THUHLA
STK COMMITTEE MEMBER-TE HRIAT TUR PAWMAWH
Dt. 4.6.2021 khan STK O.B. te chuan STK Committee aiawhin meeting neih a ni a, thu rel kan hriat tlan tur engemaw zat zinga a hmanhmawh thlak zual kan han inhriattir duh a, khawngaih takin a tul anga lo bawhzui theuh turin kan inngen e.
1. Kan kohhranah Lockdown avanga ei leh bara harsa zualte kan lo awm ang tih hi a hlauhawm hle a. Bial neituten mahni biala chutiang dinhmun harsa- ei leh bara harsa te emaw, hnathawh hleih theih loh avanga in luah man pawh pe hlei thei lo te, chhungkaw bawrhsawm avanga a ruka lo harsa viaute kan lo awm em tih hi ngun taka chîkin hriat tum theuh ni sela. Chutiang tanpui ngaite kan awm chuan STK Secretary hnenah 8.6.2021 aia tlai lovah report ni se; O.B. ten thlir zui leh ni se, tih a ni. Heng hi R&D account lam atangin a rang lama relief phawt ni se, tih a ni. (Note: R&D Committee Plan-a awm sa, chhungkaw harsa zualte chhawmdawlna pek- June & December tih hi chu R&D lamin tun thlaah emaw, July thla tir lamah an la ngaihtuah tho tura ngaih a ni e).
2. Covid-19 hripui avang hian eng chen nge online Sermon buatsaih la ngai tur hriat lawk theih a ni lo va. Hun changtuten theihtawp chhuaha kan inbuatsaih thin hi chhunzawm zel turin kan inngen a. Kohhran mipuite hian thusawitu aw-kâ ngei hriatte an beisei bawk avang hian thusawituten ‘Audio’ dah hram hram turin kan inngen nawn leh a. Tin, a ziak chhiar tur pawh hi theihtawpa uluka punctuation-te leh spelling te en ngun hram hram tura inngen thar leh ni se, tih a ni e.
3. BCM pum huapin June thla chhung hian Inrinni zan dar 8-ah mahni awmhmun theuhah chhungkaw tinte tawngtaihona neih thin turin ruahman a ni a, tawngtai subject 10 zet siam sa a ni. Whatsapp group-ah te post a ni ang a, a theih ang angin mahni bialte pawh he hun hmang tur hian kan lo bengvar theih chuan a lawmawm hle ang. Heng bak hi pawimawh tak tak a la awm nual a, a tahtawl deuhvin report kan tum dawn nia.
Sd/- LALRINMAWIA
Secretary,
Serkawn Tualchhung Kohhran
⇒ Dt.27.5.2021-a Administrative Committee Meeting thurel thenkhat te :
* Tawngtai Beihpui: Kan ramah Covid-19 hripui leng a lo ziaawm a, a lo reh thuai theih nan June thla chhung hian tawngtai beihpui neih ni se an ti a. Tawngtai neih dan tur chu – Inrinni apiangin zan dar 8:00 ah BCM chhungtin leh mimal ten he tawngtai beihpui hi neih thin ni se la. Tawngtai thupui leh tul dang chu a rang lamin Kohhran chhungtinte hman theih tura hriattirna pek chhuah a ni ang.
* Covid-19 Relief Fund: Covid-19 2nd Wave avanga Kohhrana thawktute pawh damdawiin hautak tak takah te an awm lo thei lo va. Hetih rual hian Lockdown avanga chhungkaw hrang hrangin harsatna kan hmachhawn chin tur pawh hriat lawk hleih theih a ni lo va. Hengte avang hian Administrative Committee chuan Covid-19 Relief Fund siam ni se, tiin a rel a. Hemi atan hian BCM hnuaia thawktu leh Pensioner zawng zawngte, a thei apiang nikhat hlawh thawh tura ngen ni se, tiin a rel a ni.
* Cheng Nuai 2-a UTC Relief: United Theological College (UTC) chuan Covid -19 hrileng avanga Lockdown kalpui a nih avangin sum leh paiah harsatna nasa tak an tawh thu leh BCM chu Board member pakhat kan nih ve avanga tanpuina an rawn dilna chu ngaihtuahin cheng nuai 2-a tanpui ve ni se, tiin a rel a. Sum pek dan tur hi Finance Department-in a bawhzui tura ruahman a ni.
⇒ Mizoram Baptist Kohhran Assembly 2021-in Mizorama Chanchin Tha thlen champha phak vawi 125-na hriatrengna atan Mission Field thar hawn ni se ti-a a lo passed angin, Upper Assam Mission Field thar chu Dt.30.5.2021 (Pathianni) chawhma khan Rev. Dr. C.Vanlaldika, AGS (Mission) chuan a hawng.
LAWMPUINA
Dt.3.6.2021 (Ningani)-a HSLC results, Mizoram Board of School Education-in a tih chhuahah kan Unit TKP member hlawhtlinna duhawm tak tak changte kan lawmpui takzet che u a. In kal zelna turah hlawhtlinna chang zui zel turin duhsakna kan hlan bawk a che u. A la hlawhtling zo ve lote pawh beidawng mai lova bei hram hram tur leh hlawhtlinna in chan ngei theih nan kan duhsak bawk a che u. (HSLC results-a hlawhtlinna changte hming hi duh anga kan lak khawm kim hman loh avangin issue lehah tih chuah kan tum dawn nia.)
NGENNA
Pathian kaihhruaina leh awmpuinain Juniper pawh khaihlak lovin kan kal ve thei zel rih a. Amaherawhchu, FO programme leh Kohhran programme te a lo awm tak lohah chuan thu han chhuah mai tur van chang a lo tam ta in chanchinbu tih khah huphurhawm chang a awm ta fo mai. TKP member leh TKP member lote pawh thuziak (sermon/article) lama tan la turin kan inngen a ni e. Englai pawhin Sermon a ni emaw Article lam a ni emaw kan dawng thei reng e.