Bible Chang: Johana 20:1-16
A chunga Bible chang kan tarlanah hian Isua Thawhlehna thu kan hmu a. Kan chang thlan, Johana 20:1-16 zawng zawng hi chu tarlang nawn tawh lo mai ila, kan duh angin mahniin lo bih nawn ta mai ila. Thlan atanga Isua thawhleh hnua Isua thusawi kan hriat hmasak pasarih te hi han chhui zau ta ila.
I “Hmeichhia, engati nge i tah? Tunge i zawn?” (Johana 20:15) He thu hian awmzia a nei thuk khawp mai. Mari Magdalini kha Isua lei taksa sunin a tap a, a mangang a ni. Tholeh Krista’n he thu a sawi a hriat hnu pawh khan Magdalini khan Isua a ni tih a la hrethiam mai lo. Tholeh Isua hian kan lungngaihna leh mangannate min tawmpui a inhuam a, lungngaih leh mangan nite hian Amah Isua Krista hi zawnga, en thin turin min duh thin. Tun thlengin Thlarau Thianghlimin kan zingah awm reng mahse, Amah en nachang leh koh nachang kan hre lo fo thin
II ““Mari” (Johana 20:16) Isua’n Mari hming a rawn koh khan, Mari mit tihmenin a awm a ni. Heta “Mari” hi Mari Magdalini a ni a. Luka 8:2 kan chhiar chuan Mari Magdalini hi ramhuai zawl thin a ni a, a kawchhung atangin Isua’n ramhuai pasarih a hnawtchhuak a. Magdalini hian amah tlanchhuaktu leh tidamtu Isua hi a rawngbawlna zawng zawngah zuiin, kraws thlengin a zui a ni. Tholeh Isua hian A kianga awm thin Mari Magdalini kha a la hre reng a, a lungngaihna thlamuan turin “Mari” tiin a ko a ni.Isua hian a kianga awm thin, a bula hun leh nun hmang thin te a hi a hre thin Johana 11:43 ah pawh, thlana phum tawh Lazara kha a hming ngeiin “Lazar, lochhuak rawh” tiin a ko a, thi hnu Lazara tan damna a tling a ni. Krista ke bulah Lalpa leh A Kohhran te bela Isua kianga i hun i hman chuan i mangan niah Lalpa Isua hian a kochhuak ngei ang che. Hmelhriat koha Lal Isua kohna hi Mari Magdalini tan thlamuanna, rinna bul intanna etc a ni a, thi tawh hnu Lazara tan nunna a ni ang bawkin damlo tan damna, chak lo tan chakna leh lungngai tana thlamuanna tham a ni asin. Isua’n a tul huna a koh theih nan che, Isua ke bulah khawsa thin ang che.
III “… ka unaute hnenah va kal la….” (Johana 20:17) Isua khan Mari Magdalini kha a unaute hnena kal a, thawhlehna thu hrilh tur leh vana lak chhoha A awm tur thu hriattir turin a ti a nih kha. Krista thihna leh thawhlehna thu hi hretu zawng zawng hian midangte hriattir ve hi kan bat a ni tih helaia Isua tawngkam atang hian a chiang a ni.
IV “In chungah thlamuanna awm rawh se,”: (Johana 20:19&20) Isua khan A zirtirte kha thlamuang turin a hrilh a. Thuthlung hluia zawlnei leh hruaitu ropuite a tirhchhuah lai atang tawhin Pathian hian thlamuang taka awm tur leh huaisen tur tein a hrilh thin a. A hrilh mawl tawp lo, a thlamuanna thu hi a awmpui zui zel tur thuin a delhkilh nghal zel thin. Thlamuang taka awm tura min duhtu tholeh Krista hian thlamuantu Thlarau Thianghlim pek min tiam a ni. Chak tak leh huai takin i awm phawt mai ang u.
V Pain kei mi tir ang bawkin ka tirh che u hi – “Thlarau Thianghlim nei rawh u” (Johana 20:21 & 22) Pa hian Fapa Isua chu Chanchin Tha thlen turin a rawn tir tih kan hria. Chanchin Tha hretute hi hre lote hnena puangdarh tura tirh kan ni nghal tih pawh kan hriat a tul a ni. Min tir mawl tawp lo, Thlarau Thianghlim thiltihtheihnaa thuam chunga rawngbawl turin min tir a ni. Tholeh Krista hian thiltihtheihna min tiam a, chu thiltihtheihnaa inthuam chung chuan khawvel zau zawk kan thlir tawh dawn lawmni?
VI “Ka nakah zen rawh” (Johana 20:27): Johana 20:24-26 kan chhiar chuan Isua thawhlehna an hmuh lai khan Thoma a awm ve lo, Thoma chuan Isua thawhlehna pawh a thiante sawi atang ngawt chuan a ring thei lova. Mahse, Thoma hnenah Lal Isua a inlar a, a kut thir khenna te a khawih tir a, A nak hliam te a zen tir meuh chuan Thoma mit tih menin a awm ta. Isua chu thihna hnehin a tho ngei tih a pawm thei ta a ni. Thoma nun atang hian zir tur a tam khawp mai, Pathian hnathawh leh Thlarau Thianghlim inlarna hmufiah thei tur chuan ringtute zingah, kan rawngbawlpuite bulah, Kohhranah kan awm tam a ngai a ni. A hranga kan tal hian Lalpa hnathawh ropui kan hmu ve hman lo fo thin.
Ringtute inpawlkhawmna, Kohhran Inkhawm, TKP, BMP fellowship, BKHP inkhawm, Junior TKP, Sunday School etc etc ah hian kan inchiah tam tlat chuan Lalpa hnathawh leh inlarnate pawh kan hmu tam dawn a ni. Thoma anga tlai khaw hnua hmutu ni lovin, a hun ngeia hmutu nih thin i tum ang u.
VII “Hmu lova ring apiang te chu an eng a thawl e,” (Johana 20:29) Thoma khan Isua a hmu a, a nak hliamte a zen hnuah a ring thei chauh a, a tha tho mai. Thoma hi zirtirte zingah India ram thlenga rawn kal a, India rama Krista tana martar ngat a ni. Krista hian a hnawl hauh lo. Mahse, Isua hian hmu lova ring mai tute zawk hi a duh a ni. A takin Isua hmu lo mah ila, Bible chhiar leh tawngtai a, kan rin mai a, a rawng kan bawl mai hian Isua hi a lawm em em a ni. Finthuril (Philosophy) in engtinnge a tih? Science thiamna nen a inmil em? Darwin-a theory-ah engtinnge? tih vela buai a ngai lo. RIN hi kan tih tur a ni tawp mai.
Thlan ata kaihthawha a awm hnu hian Lal Isua hian kan natna leh lungngaihnate a la phur peih reng a, harstatna lak atanga min kaihthawh a la inhuam reng a ni. A thihna leh thawhlehna hretute hi kalchhuak a, midangte hriattir ve turin min duh a. Thlamuanna min pe a, thlamuantu Thlarau Thianghlim min pe bawk. Chak tak leh huai takin kan chhandamna a hlen zova, thihna a zawnga thihna rapthlak ber pawhin a dang zo lo. Keini pawh chak tak leh huai taka A tana nung ve tawh turin min duh a ni.
Ringhlel leh hlau chunga zui turin min ti lova, hmu lo chung pawha ring ngam turin min duh a ni.
Krista thawhlehna ni ropui tak kan lawm lai hian Tholeh Lal Isua thusawi pasarihte hi hrereng ila, kan tana thi a, tho leh Krista tan hian kan theihna zawng zawngin, kan chakna zawng zawngin, kan rilru zawng zawngin A rawng i bawl ang u.
-Beia Pachuau
