THALAI MIN SUATTU HEROIN (NO. 4)
Dr. Lalhriatpuia
Psychiatrist, MIMER
No. 4 khawih chhin i tum hma in a khawiha-te awm dan hi lo hrechiang phawt la, chutah duh i thlang dawn nia.
1. No. 4 hi vawikhat lek inchiu pawn zun a nei, mamawh chhunzawmin a siam thei che.
2. I khawih zin hnu chuan a tira nawmna ang kha pakhatmah a nei tawh lovang a, normal nan leh suffer loh nan i tih chhunzawm tho a ngai ang. Damdawi hmanga nuam siam chawp anih avangin thil dang nuam zawng zawng a da tel bawk ang a,hlimna i feel thei tawh lovang. Mi dang thiante nena hlim taka an inkawm laiin nang erawh chuan an hlimna ang i feel ve pha lovang. I nghei anih pawhin rei tak chhung chu nawmna a da dawn tho tho.
3. Chhuah i duh ang a. Amaherawhchu, darkar 7 pawh inchiu lova i awm chuan, i ruh chuktuah zawng zawng a na ang a, thlanfimin a bual che anga, kawthalo leh hnap tla rengin i awm ang a, zan pawh i muhil thei lovang. Amaherawhchu, heng dinhmun hreawm tak aia ti hreawm tur che chu, ruh chhungril za, hiah theih si loh hi a ni. Suffer tam takin tih reh tumin hruihrual ten an in hlap thuai thuai thin. Heng hi nikhat lek awh ala ni lo zui, kar 1 tal chu a awm dawn. Hei bakah damdawi chakna namen lovin a ti buai ang che.
4. No. 4 ti tlang pui hian Insulin syringe chhinsen 2-4 an ti tlangpui, chhinsen 1 hi cheng 800-1000 man a ni. Tu sum mahin a tlin lo, i tih duh ngai loh rukruk, in zawrh, damdawi zawrh ruk a ngai dawn. Addict tam tak hian beng tuai vung vung pahin ‘In lianpui ka lo sa zawk lova ni’ an ti duh lutuk.
5. I hriselnain a tlakpui nghal dawn. Kal, thin thalo i nei anga, i nghei hnuah pawh harsatna a siam reng dawn che.
6. Chhungkua inrem lohna a hring nghal, midang lakah i insit ngawih ngawih bik reng ang. In vengah pawh inthlahrung takin i awm reng tawh dawn. Thluaka thawk a nih avangin rilru lam harsatna a siam hnem dawn che, thih mai duh hial khawpin a sawp dawn che.
7. No. 4 i khawih tan atang khan khawi kawmkara boral (OD) thut thei rengah i in siam nghal.
8. I nghei thei hlauh anih pawhin, châkna leh ruh za hian i dam chhung zawngin a thing zeuh zeuh reng tawh dawn che.
9. Chutah inchiu avangin leh mipat hmeichhiatna a ken telte avangin HIV leh natna dang vei thei reng i ni bawk.
10. A pawiber chu i thlarau nunin a tuar dawn bawk.
Heng hi i awih loh chuan No 4 ti thin i lo zawt dawn nia, tichuan he ruihhlo hi khawih chhin loh tawp tur a nih zia i hre thei ang.