STK THUHLA
⇒ Dt. 20.6.2021-a Pathian Ram Thilpek chhiar felah Rs. 12,74,670 hi June thla chhunga Hqrs-a kan pêk luh theih chin a ni. Headquarters-a kan target hi a vaiin Rs. 1,56,00,000 (Nuai 156) a ni a. Thla tin Rs. 13,00,000 (Nuai 13) hisâpa pêkin kan tlin thei dâwn tihna a ni. Thla hmasa (June) bîkah Rs. 25,330-in kan thla khat bî tûr kan phâk lo va; amaherawhchu, April thlaah kan lo khûm deuh avângin thla thum (April to June) chhûnga kan pêk tûr chin kan khûmna Rs. 42,990 a la ni. July thla atana Envelope lâk khâwm leh hun atân Dt 18.7.2021 ruat chhin leh phawt a ni e. Theihtawp chhuaha thilpêk hmanga Pathian ram tâna thahnemngaitu zawng zawng chungah lâwmthu kan sawi tak meuh a ni.
BCM THUHLA
⇒ Dt.4.7.2021 (Pathianni) hi Mizoram Baptist Kohhran ni pawimawh ‘Mission Sunday’ a ni a. He ni hi kum tin, July Pathianni hmasa berah hman thin a ni. Kumin Mission Sunday-ah hian thupui atan chuan “Tun hi hun lawmawm, chhandamna ni a ni” (II Korinth 6:2) tih a niang. Kum dangah chuan Mission Sunday-ah hian Pathianni zing leh zan inkhawmah Mission Sunday thupui hmangin Tualchung Kohhran tinah thuchah ngaihthlak thin a ni a. Pathianni chawhnu lamah Mission rawngbawlna chanchin leh hmasawn zelna atan infuihtharin, inpawlhona te buatsaih thin a ni. Kuminah erawh chuan Covid-19 hrileng avanga Kohhran Programme-te hman theih a nih loh avangin TV lamah Mission Sunday Puala thuchah Rev. Dr. C. Vanlaldika, AGS (Mission) sawi chu pek chhuah a ni ang.
⇒ Dt.29.6.2021 khan CASA, India leh BCM Relief & Development tangkawp chuanCovid 19 dona program atan Initiative of Peace and Economic Development (IPED) Project hnuaia target khaw 10-ah sanitizer leh mask semna neih a ni a. Sanitizer bur 27 leh mask pack 250 theuh target khawtinah sem a ni a. Hengte hi BCM R&D project hnuaiah target khaw hrang hranga pawl din ‘Community Based Organization’ (CBO) kaltlang a pek an ni. Tin, Vairengte, Buhchangphai, Phainuam leh Rengtekawnah te leh One Stop Center Kolasib-ah te Blanket pek an ni bawk. He programme hi Bialtu Pastor ten hman puiin thilpek hi an hlan a ni.
Mission Sunday hman tan a nih dan
Tuikuk-Takam te veina nasa tak Kohhrante atanga a awm avangin kum 1939 Chapchar Assembly, Thiltlanga neih chuan a ngaihtuah ta a, Tirhkoh pahnih rawih a rel thlu a. ‘Easter Sunday zing thawhlawm pawh mission pual atan dah ni se’ a ti a. Hei hi hun rei fu chu hman a ni. Kum 1949 Assembly khan ‘July Pathianni hmasa ber zing thawhlawm chu Tuikuk/Takam pual a tan dah ni se’ tiin a rel a. Hun eng emaw chen Mizoram buai avangin a khaihlak deuh a, Kum 1975 khan ti thar lehin, hemi ni hi Missionary Sunday atan hman a lo ni ta a ni. Kum 2016 Assembly chuan kan hman dan leh a hming hi inmil zawk turin, ‘Mission Sunday’ tiin a thlak ta a ni. July Pathianni hmasa ber zing thawhlawm pawh he ni pual hian hman chhunzawm zel a ni ta a ni. BCM Mission report hnuhnung ber, Assembly-2021 report-in a tarlan danin BCM Mission hnuaiah thawktu (Mission Workers) 1432 an awm mek a. Mission Fields 25 neiin, tunah hian Mission Field thar Upper Assam Field chu hawn fel a ni tawh bawk.