Isua Krista Remna Lal
Lalthanliana
Isaia 9:6
Kan tan naupang a lo piang a, fapa pêkin kan awm ta a: rorêlna chu a kokiah a chuang ang a: a hmingah chuan, Maka, Remruattua, Pathian Chaka, Chatuan Pa, Remna Lal an ti dawn si a.
Lal Isua he khawvela a lo kal chhan chu remna siam turin a ni. Lei leh van, Pathian leh Mihring inrem tawh lo inrem leh tura lo kal a ni a. He hna thawk tur hian tlawm takin a lo kal a ni.
Remna hna thawk tura tlawmna a pawimawh zia Isua lo pian dan hian a tarlang chiang hle. Chapo tak leh ropuina tam tak hmachhuan reng chung chuan inremna tha tak neih a harin a hlawhtling mawh viau mai. Isua Krista erawh a hmangaihte nena inrem leh turin thawh hreh, tih hreh nei hauh lovin a ropuina a hlip a. Kan ban phak leka inhnuk hniamin tlawm takin bawng in tlawmah a lo piang a ni. Tuna a rawn pian dan aia tlawma pian pawh ngai dawn se nang leh kei avang hian a thei ang.
Heti taka remna ngai pawimawhtu hian Lei leh Van inrem chauh ni lo mihring leh mihring kan inrem pawh a duh em em ang tih a chiang a. “Leiah rem leng rawh se” tia vanho zai ri khan mihringte hnenah thuchah pawimawh tawp remna thu an tlangau nghal a ni. Tunah hian Inremna thu kan sawi dawn a ni.
Kohhranah: Mihring hi fel lohnaa khat, sualin a tihbuai reng kan ni a. Setana min beihna ber pawh inrem lohna sala tan reng hi a ni. Kan sualna leh tlin lohnate chu ngawihpui a, hneh mai a harsaa kohhran huangah pawh kan senglut ta thin a. Chak lovin min siam a. Mi thenkhat phei chu kan hnungtawlh vak thin a nih hi.
Kohhrana inrem lohna kan tih hian mimal inrem lohna, indona tho kha a ni a. Kohhran huangah kan senglut mai a ni. Rawngbawlpuite nena inrem hauh lo, indo reng leh induhsak tawnna reng reng nei lo hi Zoramah hian kan kat nuk ang. Hetiang rawgbawltu, kohhrana a kul a taia inhmang thinte nun hian kohhran hlata awm thin te nun a tihla zual a. Chak lo taka kohhran bel thinte nun pawh a tichak lo zual a ni. Sawi mai hian a fiah thin lo. Inhnaih tak anga lang, inhlat ru tak si kan ni a. A lerah mawi taka lan tumin kan beia kan mawi zo ta thin lo a ni.
He Chhamdamtu lo piang Remna Lal hian kan Kohhranah inremna duhawm zawk min thlen se la, amah chauh chu thlirin lawmna luipui luang zel sela a va duhawm tehlul em.
Thenawm khawvennaah: Khawvelin a buaipui ber pakhat chu inremna tho hi ni a. Inremna duh hian nitin sum leh pai tam tak a luangral a. Sawrkar chak apiangin an chakna lantir nan inremna kawng chu an zawha mahse, khawvel hi a buai zel si. Rem lentir tura Isua Krista lo kal atanga kum 2000 zet a liam hnuah pawh inrem lohna chuan min chenchilh a. Khawvel hi dinhmun khirh takah a ding mek a ni.
Khawvel chhe meka kan din lai hian thenawm khawvennaah pawh he inrem lohna hian hmun a chang ve a. Kan dinhmun lo tha zel leh kan inmamawhna hniam chho zel hian inrem lohna bawihah min hruai fo thin a ni. Mi kan mamawh loh avang maia indo tur kan ni lo va, kan mamawh miah lohte nen lama inrem hi Isua Krista khawvela a lo kal chhan zawk chu a ni.
Thenawm tha zawk, midangte remtu kan nih theih nan kan nun hi a thara awmin lo danglam zawk se a duhawm hle mai. Kum 2020 lo awm turah hian thenawm tha zawk, midangte remtu kan nih theih nan Krismas duhawm ber hmang thei ila a tha hle ang.
Chhungkuaah: Chhungkuaa kan buaina leh chhiatna thlentu ber hi kan inrem loh thin vang a ni. Remna Isua hian kan chhungkuaa rem lentir hi a duh em em a. A lo kal chhan pakhat a ni e.
Zorama chhungkaw tam tak hi he inrem lohna hri chhia hian min ei chhe mek a. Chak lovin min siam a, kan zahawmna kan hloh nasa hle. Chhungkuaa nuiho thei lo engzat tak awm ang maw? Kan hlimnaah pawh inlawmpui thei lo chhungkua tam tak kan awm a. Lawm lo chungin kan in tha en vel mai mai a ni e. Chhungkua a chak lohva kan indo tlatin Kohhran nuam, khawtlang nun tha zawk a thleng thei dawn em ni? Kan chhungkua a buai reng laiin kohhranah thlarau thianghlim hnathawh a thleng reng theiin kan ring em? Chhungkua hi a bul a ni a. Chhungkaw tina Remna thlen hi Isua Krista tlawm taka khawvela a lo pianna chhan a ni.
Kan hun liam tawha kan natna te hre reng lovin kum 2019 krismas hian kan nun tithar leh se. Inrem lohna bawih atang hian remna duhawm zawk kan neih theih nan Pathianin he KRISMAS hi malsawm rawh se. Inremna tawp chin nei lo kan neih theih nan Pathian thutak chuan min hruai zel rawh se.
Isaia 9:7
A ram a zau zel ang a, a ramah remnain tawpintai a nei lo vang;