, i zirtirte hi zilh rawh,” an ti a” tih kan hmu a. Mahse Isua chuan “Ka hrilh a che u, hengte hi an ngawih reng chuan lungte tal an au chhuak tur a ni,” (19:40) tiin a chhang a ni.
Isua leh Pharisai te inbiakna atang hian Isua khan Amah faktute fakna kha a pawm a, a lawm a ni tih a lang a, mipui te’n fak lo mahse Amah fak turin lung te pawh Pathianin thu a pe mai dawn zawk a ni.
Isua Hnehna Kalkawnga harsatna lo siam tumtu Pharisai te chungchanga kan zir tur tha tak mai chu Lal Isua awmnaah leh a hnathawh a lanna hmunah hian hmelmate pawh hnai takah an awm ve thin a, fimkhur fo tur a ni tih hi a ni. Kohhranah puiah, F.O. ah, Zaipawlah, Para Church-ah leh kawng hrang hrangah Isua hnungzui a, rawngbawl hna kan thawh lai hian hmelma pa leh a hote hi rin aia hnaiah an awm ve reng thin tih theihnghilh lo ila.
A tawp nan, hriat tur pawimawh ber chu Isua khan Hnehna Kalkawngah, Jerusalem a luhna kawngah khan Amah chawimawi turin mi ropui ber ber a thlang lova, A Hming faka au turin a aw mawi mawi a thlang lo. Amah fak leh chawimawi nana an hmanraw hman te pawh a mawl khawp mai. A kalkawngah an puan te an phah a, tumkau an keng a, Amah fakin an au mai a ni. World class hmanrua an hmang lova, thil ropui ber ber an thlang khawm kher lo. Mahse, a chunga kan sawi tawh ang khan Isua khan an fakna kha a llawm a, a pawm a, Pharisai te’n titawp tura an tih pawhin a titawp lo a nih kha.
Kan phak ang tawk tawka kan fak leh chawimawinaah hian Isua hi a lawm thin a ni. Amah fak leh chawimawi tih hian zai leh lam ringawt a huam lovang a, A Hming ropui nana kan rawngbawlna zawng zawng, inkhawm, hnatlan, thilpek, midangte tanpui etc thlengin Isua fakna hian a huam vek a. Kan thiam ang ang leh kan phak tawka kan tih ve te hi khawngaihna vangin min pawmsak a, a lawm a ni tih hre chungin Lal Isua ropui nan A hmaah kan thinlung puan phahin, kan nitin nunah Kristian Nun mawi taka nungin kan nun pumpui hi Amah chawimawi nan i hmang ang u.
“Chawimawina ropuina zawng zawng,
Lalna leh thuneihnate;
Chatuanin A ta a ni,
Haleluiah Hosana”
