LEIIN A LAL LAWM SE
Upa J.Lawmsanga
Kan nghah Krismas hlimna ni ropui chu kan lo thleng dawn ta, a va lawmawm em. Krismas atan chi hrang hrangin kan inbuatsaih hlawm a, Krismas laia thil thleng thenkhat tawi te tein lo thlir kual teh ang.
Sumdawngho inbuatsaihna: Sum lu chuh hunlai anih miau avangin theihtawpin an tang lo thei lo. Tun ang hunah chuan sum hi an thinglung luahtu ber a ni. Mahse, Krismas lo awm chhan KRISTA a nih miau avangin sum aiin dah pawimawh thei hram se a va tha em.
Krismas leh thuamhnaw thar: Naupang tan chuan kawr thar, pheikhawk thar, jacket/kawrlum thar han neih hi a va Krismas teh lul em. A, naupang chauh an ni lo, puitling pawh thil thar neih tum tlat kan tam mai ti rawh u. Krismas a thleng dawn miau a lawm. Mahse, thuamhnaw thar hi a Krismas lai ber a ni lova, a behbawm, Krista inpekna avanga kan chan ve mai, a siper a ni tih kan inzirtir thiam a va tul em.
Krismas leh duty: Loh theih loh, Krismas dawn leh kum thar dawn vela tul ve em em chu duty hi a ni tlat. YMA/VDP kan insangmar a, mahni chungkua, nupui fanau ngaihsak hman lova duty a tul tlat zel – a va Krismas lo tak em, ti pawhin a ngaihtuah theih ti rawh u. Krismas hi hlimhlawpin kan hmang nasa ta lutuk a, ven kan ngai ta a; YMA duty a ngai ta a nih hi. Krismas-ah kan nunah Krista lo lal ber theuh se a va duhawm em.
Krismas leh decoration: Krismas lo thlen ve lema in leh a vel chei lohte chu, Biak In leh a vel chei lohte chu, kawtthler chei remlai tak chei lohte chu a inhmeh lo zawk tawh a ni lawm ni? Traffic Island chei kumte kha a va ropui tak em. Naupang ho chuan, “Krismas kan en dawn,” an ti a, traffic island-ah an kal sup sup a nih kha. Niak In leh a vel chei te, in leh a vel chei te hi a awm a ni. Amaherawhchu, Lal Isua aiin kan decoration hi a lar ang a, Lal Isua hliahtu a ni zawk palh ang e. Lal Isua chawimawina chi khat te mai a ni tih kan inzirtir a tul ta hial em le?
Krismas… lungngaihna hun: A ni thei dawn em ni, kan ti mai thei e. He kum chhunga lusun khawhar tan Krismas hi hlimna ni tih a har viau mai thei. Lal Isua lo kal chhan riangvaite hnena chanchin tha hril, lungngai zawng zawngte thlamuan turte, lungngaih aiah hlimna hriak tia zawlnei Isaia’n a lo sawi hian; hlim viau chu lusunte tan a har dawn a nih hi. Lal Isua lam kan thlir hram hi a va tha em.
Chu chauh a ni lo, Krismas-ah hian fate avanga nu leh pa lungngaia rum kan va tam tawh em. Pasalte avanga nupuite rilru hah kan va tam awm em. Nu leh pa tam takin Krismas hi an thlahlel tawh lo a nih hi. Krismas-ah hian Krista ni lo hlimna dang kan zawng thin a, a va pawi tak em. Krismas-ah hian KRISTA LO LAL BER TEH SE.
Krismas leh chawimawina: Krismas-a kohhran programme tam ber chu Lal Isua fak leh chawimawina programme – ZAIKHAWM hi a ni. Lal Isua kan tana nun hlan tura a lo kal tanna hun a ni a, a ropui em a, angel-te pawhin an chawimawi a nih kha.
Leiah a lo piang van Lalber-a chu,
Angel-in an chawimawi,
Lawm hla ropui takin,
Chungnung berah ropui rawh se.
Van Lalber kan zinga lo awm, Immanuela hi fakin i chawimawi ang u. Krismas-a kan lawm tur tak chu amah Lal Isua hi a ni. Hla siamtuin,
Khawvel lawmnan a lo kal a,
Leiin a Lal lawm se;
Thinlung tiin hmun lo kian se,
Lei leh van zai rawh se.
a tih ang hian, Lal Isua fak leh chawimawi hi kan lawm dan tur dik tak a ni. Krismas tak tak hmang turin kan thinglung kawngkhar i hawng theuh ang u.