SIPAI RINAWM
John Wesley-a chuan, “Pathian aia hmangaih dang nei lo, sual haw ngam mi, Kristian za min pe ula, he khawvel hi Krista chanchintha in ka sawi danglam vek ang.” a lo ti a ni.
He khawvel hian mi hlawhtling a tehna hi eng ber nge ni ang? Engtinnge hlawhtlinna chu an neih? Pawisa nei tam/thawkchhuak tam te, emaw nihna/hnathawh sang tak, emaw eng thil emaw a hlawhtlinna ropui tak neite hi mi hlawhtling an ni mai awm e. A nih leh Pathianin ringtu hlawhtling a tih te chu tute nge ni ve ang? Pathianin ringtu hlawhtling a tihte hi mi rinawm an ni tlangpui a ni. Matthaia 25:14. Pathian hian mi tam tak kristiana kan hruai luhte, Kohhran (TKP)-ah kum engzat nge rawng i lo bawl tawh tihte, Pathian tan thil ropui tak eng zat nge i tih tawh tihte ai chuan Pathian lakah i rinawm em” tih hi a ni a en fo thin. I Korinth 4:4 “Engmah indemna ka inhre si lo va; nimahsela chu chuanin thiam mi chantir chuang lo; mi fiahtu chu Lalpa a ni zawk.” Kristianna a hlawhtling tur chuan engtik lai pawha min hmu rengtu hma ah hian kan rinawm em tih hi a pawimawh ta ber a ni.
Vawikhat chu tlangval pakhat hi mi huana hna thawk turin a va interview ve a. A huan neitupa chuan engvanga lo interview nge tih a zawh chuan tlangval chuan heti hian a chhanga, “ Thli leh ruah karah pawh thlamuang takin ka muhil thei” tiin a chhang mai a. Huan neitupa chuan a hrethiam lo hle mai. Mahse chu tlangval chu a ngainat zawng mi a nih avangin a la ta tho a. Hunte a lokal zel a, zan khat thli leh ruah nasa tak maiin huan neitute nupa chu a ti harh hlawl mai a. Rang lutukin an nupa chuan an in leh lo a him em? tih an thlithlai nghal a. An huan luhna kawngka chu a lo in kalh thlap a. Meichhemna bula chuan thing tam tawk a in chhep thlap bawk a. Huan hmanrua zawng zawng chu a dahna tur takah a lo in rem thlap bawk a. An ar-in leh bawng-inte pawh a lo in kalh thlap bawk a. Tin an tlangval pawh chu tui takin a lo muhil a. Huan neitupa chuan interview laia tlangvalin, “Thli leh ruah inkarah pawh tui takin ka muhil thei,” a tih kha a hrethiam ta a. Tlangvala khan a hna rinawm takin nitin a thawk a, thli leh ruah lo thleng thin avangin nitin inpeihsa at in a lo inbuatsaih thin mai zawk a lo ni. Nang leh kei hi Kristian kan nih angin Pathian lokal lehna tur thlir chungin rinawm takin kan lo nghak ve em? Thupuan 2:10 “Thih thlengin rinawmin lo awm rawh,tichuan nunna lallukhum ka pe ang che.”
Pathian ina lawmman pek tlaka a ngaih ho hi i han zir ta ila. Isua zirtirte thih dan hi han enkual hlawm ila. Dan bawhchhiaa puh avang thi an ni deuh tlangpui hlawm a ni. Tan in ah te an thi a, Savun uiha tuam hlumte, a letling zawnga misual ber anga khenbehte an ni nawk hlawm a ni. Hebrai 11:38 (Chungho tan chuan khawvel hi awmna tlak a ni lo). An Pathian an rin leh a rawng an bawla phatsan tura duhthlanna hun chu an nei a ni. Mahse, Krista sipai rinawm tak nih an thlang ta zawk mai a ni. Nang leh kei pawh khi duhthlanna tho khi kan hma chhawn tur chu a ni.
Mizo Kristian hi kan rinawm em? He thu hi a khel tham khawp ang. Thenkhat an rinawm a, thenkhat an rinawm lo! Ringtu kan nihna anga kan rinawm zawh loh avangin kan Pathian thu hi a dal a. Kristianna a dal em em bawk a ni. Amaherawhchu, duhthlanna thlang dik mi rinawm tam tak an awm ve tho a ni. A tlem erawh chuan an tlem zawk niin a lang. A nih leh mizorama kan thlemna tawhte hi a harsa bik viau em ni ang le? A chhanna tawite chu harsa bik lo. I Petera 5:8-9. “Ngaihven ula, fimkhur rawh u; in khingpui Diabola chu sakeibaknei rum thin angin a ei theih tur zawngin a phi ruai thin; in unau khawvela awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u.” Ngaihvena, Pathian thu a in veng reng chunga kan nun kan hman chuan Pathian tanpuina zarah Krista sipai rinawm hi kan ni ve thei a ni. Chuvangin keini Kristiante hian Krista sipai rinawm ni tur hian thu i tiam thar leh ang u hmiang. Lalpan kan hneh theih tawk tur bak kan chungah thlemna a thlen tir dawn si lo.