LAL ISUA ROREL TURIN A LO KAL LEH DAWN
Lalruatkima Renthlei
Lal Isua hi engvanga lokal leh tur nge a nih?
Mathaia 25 :31 – 46 ah khan Lal Isua rorel dan tur kan hmu a. Beram leh kel a thliar ang. Beram chu tute nge? Lal Isua ringtute, a chhandamna chang tute an ni. Kelte erawh chu thiam loh chang, hremhmuna kal tur te an ni. Chang 32-naah chuan “A hmaah chuan hnam tin an inkhawm ang a, beram vengtuin kel zing ata a beramte a hlir angin an niho chu a hlir ang” tih kan hmu a. Heta Kel a tih hi khawvel mi, Lal Isua ringlo te an ni. He khawvela amah ring duh lo tute lak atang hian a chhandamna chang Beram te keini ringtute hi min thliar dawn a ni. Kan chhiar thlak zel chuan beramte chu a ding lamah a dah ang a, kelte erawh chu a vei lamah. Chumi hunah chuan Lalber chuan a dinglam Beram te hnenah chuan ‘Ka pa voh bik te u, lo kal ula khawvel siam tantirh ata intana ram buatsaih chu chang rawh u’ a ti dawn a ni. Chu hmun chu kan tana buatsaih a ni a, keini hian kan chang ve dawn em? A vei lam kel te hnenah chuan ‘Anchhedawngte u, kumkhaw mei, Diabola leh a tirhkohte tan an buatsaih ah chuan mi kal bosan rawh u’ an la ti dawn a ni. He ta ka sawi belh duh chu heng ho hian Pathian chu an hria, a rawng pawh an bawl ve ngei tih a hriat a ni.
Engtikah nge Lal Isua hi a lo kal dawn: Mihringin chhan chi a ni lo. Matthaia 24 : 36 ah chuan “Chumi ni leh a hun thu chu Pa chauh lo chuan tuman, vana vantirhkohte pawhin, Fapa pawhin an hre lo” a ti a ni. Amaherawh, chu a hnai tawh a ni tih erawh chu kan hriat a pawimawh hle a ni. Mathaia 24 : 3 atanga kan chhiar chuan A zirtir ten Lal Isua an zawt a, “I lo kal lehna leh khawvel tawpna chhinchhiahna min hrilh rawh” tiin an zawt a nih kha. Kan tunlai khawvel thil thlengte kan ngaihtuah hian chhiatna hrang hrang lirnghingte, tam te, indo thu leh indo thuthang te. A tam mai ti rawh u. Lal Isua lo kal lohna chhan chu II Pet 3 : 9-ah kan hmu a. Pathian hian chhandamna kan chan loh hi a hlau em a ni.
Lal Isua lokal lehna hi thlamuan puitu kan ni em?: (I Thes 4: 16 – 18) Ringtute tan chuan Lal Isua lokal tur hi kan inthlamuan tawnna tur a ni a. Amaherawh, chu mi tam tak chuan Lal Isua lokal lehna tur hi kan thlamuan pui tlat lo. Mi thenkhat chuan kan hlau tlat, kan ngaihtuah zawng ringawt pawhin kan hmulthi te hi a ding ur ur thin. Kan inthlamuanna tur zawk hian kan inthlamuan zo tlat lo. Engvang nge? Kan nun danin a zir tlat lo alawm. Kan nun hi Khawvel thil nen kan chawhpawlh nasa lutuk a. Lal Isua aia hmangaih kan neih thin avang hian Lal Isua lokal lehna hi kan thlamuanpui thei lo a, a lokal leh ang tih hi thenkhat chuan kan hlau zawk a ni. A chhan chu ro min rel sak dawn si a.
Tuna kan awmdan/kan nungchang hian Lalpa lokal lehna hi ka hmachhawn ngam a ngem?
Kan hun hman dante, kan nungchang leh kan thil tih duhzawngte hi ngaihtuah ila, Lal Isua rorel tura lo kal leh tura hi kan hmachhawn ngam em le? Tam tak hi chuan kan ngam lo mai thei a ni. Kan ram dinhmun te thlir ila, chanchin tha aiin chanchin tha lo kan hre tam tawh a. Sualna a pung nasa em em a. Kristian ram kan ni kan ti a, kan nun dan erawh chu a Kristian leh si lo a. Rawngbawlna kawngah pawh kan inhmang tha em em. Mahse, sual hnehna kawngah hian kan pachhe leh si a. Rorelna hmaa dinpui tlak hian nung ila, rorelna hma a dinpui tlak hian kan nun hi invawng uluk ang u.
Lal Isua lokal lehna hi rinawm tak leh chhel takin i nghak ang u:
Thupuan 2:10 ah chuan “Thih thlengin rinawmin lo awm rawh, tichuan nunna lallukhum ka pe ang che” kan hmu a. Thih thlenga rinawma Lal Isua zuitute chauh hian a ni nunna lallukhum hmu dawn ni. Jakoba 5:7&8-ah chuan chhel taka awma kan thinlung tinghet turin min fuih a. Lalpa lokalna a hnaih tawh thu a sawi a ni. Lal Isua lokal lehna hi chhel taka nghak tur kan ni. Hebrai bung 11 kan chhiar chuan rinna a fakhlawh te kan hmu a. Chang 15-16-ah chuan “An chhuahna chu lungkham sela chuan hawnna remchang an hmu tawh ngei tur a ni a. Nimahsela, tunah zawng ram tha leh zual chak an lo ni a, chu chu vana mi a ni…” Lalpa hmu chiangtute hi chuan tuar hi a ngam em em a ni. Engvang nge ? Hmuh theih lova chu an hmu tlat thin a ni. An lawmman dawn tur hi an chiang a, thih hnu piah lam ram hi an thlir zawk vang a ni. Chang 24 – 25 ah pawh Mosia chungchangah kan hmu bawk a ni. Keini pawh hian he khawvela kan awm hun chhung rei lo te ah hian sual nawmna ai chuan Pathian avanga tuar hi i ngam zawk ang u. Nakinah Lal Isuan ro a rel hunah Nunna lallukhum kan chang dawn a ni.
Lal Isua nei tawhtu, piangthar te hian rinawm tak leh chhel takin Lalpa lo kal lehna hi nghak ila. Hun tha kan neih lai hian Lal Isua la nei lo, piangthar lo kan ni anih pawhin i ngaihven ang u. Lal Isua hi i zawng ang u. Lal Isua hi rorel turin a lo kal leh dawn si a.