RAWNGBAWL HONA ATAN INHMANGAIHNA
“Phuba i la tur a ni lo a, i chipui thlahte huatna i pai tur a ni hek lo, nangmah i inhmangaih angin i thenawm i hmangaih tur a ni zawk.” Leveticus 19:18
Mihring hi a huho a cheng tura Lalpa din kan ni a. Inmamawh tawn vek kan nih avangin kan khawsaknaah pawh a huhoin kan awm thin tlangpui a. Chutiang bawkin Kristian kan nihna angah pawh kan thlarau nun chak lohnate kan inpuih tawn theih nan Pathianin a huhoa chenna KOHHRAN min buatsaih sak a ni. Hetianga nung ho tura kan awm khawm hi Setana hian a thik em em a. Hlim taka kan khawsak ho theih loh nan leh rawng kan bawl ho theih loh nan, inngeih lohna te, inhuatna te, itsikna na leh thil dang dang hmang tein kan karah khi nasa tak siam a tum a, a chang chuan a hlawhtling thin reng bawk a ni.
Pathianin rawngbawl min phalsak angin rawng kan bawl theihna tur hrang hrang min siam sak a. Chumi atan chuan KOHHRAN-ah rawngbawlna tur min pe a. Kohhran hnuaiah fellowship organisation hrang hrang kan nihna leh kan kum mila kan telna tur leh rawng kan bawlna tur min pe bawk a. Chutih mek lai chuan pawn lama kan nun dan leh kan hnathawhna hmuna kan awm dante thleng hian kan rawngbawlna vek a ni tih hriat hmaih lo ta ila. Chu’nga rawngbawlnaah chuan inlungrualna tha kan mamawh vek a. Innghirnghona a lo awm hian pawl a nih tur angin a kal thei lo a, a lo chak lo thin. Tha taka rawng kan bawl ho theih nan kan inhmangaih tawn a ngai a ni.
Mihring hi suala tlu tawh, suala piang kan nih avangin inhmangaih tawn hi a har hle mai. Kan tlukpui renga kan ngaih ten rawngbawlna huang chhungah chanvo tha zawk te, nihna pawimawh takte an chelh hian in lawmpui ai mahin in thik tawnna te, chu chanvo chu anni ai maha phu zawka inhriatna te a lo piang duh khawp mai. Kan tlinna te, kan felnate inhmuhsak tum aimah chuan kan tlin lohna lai in sawi chhuahsak te, kan chak lohna lai taka in kher keuh keuh te hi a lo nuam zawk emaw tih mai tur hi a ni a. Mahse hei hi ngun taka ngaihtuah chuan Pathian duhzawng a ni em tih kan chhut fo a ngai a ni. Miin kan chunga rilru tha lo an put vanga emaw thil tha lo an tih avanga an rawngbawlna thlenga va kher a, tih mualpho kan tumna hian thil tha aiin thil tha lo a thlen tam zawk tih kan hriat a tha hle mai. Duhsak taka inzilhna leh infuihna anih si loh chuan insawichhiatna satliah hian thil tha lo tak a thlen a, pawl anga kan rawngbawlna thlengin a tuar ta thin a ni.
Hmangaihna hi Pathian atanga chhuak a ni tih hi hre reng ila. Chumi kan neih theih nan chuan Lalpa hnenah tawngtaiin dil thin ta bawk ila. Pathian chuan thupek ropui tak min pe a. “Lalpa i Pathian chu i thinlung zawng zawngin, i thlarau zawng zawngin, i rilru zawngin i hmangaih tur a ni.” Matthaia 22:37-ah a sawi a. Pathian kan hmangaih tlat chuan a thupek te kan zawm ngei ngei thin bawk a. Chu a thupek zingah chuan, “Nangmah i inhmangaih angin i vengte pawh i hmangaih tur a ni.” Matthaia 22:39 a tel bawk a. Mihringin a tih theih hlu ber chu a Siamtu hmangaih a, a thupekte zawm a ni a. Chumi tlukpui leh chumi ang bawka pawimawh chu kan mihring puite hmangaih hi a ni. Chumi tak chu kan nun honaah leh kan rawngbawl honaah hian seng lut ta ila a va nuam dawn em.
Pathian thuah kan hmu a, “Elrel leh inngaihlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se.” Philipi 2:3. Tute mah hi kan tha famkim lo a. Kan rawngbawl hona kawngah hian mahni inngaihlu leh mite el ran chi chu dah hniamin an awm zel dawn a ni. Kan chak lohna laiah indawm tawnin, kan inpui tawn ang a. Kan tih that leh kan tlinna laiah inlawmpui thiam bawkin. Pathian atanga chhuak inhmangaih tawnna leh induhsak tawnna atangin rawng bawl ho ila. Chu chuan rah tha leh duhawm, ring lo mite tan pawha rawn tel chakawm khawpa itawm rawngbawl hona min chhawp chhuah sak dawn a ni. Rawngbawlna kawngah kan tha leh zung te leh kan theihtawp kan chhuah thinna ai maha pawimawh leh Pathianin a duh kan inhmangaih tawn hi a ni si a.